Николай Широбоков: Гуртоослэн йыр висёнъёссы лачак

Удмурт Дунне
By Удмурт Дунне Апрель 10, 2017 14:30

Николай Широбоков: Гуртоослэн йыр висёнъёссы лачак

Гурт удысъя но сиён-юонъя министерствоысь музъем кусыпъёсъя но будосъёсъя управлениен кивалтӥсь Николай Широбоков.

Гурт удысъя но сиён-юонъя министерствоысь музъем кусыпъёсъя но будосъёсъя управлениен кивалтӥсь Николай Широбоков дорысь калык уг бырылы. Визь-кенеш юаса, гуртоос со доры ӵем вазиськыло. Та нуналъёсы Николай Алексеевич пусъе 60 арессэ.

Тэлез воштӥз бусыен

Улонзэ куке-соку гурт удысэн герӟалоз шуыса, Николай Широбоков ноку ӧз малпалля. Эгра ёросысь пичи гинэ Кураш гуртын 4 аресозь улыса, тракторез но ӧй адӟылы, шуэ. Отӥяз семьяеныз ӵош Чутыре выжиз. Быдэ вуонэз лесничествоен артэ ортчиз. Соин но весь малпалляз: будӥ ке, лесник луо. Свердловскысь институтэ но со понна пырыны ӧдъя вал. Но мыныны кыдёкын, 3 нылпи пӧлын огназ пи — озьы мумиз-бубизлэн экезэс лэземзы ӧз поты.

— Гурт удыс монэ ас бордаз кыскиз,  Украинаысь Полтавской улосын службаме нуыкум,  — вера Николай Алексеевич. — Таба кадь вольытэсь бусыоссылы, сьӧд-сьӧд сюйзылы пайми. Татысен мон нырысьсэ адӟи кукурузаез. Удмуртиын сое уггес будэто на вал. Нош татын пушказ пырид, дасо метр мынӥд ке, йыромод. Ӝуждалаез кык метрлэсь ортче. Соку малы ке асьмелэн шаермы понна кӧт ӝож луиз, малпай: эх, асьме бусыосамы но таӵе ик ӟеч кукуруза будэтэм потэ, малы меда инкуазьмы уг тупа?

Армиысь берытскемез бере Николай Широбоковез «Чутырский» совхозэ ужаны  ӧтизы, спортъя методист луод, шуизы. Но бусыос шоры учкылэмъёссэ адӟыса, совхозэн кивалтӥсь Юрий Иванович Наговицын егит пиосмуртэз агрономе дышетскыны ыстӥз. Сӥльвиро, капчи мылкыдо адямиез Ижысь гурт удысъя институтын ӝог синйылтӥзы — спортэ кыскыны кутскизы. Озьы егит мурт бадӟым спортэн эшъяськиз. Совето Cоюзэз котыръяз, капчи атлетикая пӧртэм ӵошатсконъёсы пыриськылыса, трос медальёс утӥз, спортъя мастер луиз. Отӥяз но вормонъёсыз бадӟымесь луысалзы на, вылды, но Николай Алексеевич шуэ: 3-тӥ курсын дышетскыкум, кышнояськи, семьяелы бадӟымгес саклык висъяно кариськи. Дышетсконзэ йылпумъякуз, Николай Широбоков атай но луиз.

— Монэ колхозын соку ик валтӥсь агрономе пуктӥзы. Азьвыл ик сюлмаськытэ ни вал тысь куасьтон но шертон комплексъёслэн ляб луэмзы. КЗС-тэк кыдёке уд вуы шуыса, нырысь ик та ужпум борды басьтӥськи. Котькуд агроном малпаське кидыс дасян сярысь, собере ни фураж лэсьтон пумысен йырзэ тӥя. Шаерысьтымы юн хозяйствоосты котыръяно кариськи, кытын умой КЗС шуыса, чаклай. Республикамылэн палэназ но потай. Колхозысьтымы кивалтӥсьёс но сюлэмшугме валазы. Озьы дэмен комплексъёсты воштон-юнматон борды басьтӥськимы. Уката ик 1986-тӥ арын бусыосысьтымы 6 сюрс тонна ю-нянь калтӥмы, котькуд гектарысь 26 центнер люкаськиз. Тамындаез ноку ӧй вал. Со ар быдэс шаермы понна туж умой вал. Соку хозяйствоос 1 миллион 400 сюрс тонна ю тысь люказы. Малы мукетъят таӵе лыдпусозь сузьтӥськыны ӧз луы ни? Та юан мыным маза ӧз сётылы. Тодосчиосын кенешылӥ, таӵе малпанзэс шараязы: бадӟым урожай басьтэммы герӟаськемын Чернобыльысь атом электростанция пуштэмен, радиацилэн бервылъёсыз, пе, со. Кин тодэ, оло, зэмен но со шӧдӥськиз.

Туннэ Николай Широбоков сюлэмыз вӧсь луыса учке аналтэм бусыос шоры.

 

Кыл вылаз  юн сылэ

Совхозысь ужпумъёсты радъяны быгатэмзэ адӟыса, Николай Широбоковез кивалтӥсьлы воштӥсе юнматӥзы. Софья Эльфатовна кузпалыз но артэ ужа, кыксы но дышетскемзыя агрономъёс. Ӵапак со вакытэ ӟеч кусыпъёс тупатэмын вал мувӧй поттӥсьёсын. Чутыр котырын гинэ ог 600 скважина инъямын вал уго, соос ялан пасясько, мувӧй лапак кисьтӥське. Музъемез умоятонъя уж нуон сярысь мувӧй кыскисьёсын кенешыны быгатӥз. Озьы удобрениос тросгес вуыны кутскизы. Со сяна, мувӧй кыскись компания гуртысь улон-вылонэз умоятонэ пыриськиз.

— Уж пӧзе, Чутырысь нокытчы кошкеме уг поты вал, — тодаз вае Николай Алексеевич. — Но 1995-тӥ арын кузпалме Кун Кенеше ужаны басьтӥзы. Али Софья Эльфатовна Кун Кенешлэн Тӧроезлэн воштӥсез, Бюджетъя, вытъя но коньдон ужпумъёсъя ялан ужась комиссиен кивалтэ. Кышное мон понна котьку тужгес бадӟым данъяськонэ вал. Та улонын ог-огедлы ӝутӥськыны юрттоно. Зэм, ӝыны ар нимаз улӥм ик. Азбар тыр пудо вордӥськом вал. Скал, пороз, чипы-курег — ваньзэ куштыса уд кельты. Соин ик скалме но ачим ик кыскылӥ. Али но, Ижын улыса, кролик но, индоутка но, ӵӧж но возисько. Юртъер котырын бергаку, сюлэм но, мугор но шутэтске. Нош зарезь дурын, экскурсиын сэректӥсько гинэ. Туала вакытэ магазинысь котьма басьтыны луэ. Озьы ке но мыным ческытгес потэ ас киыным будэтэм картошка, кушман, кубиста, сугон. Ваньзэ тае асьмелы но, нылпиосмылы но сиымон мерттӥсько. Собере, мон пушкын агроном улэ на, бакчаямы пӧртэм эскеронъёс ортчытъяны яратӥсько. Пичи кесэг вылын бергаме министерствоын ужаны но юрттэ. Ужан технологиос воштӥсько ке но, огъя тодон-валан, гырон-кизён дыр азьвылэз ик кыле.

 

Капчиез —   гур вылын

Кыӵе но ужпумъёсын Николай Широбоковлы уг вазисько. Бусыосты страховать карон, музъемен ужам понна субсидия басьтон, пайёсты ас вылазы гожтон — гуртоослэн йыр висёнъёссы лачак. Документъёсын вырон туж трос дырез быдтэ, куддыр йыр ик поромыны кутске, шуэ кивалтӥсь. Кыӵе ке ужъя судэ вазиськыкузы но, гуртоос министерствое, визь-кенеш курыса, лыкто.

— Уг вунэтӥськы ни 2010-тӥ арез, — веранзэ азинтэ Николай Алексеевич. — Куазь туж кӧс улэмен, ёросъёсын оглом ог 300 сюрс тонна ю-нянь быриз. Со сяна, пудо сиён котькуд йырлы 10 центнер гинэ люкамы, нош кулэ 25. Мар кароно хозяйствоослы? Юрттэт ӧз сётӥськы ке, воксё лябӟозы ук. Москвае, со пумысен олокӧня пачка документъёс люкаса, мынӥ. Документъёс пӧяськытэк лэсьтэмын шуыса возьматон вылысь котькуд ёросысь, котькуд бусыысь сямен туспуктэмъёс сьӧрам кутӥ. Ярано коть, ваньзэ сое дыраз лэсьтыса вуттӥмы. Быдэс толэзь ӵоже Россиысь Гурт удысъя министерстволэн кабинетъёсысьтыз ӧй поталля. Туспуктэмъёсты лупа пыр учкылӥзы, ява, кыӵе культура отын будэ шуыса. Пӧяськыса юрттэт басьтыны малпаськомы кожало вал, лэся. Егит нылаш шуэ: тӥляд татын йыды гожтэмын, нош туспуктэмъя кельше сезьылы. Мон шуисько: сезьы ӧвӧл со — жаг (овсюг), кӧс дыръя йыды быре, нош овсюглы номыр кышкыт ӧвӧл — ӝужа. Нылаш ялан аслэсьтыз ӵоге. Ярано, кивалтӥсез туспуктэмез учкиз, мыным дурбасьтӥз. Соку быгатӥ секыт югдуре шедеммы сярысь вераны. Гуртоослы 1 но ӝыны миллиард манет тыр юрттэт портыны быгатӥмы. Кыӵе мон капчияк шокчи!

Туннэ Николай Широбоков сюлэмыз вӧсь луыса учке  аналтэм бусыос шоры. 1990-тӥ арысен 400 сюрс гектар кизиськемысь дугдӥз. Али ёросъёсын вераськон мынэ, выльысь гырыны мед кутскозы шуыса. Миым 5 хозяйство та уж борды басьтӥськиз. Уногес бусыос кизиськизы ке, ганяк карисько, шуэ Н. Широбоков.

— Хозяйствоын ужакум, нылпиосмес ӧй адӟылы. Вазь ӵукнаысен бер ӝытозь бусыысь ӧй пыралля. Али пиналъёсмылэн нылпиоссылы вань шунытме сётыны вырисько. 3 кузя соос милям. Куддыръя юало: семьяяды кудды кузё, тӥ яке кузпалды? Валэктӥсько: котькытын ог-огдэ валан кулэ, котьку небыт но капчи мылкыдо луыны тыршоно. Нош семьяосылы шуисько: мон тӥлесьтыд ваньдылэсь арлыдъя бадӟымгес, улон опытэ тросгес, соин ик ваньзы мынэсьтым кылзӥсько, — шуэ Н. Широбоков.

 

Елена Сараматова

Туспуктӥз А. Горбунов

 

Удмурт Дунне
By Удмурт Дунне Апрель 10, 2017 14:30