Ижын ортчиз тазалыклы сӥзем форум

Удмурт Дунне
By Удмурт Дунне Апрель 18, 2017 11:00

 Таӵе ужрад 15-тӥ ползэ радъяськиз ини Кун Кенешысь Тазалыкез утёнъя, демография но семья политикая ялан ужась комиссилэн но «Огъя Россия» партилэн кичӧлтэмзыя.

Ижысь арлыдоос пыриськизы тазалыклы сӥзем форуме.

Таӵе форумъёсын тазалыксэс эскерыны быгатӥзы ни 10 сюрслэсь ятыр адямиос. Одӥг нунал куспын 8 специалистъёс дорын — кардиолог, эндокринолог, онколог, стоматолог но мукет — эскериськыны луэ. Адямиос асьсэос Кун Кенеше вазисько ни, ёросазы но врачъёс мед вуылозы шуыса. Таиз форум Ижысь Первомай ёросысь арлыдоосты  люказ.

— Ижез басьтоно ке, завод котырын улӥсьёслэн шокан ёзвиоссы висьыло, Ленин ёросын улӥсьёслэн ӵемгес кӧтпуш висёнъёссы шараясько, — вера Кун Кенешысь депутат Светлана Кривилёва. — Ӵапак ёрослэсь аспӧртэмлыкъёссэ лыдэ басьтыса, тыршиськомы ӧтьыны  сыӵе врачъёсты, кудъёсызлы кулэяське калык.

Туэ понна та нырысетӥез ужрадмы, но ар ӵоже со радъяськоз на ог 7-8 интыын.

Форумлэн бадӟым кулэлыкез сярысь вераз  Кун Кенешлэн Тӧроез Владимир Невоструев:

— Таяз арын ми элькун бюджетысь коньдон чотын нимысьтыз машина басьтыны чакласькомы.  Удмуртиын улӥсьёс быгатозы лек пыктосэн герӟаськем эскеронъёс пыр ортчыны, рентген лэсьтыны. Со машина поталоз пӧртэм ёросъёсы. Угось асьмелэн вань сыӵе интыос, кытын, кылсярысь, маммография лэсьтон понна мукет ёросъёсысь больницаосы ветлоно луэ. Нош та машина луонлык сётоз специалистъёс дорын эскериськыны, кыдёке потатэк.

Висёнъёсты алон сярысь лекция кылзэмзы бере арлыдоос врачъёс доры дыртӥзы. Кӧня ке час куспын вирзӥбетсэс, вирысьтызы сакырзэ мертазы но трос мукет эскеронъёс пыр ортчизы.

Нина Дитятина кардиолог доры визь-кенеш юаны лыктэм. Больницаысьтымы врачмы  кызьы эмъяськоно рос-прос ӧз валэкты, шуэ со. Нош татысь специалистъёс ваньзэ умой-умой веразы. Туж кельшизы ваньмыз врачъёс. Таӵе ужрадъёс луизы на ке, одно ик выльысь лыкто, пе.

Ангелина Снигирёва

Удмурт Дунне
By Удмурт Дунне Апрель 18, 2017 11:00