Сётскисьтэм егитъёс

Удмурт Дунне
By Удмурт Дунне Апрель 18, 2017 12:40

Сётскисьтэм егитъёс

Мугорез кыдатон культурая, спортъя но егитъёсын ужан политикая министерствоын сӥлы каризы пинал спортсменъёсты: тол шудонъёсъя нимысьтыз (специальной) Олимпиадае но Россиысь инвалид спортсменъёслэн 2-тӥ тол спартакиадаязы пыриськемъёсты.

Россиысь инвалид спортсменъёслэн тол спартакиадаязы пыриськем команда.

Дуннеез паймытӥз

Каракулино интернатын дышетскись Антон Шамшурин та нуналъёсы вуиз Австриысь. Отын ортчиз интернатъёсысь пиналъёс понна Олимпиада. Антон Шамшурин пичиысен анай-атайтэк кылемын. 11 аресозяз Ижысь интернатын улэм, нош отӥяз сое выжтӥллям Каракулиноысь интернатэ. Задор мылкыдо пияшлэсь сэзь бызьылэмзэ синйылтэм спортъя школаын ужась тренер Евгений Ившин. Озьы 4-5 ар куспын спортсмен вордскиз.

— Куасэн бызьылонъя секцие ваеме бере Антонлэн синъёсыз ӝуаны кутскизы кадь, одӥг тренировкаез но ӧз келля, — шуэ Евгений Ившин. — Эшъёсыз гужем каникулъёс дыръя шутэтскизы, нош со нуналлы быдэ 25 иськемез ортчылӥз. Пыдын, куасэн, питрано куасъёсын бызьылэм сяна, великен ворттылӥз. Кылем арын со Россилэн сборнояз шедиз но нимысьтыз Олимпиадае ветлӥз.

Австриысь Антон Шамшурин 3 медален (2 зарни но 1 бронза) бертӥз. Шумпотэмзэ уг ваты тренерез но. Антон шоры учкыса, интернатысь мукет пиослэн но спортэн эшъяськыны мылкыдзы ӝутӥськем. Та вакытэ Каракулино интернатысь нылпиос, куасэн бызьылонын сяна, шаерысьтымы кужмоосыз луо на футболэн шудонын но.

Зарнивуам азвесь

Шаерысьтымы инвалид спортсменъёс Ханты-Мансийске вуылӥзы. Куасэн бызьылӥзы, гурезьысь куасэн нискылазы, следж-хоккеен шудӥзы. Россиысь тол спартакиадаын Удмуртиысь команда 2-тӥ инты басьтӥз. 1-тӥ интые потӥзы Свердловск улосысь, нош 3-тӥ луизы Санкт-Петербургысь командаос.

Ветлыны шугъяськись нылпиос борды таяз учыре итӥськылӥзы ляб кылӥсь-адӟисьёс. Арня ӵоже кыстӥськем ужрадын пиналъёс нуналлы быдэ вормонъёс басьтылӥзы. Солы тужгес но шумпотэмын шаерысьтымы Инвалид спортсменъёслэн федерациенызы кивалтӥсь Виктор Кузнецов.

— Куасэн бызьылонын но следж-хоккеен шудонын Удмуртиысь команда трослы кужмогес вал ке, ӧжытак бере кылимы гурезьысь куасэн нискыланын. Ӵошатсконлы йылпумъянъёс лэсьтӥмы, азьланезлы быдэстоно ужпумъёсмес эскеримы, — шуэ Виктор Кузнецов.

Следж-хоккеен шудонэ нырысьсэ пыриськиз Алнаш ёросысь Шайтангуртын вордскем Андрей Антонов. Пинал дыръяз волейболэн шудыны яратэ вылэм, нош одӥг нуналэ янгышен усьыса, пыдыз вӧсь луэм. Школаысь тренерез сое Виктор Кузнецов доры вуттэм. Табере Андрей чидатэк вите следж-хоккеен тренировкаосты. 17 аресъем пияш тодон-валанзэ будэтэ ИжГТУ-ын.

Валентина Емельянова

 

 

Удмурт Дунне
By Удмурт Дунне Апрель 18, 2017 12:40