Вавож школаысь Анна Зайцева «Артеке» шутэтскыны кошкоз

Удмурт Дунне
By Удмурт Дунне Апрель 26, 2017 11:40

Вавожысь Анна Зайцева спортын вормонъёсыз понна мыноз «Артеке».

Май толэзе Вавож школаысь 6-тӥ классын дышетскись Анна Зайцева Сьӧд зарезь дурысь «Артек» лагере шутэтскыны кошкоз.

Анналы путёвка кузьмаз элькунысьтымы Мугорез кыдатон культурая, спортъя но егитъёсын ужан политикая министерство. Анай-атаеныз ӵош со ассэ синмаськымон возьматӥз Гурт тол шудонъёсын — Зайцевъёслэн семьязы 1-тӥ инты басьтӥз. Но нылаш спортын гинэ азьветлӥсь ӧвӧл. Сотэк Вавож школаысь одӥг ужрад но уг ортчы. Озьы ик ӟуч но немец кылъёсъя, историяя, физкультурая олимпиадаосын вормылэ, чебер суредаське. Дневниказ шальтыр-шальтыр «5»-ёс гинэ.

— «Артеке» путёвка сёто шуыса, ивортӥзы ёрос администрациямы ужасьёс, — вера Анналэн анаез Татьяна Викторовна. — Соку ми нылыным куасэн нискыласькомы вал. Макем шумпотӥмы — кылъёсын уд вера. Нылылэн огпол но зарезь дурын шутэтскемез ӧвӧл!

Анна кузь сюрес вылэ 5-тӥ мае потоз, соин ӵош кошкозы Удмуртиысь эшшо 22 пиналъёс. Нырысь поездэн Москвае ширтозы, отысен самолётэн Симферополе лобӟозы. «Артекын» 1 шутэтскон нунал ог 5 сюрс манет тыр усе. Но та понна анай-атайёс коньдон уз тыре. Соослы сюреслы гинэ — 24 сюрс манет — шедьтоно. Вордӥськем палъёсазы нылпиос берытскозы, 2 арня ортчыса — 25-тӥ мае.

Татьяна Викторовна оске: «Артек» нылызлэсь лулпуш дуннезэ одно ик воштоз, Россилэн пӧртэм сэрегъёсысьтыз вуэм усточиос сое дӥсьтӥсьгес карозы. Крымысь лагере визьмоосыз пӧлысь визьмо, шаплыосыз пӧлысь шаплы пиналъёс гинэ шедё ук.

— Лагере шедён понна вожвылъяськон нылъёс но пиос вискын зол мынэ. Кылем арын квота 148 пиналлы висъямын вал, нош куриськонъёс 250 пала люкаськизы. Туэ ар куспын «Артекын» дунтэк шутэтскоз 163 адями, — ивортӥзы шаерысьтымы Дышетонъя но наукая министерствоын ужасьёс.

Шуд пуйыос пӧлы шедемын, кылсярысь, Ижысь «Розовый слон» ансамбльысь нылпиос но. Соос 3-тӥ ползэ ини Москваын ортчылӥсь благотворительностьлы сӥзем «Светлана» фестивале пыриськизы. Усточиослы путёвка Россиысь Правительство кузьмаз.

Нялтас вераса, туэысен «Артек» ужан радлыксэ воштӥз. Азьвыл аръёсы улосъёс асьсэос быгатӥсь нылпиосты бырйылӥзы но лагере келяллязы. Туэ та уже анай-атайёс но пыриськыны быгато Интернет пыр.

— Нырысь ик «Артеклэсь» сайтсэ усьтоно но пусйиськоно, собере нылпилэсь вормонъёссэ, быгатонлыкъёссэ возьматоно. Отын соку ик кылдытӥське рейтинг, 20 адями путёвка утэ, — валэктӥзы Дышетонъя но наукая министерствоын.

Ольга Корепанова

Удмурт Дунне
By Удмурт Дунне Апрель 26, 2017 11:40