«Эрмитажзы» асьсэлэн. Полякъёс тодо, маин туристъёсты гочатоно

Удмурт Дунне
By Удмурт Дунне Апрель 18, 2017 15:26

Наукая но культурая ӝужыт дворец.

Ноку ӧй малпалля, Польша Россилэсь зол висъяськыны быгатэ шуыса: полякъёс — славян калык, озьыен, ӟучъёслы матын луыны кулэ кадь. Но Варшавае но Вроцлаве вуылыме бере малпанэ воксё воштӥськиз.

Сюресъёс нуо наукае

Кыкетӥ дунневыл ож дыръя Варшава музъемен ӵошкытатэмын вал, шуыны луэ. 1939-тӥ арын городын 1 миллион 300 сюрс адями лыдъяськиз ке, ож аръёсы 850 сюрсэз быдтэмын вал. Ож бере Варшаваез быдэс Польша «ӝутыны юрттӥз». Одӥгъёсыз ужазы городлэн паллян люкетаз, мукетъёсыз — бураз. Соослэн вылымтэ кыӵе ке огъя планзы, соин Варшавалэн туннэ но ӧвӧл огъя центрез.

Нош война дорозь озьы ќй вал: Варшавае нырысьсэ вуись купецъёс котьку тодӥллям, вань сюресъёс базар доры вуттозы шуыса. Ӵапак базар интыяське вылэм кар шорын, со бордысь, шунды сиос сямен, пӧртэм палъёсы сюресъёс кошко вылэм. Ульча нимъёсъя тодылӥзы, кыӵе урамын маин выро: огаз сур пӧзьто, мукетаз нянь пыжо…

Кыкетӥ дунневыл ож дыръя Варшаваын тужгес бадӟымез гетто вылэм. Али со интыын коркаос сыло. 1939-тӥ арын Польшалэн шоркараз улӥсьёс пӧлысь 30 процентэз еврейёс вылӥллям — быдэс дуннеысь тужгес бадӟым диаспора. Соин ик геттозы но бадӟым вылэм — 307 гектар. 1943-тӥ арын фашистъёс геттоез быдтыны малпазы. Еврейёс восстание ӝутӥзы. Соку немецъёс пуштытӥзы Варшаваысь тужгес бадӟым синагогаез. Али со интыын сылэ чебер туала юрт, сое 39 ар пуктыны моктӥськиллям: отын ялан шудтэм учыръёс, тылпуос луылӥллям.

Сомында шуг-секытъёс но курадӟонъёс пыр потыса, Варшава ӧз ышты аслэсьтыз тусбуйзэ, быгатӥз Европаысь огез чебер город луыны. Экскурсоводмы шуиз:

— Варшаваысь шайвылъёсын ватэмын 22 сюрс пала адями. Тросэз паймо, полякъёс капчи мылкыдоесь, одӥг нуналэн уло шуыса. Милемлы мукет сямен уг яра: нуналлы быдэ малпаським ке, мар татын вал, мае адӟиз татысь калык, гань-гань улыны ноку ум быгатэ.

Вроцлавысь ратуша вадьсын сылэ жугон юбо.

Варшаваын трос шайвылъёс: полякъёслэн но, еврейёслэн но, немецъёслэн но… Ваньмаз сюсьтыл пуктыло, утялтӥсько, ваньзэ чылкыт возё. Полякъёс ӵемысь  вӧсясько, ожъёс медаз ни пуроме шуыса. Нош политикаен герӟаськем югдур куназы туннэ но секыт, пе, соин ик огшоры адямиос ог-огенызы керетонтэм вылысь куспазы та темалы уггес верасько.

Озьы ке но яркыт, туала Варшава кыске бордаз туристъёсты но, студентъёсты но: Варшаваысь, Краковысь университетъёс дуннеын вылӥ дунъясько.

Польшалэн шоркарез — туж чебер, вож город. Синъёсты палёмыто уно замокъёс но дворецъёс. Троссэ паймытэ кар шорысь пальма — со улэп, ас понназ будэ. Куке но юри, эскерыны шуыса, мерттӥллям но — улӟем. Кӧня ке ар ортчыса, кивалтӥсьёслы со акыльтэм, коралтыны медо вылэм. Но Варшаваын улӥсьёс чутрак пумит кариськиллям, петиция гожтӥллям но пальмазэс утиллям.

Туннэ но та карын уд йыромы, малы ке шуоно вань сюресъёс нуо Наукая но культурая ӝужыт дворец доры.

Гномъёслэн дорзы

Вроцлав тодмо луэ дун-чылкыт Станиславлэн собореныз, озьы ик ратушаеныз (кивалтэтлэн юртэз). Ратуша азьын жугон юбо (позорный столб) сылэ. Азьвыл суд адямиез янгышен лыдъялляз ке, сое юбо доры поттазы, вань калыклы возьматъязы но жугизы. Вашкала аръёсы та юбо дорын сюлоен жугиллям пияшез, кудӥз огвакытэ 5 нылашез пумиськонэ ӧтем, нош ачиз огаз но вуымтэ.

Кылем арын Вроцлав Европалэн культурая шоркарез вал. Быдэс ар ӵоже отын калыккуспо фестивальёс, концертъёс, ярмаркаос, форумъёс ортчизы. Тросэз соос радъяськизы Вроцлавысь ярмарка ортчытъян площадьын.

Та карлэн но историяз пӧртэм бамъёсыз вылӥллям. Кылсярысь, кылем даурын 80-тӥ аръёсы кивалтэтлы пумит «Оранжевая альтернатива» огазеяськон кылдэм. Огаз пумиськоназы соос кенешиллям йыразы нап-ӵуж колпакъёсын лыктыны, ваньзы мед адӟозы но синйылтозы шуыса. Соосты зэмзэ но адӟизы, но куронъёссэс лыдэ ӧз басьтэ. Нош 18 ар талэсь азьло Вроцлавысь суредасьёс берытскизы та тема борды, бордазы итӥськизы скульпторъёс. Озьы туннэ нуналлы карын 300-лэсь трос гномикъёс «уло», ваньмыз колпакъёсын. Ӝуждалазыя соос огкадесь, ӝыны метр пала, но пӧртэм арлыдъемесь: пичиосыз но, егитъёсыз но, мӧйыосыз но вань. Кин ке анай, мукетыз атай, лэсьтӥськись, инкуазез утись… Куд-ог туристъёс соосты адӟон понна гинэ Вроцлаве кожало.

Огазеясь Шопен

Польша мыным туж яркыт но крезьгуро потӥз. Полякъёс данъясько гожъяськисьёсынызы, крезьгурчиосынызы, тодо куназы пуктэм вань киноосыз. Мактаськыса (ушъяськыса) верало, соослы «Эрмитажез», Колизеез, Прагаез адӟон понна мукет кунъёсы ветлоно ӧвӧл, соосты асьсэ дорын пуктӥзы ни шуыса. Кылсярысь, «Эрмитаж» — со Варшаваысь корольёслэн замоксы. Али со пушкын интыяськемын галерея.

Вроцлавез 300-лэсь трос гномъёс чебермало.

Крезьгурез яратэмзэс (шонергес ке, Ф. Шопен крезьгурчизэс) нимаз вератэк уг луы. Варшаваын куартолэзьысен куарусёнозь дугдылытэк ужа крезьгур салон — паркын пуктылэмын кнопкаосын ӟусъёс. Зӥбиськод кнопкаез — Шопенлэн кыӵе ке крезьгурез чузъяське, мукет скамейкаын — мукетыз… Огкылын вераса, Польшаын ӵемысь кылыны луэ Шопенлэсь гуръёссэ. Полякъёс шуо: солэн крезьгурез вань калыкез огазея. Арысь аре Польшаын ортчо солэн нимыныз калыккуспо вожвылъяськонъёс, аэропортлы солэн нимыз сётэмын.

Полякъёс Россиысь туристъёсты туж уг гажало, потӥз. 2 кафее пырамы. Кыказ но, ӟуч кылын вераськеммес кылыса, милемыз адӟымтэ-кылымтэ улсы кариськизы. Кӧня дорамы ӧтимы, ум ваньмиське ай, бергес лыктом, шуылӥзы — ӧз лыктэ.

Сюрес дуре интыяськем сиськон интыосын ке но поляк сиёнъёсты веръяны удалтӥз. Ческыт кошкиз журек в хлебе — нянь пушкын шыд но бигос — сӥлен пӧзьтэм кубиста. Озьы ик полякъёс ярато, пе, горд (гордкушманэн) но тӧдьы (сюкасен) борщез, росулэз (тыкмачен шыд), капусьнякез (щи), флякиез (скал мусэн шыд), чернинаез (ӟазег вирен шыд), пӧртэм колбасаосты, капыткаез (вуштэм картошкалэсь сиён) но мукетсэ.

Польша Евросоюзэ пыре ке но, уждунзэс полякъёс евроен уг басьто, соослэн асьсэлэн коньдонзы — злотыйёс. Одӥг злотый 14 манет пала сылэ.

Полякъёс асьсэ понна, асьсэ сюрессыя азинско, ӟуч императоръёс кивалтэм улсын кема улэмын ке но.

Елена Рябина

Удмурт Дунне
By Удмурт Дунне Апрель 18, 2017 15:26