Вуж Шудья школалы кулэ чылкыт ву, автобус, спортзал…

Удмурт Дунне
By Удмурт Дунне Апрель 3, 2017 14:10

2019-тӥ арын гуртын школа усьтэм дырысен 100 ар тырме.

Ирина Михайловна Евдокимова 30 аресказ Алнаш ёросысь Вуж Шудья школаысь директорлэсь ныпъетсэ ныпъяз. Школазылы но сомында ик ар.

Вуж Шудьяын дышетске 58 нылпи. Берло дыре та лыдпус ӧз вошъяськылы, но вуоно сӥзьыл нырысетӥ классэ лыктӥсьёс йылыны кулэ. Нылпиос понна ужа 18 кружок. Со сяна, спорт секциос вань. Дышетӥсьёс пӧлын уногес воргоронъёс ужасалзы ке, эшшо тросгес кружокъёс но радъяны луысал, нылпиослэсь ваньмон дырзэс уката пайдаё карысалмы, шуэ Ирина Евдокимова. Туннэ школаын 14 дышетӥсь, соос пӧлысь 2-ез гинэ воргоронъёс.

— Милям спортзалмы ӧвӧл, — вера Ирина Михайловна. — Юрт ӝутыкузы уго, сое нылпи садлы сётыны чаклало вал, нош интыязы отчы школаез, садлы мукет инты шедьтӥзы. Со дырысен ик ёркытын дышетскиськом. Та ужпумез ӝутӥськод ке, выль юрт пуктон планын вань, шуо, нош уж вылын со уг шӧдӥськы ай. Со дыре ик  милемлы но куронъёс мукет школаослы сямен ик пукто, спортзалмы ӧвӧл шуыса, уг висъяло. Геннадий Харлампьевич Севастьянов физрукмы Удмурт кун университетэз йылпумъямез дырысен спортзал сярысь уйбыртэ. Шуныт куазен нылпиосты  стадионын дышетэ, нош кезьыт но зор-кот дыръя школалэн сюбег коридораз бызьыло-тэтчало. Озьы ке но дышетэм нылпиосызлэн капчи атлетикая, куасэн бызьылонъя, теннисэн шудонъя вормонъёссы вань. Геннадий Харлампьевич специальностезъя волейболист, соин ик туж потэ волейболэн шудонъя команда кылдытэмез. Спортзал гуртысь егитъёслы но, арлыдоослы но туж кулэ. Калык тазалыксэ юнматон сярысь берло дыре туж сюлмаське. Соин ик спортзал пумысен ужпумез йылаз-пумаз вуттэме потэ.

Со сяна но Ирина Евдокимовалэн сюлмаськонъёсыз лачак. Эскеронъёс возьматӥзы: быдэс гуртысь ву юыны уг тупа. Мукет скважина гудоно, шуо. Таиз школа понна вормонтэм. Мукет амал ӧвӧлысь туннэ ваньзы вуж скважинаысь ик ву лэзьяло. Школае юыны ярамонзэ кытысь ке нуллоно ке, бензин, транспорт кулэ. Нош транспортэн татын сотэк но секыт. Школа автобуссы гинэ но весь сӧриськылэ — 9 ар ни солы.  Нош азьпалан юбилей: 2019-тӥ арын гуртын школа усьтэм дырысен 100 ар тырме. Сӥё-дано ужрадэ вань выпускникъёсты ӧтьыны малпало. Соос азьын кепыр медам вае шуыса, татын дасяськон али ик мытэмын ни. Дышетӥсьёс но нылпиос школалы выль тус дэмен пыӵатыны чаклало.

Татьяна Петрушина

Туспуктӥз Альбина Салякудинова

 

 

Удмурт Дунне
By Удмурт Дунне Апрель 3, 2017 14:10