Урод мылкыдэн нюръяськон амалъёс

Удмурт Дунне
By Удмурт Дунне Апрель 17, 2017 10:30

Ӝӧк вылады котьку медло емышъёс, бакча сиён.

Тулыс-сӥзьыл, куазь воштӥськон вакытэ, улӟо лулсэр висёнъёс, юн муртъёсты но куд-ог дыръя керӟегъяськон куасалтэ. Урод мылкыдэн нюръяськон амалъёсты дэмла «Психолог-плюс» элькун центрысь психолог София Гунина.

Югыт: уж дурады но коркаяды югыт мед луоз. Эн азьтэмске, ужакуды, кылсярысь, нуназеян вакыт, юмшаны поталэ. Инбам пилемъёсын возъяськемын ке но, урамын, юрт пушкын сярысь, югытгес. Шутэтскон нуналъёстэс инкуазьын ортчытъялэ.

Сиськон: ӝӧк вылады котьку медло емышъёс, бакча сиён. Яркыт буёло емышъёс — гордкушман, горд перец, апельсин, банан — урод мылкыдэз улляны юрттӥсь витаминъёсын узыр.

Ческыт зынъёс: бергамот, кориандр, анис, базилик, роза, бутник (мята), лаванда зынъёс мылкыдэз ӝуто. Озьы ик буйгатозы турын-куар, имбирь, легезьпу чайёс.

Чебер суредъёс: тырше асьтэдыз чебер, яркыт буёлъёсын котыртыны. Коркадэс яркыт арбериосын — штораосын, миндэръёсын, ӝоккышетъёсын, суредъёсын — тырмытэ. Мылкыдэз ӝуто горд, ӵуж но нап-ӵуж буёлъёс. Гань-гань каре но буйгатэ вожез. Дӥськутады но та буёлъёсты пыртаны тырше. Тросгес ветлэ музейёстӥ, адӟытонъёстӥ, концертъёстӥ, яратоно крезьгурдэс кылзэ.

Пумиськонъёс: эшъёстылы, тодмоостылы дырдэс висъяны эн жалялэ. Соосын вераськыса, вань урод мылкыдъёс тќлӟо.

Пӧйшуръёс: коӵышъёс, пуныос кузёзылэсь мылкыдзэс зол шӧдо. Нуналды пурысь, вӧзады валась мурт ӧвӧл ке, пуштрес быжодэс ӟыгыртэ но солы вань сюлэм висёндэс усьтэ — капчиялоз.

Гожтэт: шуак урод мылкыд кырмиз, нош сюлэмдэс усьтыны нокинлы ке — малпанъёстэс, мылкыдъёстэс кагаз вылэ кисьтэ. Бӧрысь гожтэмдэс кесялэ яке утялтыса возе. Кельтӥды ке, дыр ортчемъя солы дунъет сётыны быгатоды. Адӟоды, пушкады капчигес луоз.

Но нокыӵе амалъёсын урод мылкыддэс уллямды уг луы ке, вазиськыны быгатӥськоды психологъёслы 8-800-1008-072 уй-нунал дунтэк ужась оскон телефонъя.

Ангелина Снигирёва

Туспуктӥз А. Горбунов

Удмурт Дунне
By Удмурт Дунне Апрель 17, 2017 10:30