Парадэз адӟысал…

Удмурт Дунне
By Удмурт Дунне Апрель 19, 2017 15:30

Тӧролэсь ужзэ быдэсъясь Александр Бречалов Пичи Пургалась Быдӟым ожысь но ужысь ветеранъёс доры вуылӥз.

Шаерамы Быдӟым оже пыриськемъёслэн лыдзы арысь аре усе. Та дырлы 615 адями кылемын.

1919-тӥ арын вордӥськем Александра Александровна Кузнецова. 1942-тӥ арын Магнитогорске зенитчицалы дышетскыны мынӥз, нош 1943-тӥ арын Карел фронтэ 361-тӥ зенитно-артиллерийской полке шедиз. Вотэсысь бамаз Александр Бречалов гожтэ: «Лапег мугорыз понна эшъёсыз Александраез «Кнопка» шуылӥзы. Но пичи Саша-Кнопка кышкатэк уськытъяз «Мессершмиттъёсты», утиз Мурманскысь портэз». Сэзь ожмаськемез понна Александра Кузнецоваез Отечественной войналэн II степенё орденэныз, «За оборону Советского Заполярья», «За Победу над Германией» но юбилейной медальёсын пусйизы.

1945-тӥ арын бертыса, со Пичи Пургалась сберкассае интыяськиз, нош 1951-тӥ арысен, пенсие потытозяз, йӧл поттон заводын тыршиз. Ӟеч ужамез понна уно грамотаосын, дипломъёсын, «Ветеран труда» медален данъямын.

98 аресаз но Александра Александровналэн мылкыдыз уг пуксьы, быгатэмезъя со юртъер котыраз берга, киужен выре. Вань, пе, солэн бадӟым малпанэз — 9-тӥ мае Горд площадьысь Вормон парадэз адӟыны. Элькунысьтымы Тӧролэсь ужзэ быдэсъясь А. Бречалов оскытӥз, та малпанзэ быдэстыны юрттоз шуыса.

Александра Александровна улэ Мария Степановна Кузнецоваен — ичимененыз (золовка). М. Кузнецова ож лудэ ӧз ветлы ке но, ож аръёсы фронт мышкын тыршиз. Жаляса верано, туэ Удмуртиысь ветеранъёс Вормон парадэ уз пыриське. Та герӟаськемын арлыдоослэн ляб тазалыкенызы.

Шаерамы Быдӟым оже пыриськемъёслэн лыдзы арысь аре усе. Та дырлы 615 адями кылемын.

— Москвае мыноз 1 волонтёр гинэ, — вераз калыкез утён, семья но демография политикая министрлэсь ужзэ быдэсъясь Ольга Корепанова. — 2-ез кошкозы Севастополе. Соос юрттӥськозы мӧйыосты нуыны-вайыны.

Вормонлы сӥзем тросэз ужрадъёс кутскозы апрель толэзе ик. Кылсярысь, кылем арын «Вормонлэн писпуэз» акция дыръя ветеранъёс сирень мерттӥзы. Туэ но та ужзэс азьланьтозы. 21-тӥ апрельысен кутскоз «Георгиевской лента» ужрад. Лента люкылэмын луоз 40 сюрс пала адямилы. Курсантъёс но кадетъёс Ижысь Ялан ӝуась тыл дорын сылозы. 9-тӥ мае элькунысьтымы вань шулдыръяськон интыосын «Катюша» ужрад ортчоз. Нуназе бере 13 часын кырӟась-верась коллективъёс  огымысь быдэстозы «Катюша» кырӟанэз.

Сергей Захаров

Удмурт Дунне
By Удмурт Дунне Апрель 19, 2017 15:30