Эрико уян

Удмурт Дунне
By Удмурт Дунне Апрель 9, 2017 17:59

Белла Ахмадулина вордскиз Москваын.

1960-тӥ ар. Москваысь Политехнической музей. Белла Ахмадулинаез быдэс зал кичабонъёсын пумита но сак кылзэ кылбур лыдӟемзэ. Туэ 10-тӥ оштолэзе поэтлы 80 арес тырмысал.

Белла Ахмадулина вордскиз Москваын. Бубиз — бигер, анаез — ӟуч. Гожъяськон сюресэз кутскиз эрико дыре — оттепель вакытэ. Та нылкышно пушказ пыӵатӥз кадь Евгений Евтушенколэсь, Роберт Рождественскийлэсь но 60-тӥ аръёсысь мукет тодмо кылбурчиослэсь сямъёссэс. 19 аресказ Белла Ахмадулина литература улонын тодмо адями вал ни. Со туж етӥз вал, ӧз кышкалля кивалтэтлы пумит кыл вераны, странаысь уллям Андрей Сахаровлы, Владимир Войновичлы но мукет диссидентъёслы дурбасьтыса,  статьяос гожъялляз. Таӵе ваменэс сямызлы луыса огвакытэ  кылбуръёссэ печатламысь дугдылӥзы.

Макем паськыт усьтӥське солэн кылбуретаз кышномуртлэн сюлэмыз. Мон шуысал, со ӟуч литератураын берпуметӥ кылбурчиос пӧлысь, кудъёсыз, кабъёсты тӥятэк, чебер, метафоричной кылын гожъяськизы.

Беллалы трос воргоронъёс синмаськыло вал, ачиз но сюлэмзэ ворсаса ӧз возьылы, отчы сюрес ӵемгес шедьтылӥзы творческой адямиос: кылбурчиос, режиссёръёс, суредаськисьёс…

— Белла паймытъя вал, укное шӧдтэк шорысь пырем чебер тылобурдо сямен, нуллэ ке но вал «Большевичка» фабрикалэсь быректэм йӧл буёло дунтэм костюмзэ, гадяз комсомол пус но йыраз тугоко выллем йырси пунэт, йырсиез сярысь вожъяськись нылъёс шуо вал, со аслаз ӧвӧл. Зэмзэ ке,  Белла кадь устоез ӧй вал — кылбурамезъя но, чебер луэмезъя но. Аслэсьтыз пӧртэмлыксэ валаса, со мукетъёсыз шоры вылӥысен ӧз учкылы. Со йырез поромытылӥз, — вералляз солэн нырысетӥ картэз Евгений Евтушенко.

Мария Векшина

 

 

 

Удмурт Дунне
By Удмурт Дунне Апрель 9, 2017 17:59