«Вашкала эшъёсылы. Е. Евтушенко»

Удмурт Дунне
By Удмурт Дунне Апрель 1, 2017 17:03

«Вашкала эшъёсылы. Е. Евтушенко»

Туала критик Д. Быков алигес гожтӥз: Е. Евтушенколы сётыны луэ вал Нобель премия.

Алигес гинэ Сибире ветлоно луиз но, ортчи Тайга нимо станция пыр. Малпасько: тани кытын вордӥськиз Евгений Евтушенко.

Табере кылбурчи пӧламы ӧвӧл ни, но солэн нимыз но кылбуръёсыз валлин ортчиз мынам ёзъёсылэн улон-вылонзы, малы ке шуоно ма гинэ улонамы ӧй вал, Е. Евтушенко одно ик сое кылбур чуръёсы кисьтылӥз. Сталинэз-а мавзолейысь потто, Братскын ГЭС-а лэсьто, Ленинлэсь 100 арессэ-а пусъё, перестройка шуон-а мынэ, Украинаын майдан-а потто — котьку но Е. Евтушенко, В. Маяковскийлэсь адӟем карыса, ас кылзэ кылбурен вералляз. Соин ик сое куд-огез эшъёсыз гинэ но «конъюнктурщик» шуылӥзы, мукетъёсыз, валамон, котьку но вылӥ дунъяллязы солэсь лэчытлыксэ но кышкасьтэм луэмзэ.

Озьы луиз: Москвае дышетскыны мынэме бере ик мон Е. Евтушенколэн ӝытаз лотерея амалэн люкем билет утӥ. Эшъёсы сюлворизы, сёт билеттэ, тон Е. Евтушенкоез уд на тодӥськы, тыныд со кулэ ӧвӧл шуыса. Али но пель сьӧрам на со кылъёс. Эшъёсме  валаны луэ: зэм ик но, мон соку гинэ гуртысь вуи, нокытчы но ветлэме ӧвӧл на, нош ӵош дышетсконо эшъёсы тросэз Москваысь бере, модае пырись вань адямиосты тодо ини.

Сыӵе кадь ӝытэз мынам вань улытозям адӟылэме ӧй вал ни. МГУ-лэн культура юртаз калык сомында — пуксьыны гинэ ӧвӧл, сылыны но инты ӧвӧл. Ачим мон балконлэн сэргаз ӝиптӥськыса сылӥсько. Е. Евтушенко лыдӟе кылбуръёссэ, чуръёсыз али но пелям чузъясько: «людей неинтересных в мире нет, их судьбы — как истории планет», «о, кто-нибудь, приди, нарушь чужих людей соединённость и разобщённость общих душ», «эта женщина любит меня, но и любит меня как не любит, эта женщина любит меня, но канаты к другому не рубит»… Тодмо, макем кужмо лыдӟо вал кылбуръёссэс соку «эстрадной» шуиськись кылбурчиос: А. Вознесенский но, Б. Ахмадулина но, Р. Рождественский но.

Берло ини Е. Евтушенколэн ӝытаз мон шеди Ижевскын, филармонилэн юртаз. Нырысьсэ кылзыкум, Е. Евтушенколы 30 арес гинэ ке вал, берлозэ адӟыкум, вал ини 80 арес пала. Но солэн куараезлэн кужмыз вал сыӵе ик, егит. Ӝытэз бере кылбурчи доры лачак калык султӥз автограф басьтыны. Ми но кузпалэным матэктӥм но шуим: ми тӥледыз, Евгений Александрович, егит дыръяды Москваысен кылзӥм ай. Со книгаез вылэ гожтӥз автограф: «Моим старым друзьям. Е. Евтушенко». Кылбурчи котькуд лыдӟисьсэ, кыӵе ке но мудрон кылъёс гожтыса, келяз.

Туала критик Д. Быков алигес гожтӥз: Е. Евтушенколы сётыны луэ вал Нобель премия. Мон сямен, луэ вал сое совето аръёсы ужысь герой но карыны. Созэ но, тазэ но солы ӧз сётэ: со вал укыр советской, Нобелез сётоно ке. Сое укыр гажало вал шундыпуксён палан (Е. Евтушенко вуылӥз 110 странае), герой ним сётоно ке. Со вал азьзэ-берзэ учкисьтэм, «эрико» кылбурчи. «Я гласность выгрызал из глыб Главлита», — гожтӥз Евтушенко цензураен кусыпъёсыз сярысь.

Александр Шкляев

Удмурт Дунне
By Удмурт Дунне Апрель 1, 2017 17:03