Шаерамы радъяськоз Галина Кулаковалы сӥзем калыккуспо марафон

Удмурт Дунне
By Удмурт Дунне Апрель 19, 2017 14:30

Галина Кулакова кылем даурысь 60-тӥ-80-тӥ аръёсы дуннеысь тужгес кужмоез куасэн бызьылӥсь вал.

Туэ 29-тӥ апреле Олимпийской чемпионкалы Галина Кулаковалы 75 ар тырме. Таин валче шаерамы чакламын радъяны куасэн ӵошатсконъя калыккуспо марафон.

Удмуртилэн Тӧроезлэсь ужзэ быдэсъясь Александр Бречалов верамъя, Москваысь но мукет городъёсысь инвесторъёс шедьтэмын ни. 29-тӥ апреле соглашение гожтыны чакламын. Шаермы узыр дано спортсменъёсын. Туж потэ: дуннеысь огез устоез марафон асьме дорын мед ортчоз, Галина Кулаковалэсь нимзэ мед нуллоз. Куасэн бызьылонэз таяз толалтэ радъяны чакламын, отчы вань улосвылъёсысь спортсменъёсты возьмало.

Марафонэз радъян шаерамы уксё но вайыны быгатоз. А. Бречалов верамъя, пыдын бызьылонъя марафонъёс ог 10-25 миллион манет вайыны быгато. Асьмелэн луонлыкъёсмы вань ужрадэз ӟеч радъяны. Москваын таӵе куазен велосипедэн уг ворттыло на, нош Ижын сыӵеос лачак ни. Калыклэн спортэн эшъяськемез потэ бере, луонлыкъёс кылдытоно, шуиз Александр Бречалов.

Куасэн сяна, чакламын пыдын бызьылонъя, Кам шурез уяса потонъя но ӵошатсконъёс радъяны. Мон дась июль толэзе ик Кам вамен уяса потыны, ужрадэз ортчытӥсьёс дась луизы ке, шуиз Александр Бречалов.

Елена Сараматова

 

 

 

 

Удмурт Дунне
By Удмурт Дунне Апрель 19, 2017 14:30