Ваньмы — Быдӟым ожлэн историезъя тестэ!

Удмурт Дунне
By Удмурт Дунне Апрель 20, 2017 14:27

Радъясьёс чакламъя, та тестэз кунамы 300 сюрс пала мурт гожтоз.

22-тӥ апреле 11 часысен Быдӟым ожлэн историезъя тест гожтыны луоз. Удмуртиын со понна усьтозы 20-лэсь трос интыос. Ужрадын эскерыны луоз элькунмылэсь историзэ тодэммес но.

Юанъёс дасязы Москваысь Ломоносов нимо кун университетысь тодосчиос. Ӝыны час куспын 30 юанлы валэктоно луоз. Шаермылэн историезъя 20 юанэз дася Историяя, кылъя но литературая Удмурт институт Удмуртиысь Тодосчиослэн огазеяськонэнызы ӵош.

Та ужрад Кун Дума бордысь Егитъёслэн парламентсы кичӧлтэмъя «Котькуд нунал данъяськисько Россиен» проект улсын кыкетӥ арзэ радъяське. Асьме дорын сое ортчытоз Удмуртиысь Егитъёслэн парламентсы.

— Пиналъёс мед тодозы но валалозы Быдӟым ожлэсь историзэ, — шуэ Удмуртиысь Егитъёслэн парламентсылэн тӧроез Сергей Колегов. — Туэ ми малпамы акциез паськытатыны но Удмуртия сярысь юанъёс пыртыны. Тест бере одно ик  йылпумъянъёс лэсьтомы, соосъя быгатомы Россилэсь но Удмуртилэсь историзэс дышетон программае ватсанъёс ӵектыны.

Радъясьёс чакламъя, та тестэз кунамы 300 сюрс пала мурт гожтоз. Кылем арын 230 сюрс мурт пӧлысь 60 процентэз шонер валэктонъёс сётӥз.

22-тӥ апреле тестэз ортчыны луоз «Котькуд нунал данъяськисько Россиен» (http://кдгр.рф/) вотэс бамын яке нимаз площадкаосын: Удмурт кун университетын,  Ижысь техникая кун университетын, Шаркан но Эгра ёросъёслэн администрациосазы, Эграысь школаосын, Балезиноысь Спортъя юртын, Удмурт кун университетлэн Можгалась филиалаз. Уно площадкаос ужалозы Камбаркаын, Воткинскын, Сарапулын.

Йылпумъянъёс лэсьтэмын луозы мае.

Елена Рябина

Удмурт Дунне
By Удмурт Дунне Апрель 20, 2017 14:27