Можга, Грак, Алнаш ёросъёсысь куд-ог хозяйствоос бусые потӥзы ни

Удмурт Дунне
By Удмурт Дунне Апрель 28, 2017 13:48

Гурт удысъя но сиён-юонъя министрлэсь ужзэ быдэсъясь Александр Прохоров верамъя, 1-тӥ Май праздникъёсы куаж-куаж кизён борды но басьтӥськозы ни.

Соин ик хозяйствоосты косэмын бусы ужъёс дыръя ог-огзылы юрттӥськыны. Ляб хозяйствоослы та тужгес но бадӟым шумпотон луоз.

Зэм, туэ быдэс арнялы бусые беромыса потӥмы. Миым 18-тӥ апреле ик вавожъёс кизьыны кутскизы ни вал. Азьвыл аръёсы 15-тӥ апреле но луд вылэ потамъёсмы вань. Но ӝожомонэз ӧвӧл, туала вакытэ техника кужмо, воксё гырытэк соку ик кизись агрегатъёс но вань, соин ик кизёнэз дыраз йылпумъялом, шуэ Александр Прохоров. Миым гинэ хозяйствоос 680 пумо техника басьтӥзы, со пӧлысь комбайнъёс но тракторъёс — 29. Туннэ техника 92 процентлы дась, но кӧня ке дыр вань на гаражын сылӥсьсэ но тупатъяны, бусые поттыны.

Эшшо ке кылем арын тол улэ чакламлэсь 20 сюрс гектарлы уногес ю тысь кизьыны быгатӥзы. Озьыен, тулыслы ичигес уж кылемын — ваньзэ 481 сюрс гектар кизёно. Александр Прохоров верамъя, туэ ӟеч урожай басьтонлы осконъёс бадӟымесь. Лымы уго трос вал, со пумен пыӵаса-пыӵаса музъеме люкаськиз, эшшо ке зор-кот усиз на. Кизем культураослы со туж кельышлы. Дасям кидыс пӧлысь 86 процентэз ӟеч, кылем арын сярысь, со 7 процентлы тросгес. Миым уго куазь кӧс улӥз, ю-нянь кеносъёсы кӧсын пыриз, толзэ пурысьтатэк потӥз, озьыен, со рос-прос ӝужаны кулэ. Урожаез будэтон вылысь туэ хозяйствоос уногес удобрение но басьтыны тыршизы. Озьы шорлыдын одӥг гектаре 14,9 килограмм понымон минерал суретъёс дасямын. Но та лыдпус йылоз на: та нуналъёсы  хозяйствоос кидыс басьто на, шуэ Александр Аркадьевич.

Бусы ужъёсты ӟеч ортчытон вылысь хозяйствоослы субсидиос дыраз люкылэмын вал. 791 миллион манет юрттэт вуэмын ни.

Туэ министерство бадӟым саклык висъяны медэ будосъёсын вырись хозяйствоослы. Ю-нянь будэтэм сяна, пудо сиён но тырмыт но ӟечлыко дасяны кулэ уго. Туннэ шаерамы скалъёс 129 сюрс лыдъясько ке, 2020-тӥ арозь лыдзэс 156 сюрсозь будэтоно. Туэ чакламын 750 сюрс тонна йӧл кыскыны. Таин валче   чакламын усьтыны нимысьтыз лаборатория, со пудо сиёнлэсь ӟечлыксэ эскеронэн выроз.

Но эскерон бордын гинэ ужпум ӧвӧл. Урожай ӟеч ке но, куддыръя сое утялтыса ум вуиське — я зоръёс, я лымы люкетэ. Соин ик хозяйствоосты косэмын бусы ужъёс дыръя ог-огзылы юрттӥськыны. Ляб хозяйствоослы та тужгес но бадӟым шумпотон луоз. Александр Прохоров верамъя, кӧня ке ужез огдыре быдэстыны 3,5 сюрс быгатӥсь пичи тракторъёслы кулэясько. Югдурысь потон вылысь Ижын кутскемын бичаны сыӵе трактор. Туэ июне шаермылэн Бусы нуналаз нырысетӥ поттэм тракторъёсты возьматозы ни. Азьланяз чакламын араз 45 сюрс трактор поттыны, шуэ Александр Прохоров. Мукет улосвылъёсысь но сое басьтыны мылкыд карисьёс вань ни.

   Елена Сараматова

Туспуктӥз В. Беломорских

 

Удмурт Дунне
By Удмурт Дунне Апрель 28, 2017 13:48