Ульфат Бадретдиновлэн творчествоезлэн аспӧртэмлыкъёсыз сярысь

Удмурт Дунне
By Удмурт Дунне Апрель 26, 2017 14:30

Выжыкылысь фэнтезие кӧчон

«Удмуртия» издательствоын Ульфат Бадретдиновлэн выль бичетэз потӥз. «Астэ утчан сюрес» книгае пыремын кык кузьмадёс (повесть), ньыль верос но одӥг фэнтези.

 Калыкын шуо…

Книгаез кие кутыку, нырысь ик синйылтӥськом солэсь вылтуссэ. Дизайн удысысь чакланъёсты лыдэ басьтоно ке, берло дыре «Удмуртия» издательствоын потэм книгаос огвыллем адскыны кутскизы: леттерингез (киын суредам букваосты) воштэ типовой шрифт, нош вылбаме ӵемысь Интернетысь суредъёс шедё. Таяз учыре книгалэсь пушсэ чеберма Василий Мустаев суредасьлэн графикаез: малы киын гожтэмзэ вылбаме уд потты? Туала вакытэ, Интернет жуг-жаг вӧлмыку, киын лэсьтэмез зол дунъяське.

Бичетлэн нимыз — «Астэ утчан сюрес» — ӧте кадь асьмемыз философилэн малпаськон ӧраз выйыны. У. Бадретдиновлэсь творчествозэ оглом учконо ке, со текстъёсаз ӵем гинэ пыртылэ нодъясь, улонлы дунъет сётӥсь веранъёс. «Сюреслы кулэ сюресчи» повестьлэн нимыз ик сыӵе, нош котькуд йыръетэз (главаез) малпаськытӥсь эпиграфен кутскемын: «сюрес вылын боды но эш луэ», «сюреслэн пумыз ӧвӧл, шуо», «кинлы кызьы гожтэмын». Мукет веросъёсаз но автор трос пол кутэ та амалзэ: «гогыедлэсь вылӥе уд тэтчы», «зарнилы эн синмаськы — синмыд мальдоз», «адямиез пуны шуись мурт ачиз солы кельше». «Лобась Ке» фэнтезилэн пумыз — афоризмъёслэсь колӟо: «Верам кыл зэмзэ но куддыръя ваньбурлы берытске. Сое валай ни. Верам кыл ик ыштон но вайыны быгатоз. Ваньмыз мылкыд бордысь потэ. Кыӵе мылкыдын вералод кылдэ, озьы ик со кошкоз но ас дорад берытскоз…» Тамында лэчыт веран пӧлысь валтӥсьсэ висъяны шуак уд ни валаськы.

«Калыкын шуо» — У. Бадретдиновлэн творчествоезлэн огез кужмо инъетэз. У. Бадретдинов гожъя, калыкез гажаса, калыкысь басьтэм узырлыкез кыре-буре поттэ. Башкириысь Алтау гуртысь потэм писательлэн дунне шоры учконэз шарая удмуртлыкен герӟаськем темаосты, мифологической образъёсты. Кылсярысь, «ВВ» кузьмадёсын кылдэ Башкириысь удмуртъёслэн Чакара кышномурт-утисьсылэн образэз. Мифологической дунне зол суредамын «Кучыран» веросын — ӵапак таин со тунсыко луэ, удмурт выжыкылысь геройёсты, ишанъёсты тодэ вайытэ. Лыдӟисьлы тунсыко потозы фольклорысь басьтэм тодмо «пужыос»: «Гуртоос Эгени нюке ветлыны уггес дӥсьто: пӧртмаськись инты, пе, со. Эгени пиосмуртлэн лулыз али но, аслыз мукет инты шедьтытэк, отын улэ, шуыло пересьёс». Тунсыко но кӧшкемыт суредамын кучыран тылобурдо: веросын со нимысьтыз герой луэ, адямилэсь но инкуазьлэсь кусыпъёссэс возьматэ.

У. Бадретдиновлэн огломак творчествояз зол шӧдӥське калык кылослэн но литературалэн герӟаськемзы. «Современная удмуртская проза» монографияз Татьяна Зайцева тодосчи пусъе: калыкысь басьтэм дунлыкъёс туала улонлэн хаосаз ӟеч инъет луо. Фольклор пала берытскон асьме писательёс понна — огвыллем глобальной культуралы пумит султон. У. Бадретдинов удмурт улонлэсь туссэ гинэ уг суреда — со возьматэ удмурт адямилэсь малпаськон сямзэ, осконъёссэ.

Нимысьтыз пусйыны луэ У. Бадретдиновлэсь удмурт кылэз утёнлы сӥзем чуръёссэ. Удмуртлыкез данъясь произведениос асьмелы котьку кулэ, соос уг вужмо. Кылсярысь, У. Бадретдинов яратэ геройёссэ палэнэ, мукет калыкъёс пӧлы, «куштыны»: солдатъёс, Кай шаере яке Серпухове вуыса, удмурт луэмзэс валало но дунъяны кутско. «Сапег» веросэз лыдӟыса, сюлэм шымырске, удмурт кыл понна нюръяськыны мылкыд ӝутске. Cапег кыл «пыд улын лёгемын» веранэз тодэ вайытэ: веросын но удмурт кылэз зӥбыны, лёгыны туртто кадь. Удмурт гуртэ вуэм чиновник куаретэ: «Пиналъёс школаын куспазы удмурт кылын медаз вераське». Талы пумит луэ валтӥсь герой (оскиськом, лыдӟись но): «Азьланьын, иське, номыр умоез уз луы ни? Ӧвӧл, сётсконо ӧвӧл! Министръёс лыкто но кошко, нош удмурт кыл аслаз сюлмаськонъёсыныз кыле».

У. Бадретдиновлэн кылыз паймоно кадь огшоры. Писатель трос гожъя нылпиослы, нош пиналъёслы валамон кыл утчаны кулэ, вылды. Таизлэн книгалэн кылыз — кӧс, мултэс чеберъянъёстэк. Но куддыр автор лирик луэ: геройёслэн малпаськоназы кылбуръёс кылдо яке кырӟанъёс тодазы лыкто:

Чапчара мон огнам, чапчара,

Сюлэмме валалоз Чакара.

Бурд вылаз возьыса эркынак,

Дуннеез со усьтоз котырак.

Таӵе кылбуръёсты пыртаса, автор произведениосаз кыӵе ке выль капчи шӧм пыӵатэ. Жаляса верано, У. Бадретдиновлэн книгаяз туж ӧжыт диалектизмъёс — башкир удмуртъёслэн аспӧртэм, узыр вераськетсы копак литературной кылэн воштэмын. «Ӵушъял вордӥське веньёстэк» сборникын (2007) соос тырмыт гинэ пумисько вал ай: ӟаке, ӟыр, тыкырык, кӧрыш но мукетъёсыз.

 Утчаськон

У. Бадретдинов

Вератэк уг луы книгае пыртэм «Лобась Ке, яке Дырез азьпалтон» фэнтези сярысь. Та гожтос лыдӟисез абдратыны быгатоз. Фэнтези — фантастика ӧрысь литературалэн жанрез, солэн инъетэз — мифологиысь но выжыкылъёсысь мотивъёс. «Лобась Кеын» фантастическоез тырмыт ке но, фэнтезиен сое ниманы уггес луы на. Фэнтези — со аслаз законъёсыныз но улон радлыкеныз рос-прос малпам дунне. Чаклалэ ай, вань та произведениосын дуннелэн радъяськемез рос-прос валэктэмын: Р. Э. Говард «Конан», Дж. Р. Р. Толкин «Властелин колец», Дж. К. Роулинг «Гарри Поттер», «Игра престолов» телесериал. Геройёс уло рос-прос малпам дуннеын, кудӥз соос понна валамон. Удмурт литератураын фэнтези амалэн гожъяськон алигес кылдӥз. Со кӧня ке искусственно вордэмын вал: элькун ӵошатсконъёслы, ПЕН-клублэн но «Инвожо» журналлэн тыршемзылы луыса. Озьы ке но выль произведениос удмурт литературае эрико омыр вайизы. Ульфат Бадретдиновлэн таиз ужез Елена Миннигараевалэн «Из» фэнтезиезлы матын: кыказ ик произведениосын героиняос выль улон югдурлы дышыны уг быгато, котырысьтызы дунне валантэм но сэрттонтэм-пертчонтэм йӧтэ. Кыкез ик гожтосъёс шуак быро: У. Бадретдиновлэн йылпумъянэз вань ик, но валантэм кыле валтӥсь геройлэн воштӥськон сюресэз. Мар бордын солэн вормонэз, кыӵе вал ставкаез? Валамон, фэнтези жанр авторлы эрик сётэ («уйбыртон», «зулён» жанръёс сямен), нош котькуд выжыкыллэн но аслаз чурыт куронъёсыз вань. В. Пропп тодосчи валэктэмъя, выжыкылысь геройёслэн вань юрттӥсь яке люкетӥсь функциоссы, шуг-секытъёс пыр ортчыса, валтӥсь герой одно ик ворме, кузьым басьтэ. «Властелин колец» трилогия йылпумъяське тазьы: хоббитъёс гуртазы берто, дорзы выльысь чеберске, нош «Лобась Кеысь» Света шудзэ шедьтэ нюлэс кушын, Буй вӧзын, куинь пиналэн.

«Лобась Ке» произведенилэн хэппи-энд пумыз приключенческой жанрлы тупа ке но, татын ӧвӧл рос-прос малпамын геройлэн будон сюресэз. Действиос нокыӵе логикатэк вошъясько, сцена вылэ сюро нокыӵе классификацилы тупасьтэм зэмос но малпам геройёс: Буй Ошмесов, Ке, Лӧпшо Педунь — со ик Игралась Алексей Леконцев, Пумпус — со ик Точка, Уфаысь профессор Эрнст Мулдашев, ачиз Ульфат Бадретдинов… Геройёслэн пантеоназы амалтэк сураськод. Паймонэз ӧвӧл, дыр, угось автор афоризмен буйгатэ: «Вань улон — со выжыкыл. Озьы шуо ук. Нош асьмеос  — выжыкылчиос. Котькуд адямилэн аслыз гинэ тупась мадёсэз вань…»

Бичетэ пӧртэм аръёсысь гожтэмъёс пыртэмын: 1970-тӥ аръёсы кылдэм повестьысен кутскыса тузӥ жанрен эксперименто произведениозь.  Адӟиськом Ульфат Бадретдиновлэсь утчаськонъёссэ. Выль, егит лыдӟисьёс доры кыстӥськыса, писатель ачиз но егитоме кадь. Со вакытэ ик дышем лыдӟисьёсызлы выль дуннеосты усьтыны ӵектэ. Сӥзем потэ Ульфат Шайхутдиновичлы аслэсьтыз лыдӟисьсэ шедьтыны!

Дарали Лели

Ульфат Бадретдинов: тужгес кузь сюрес — астэ ачид утчан…

Удмурт Дунне
By Удмурт Дунне Апрель 26, 2017 14:30