«Библиоуй» ужрадэ пыриськозы вань библиотекаос

Удмурт Дунне
By Удмурт Дунне Апрель 19, 2017 15:04

22-тӥ оштолэзе шаерысьтымы библиотекаос, музейёс, книгаен вуз карись магазинъёс пыриськозы быдэс Россиын ортчись «Библиоуй» ужрадэ.

Туэ ужрадъёсын бадӟым саклык висъяськоз инкуазез утёнлы.  Со сяна, эскериськозы библиотекае калыкез кыскон пумысен туала амалъёс. Акциос ортчозы ӵукнаысен бер ӝытозь.

Ижысь Г. Красильниковлэн музей-квартираяз берозь луозы экскурсиос, вераськонъёс, «Тылобурдо» литературной клублэн пумиськонэз.

Удмурт кун университетлэн библиотекаез — визь-сынан шудонъёс, серемес веранъёс, концерт.

Национальной библиотекаысь лулчеберетъя но калыкез югдытонъя отделэн кивалтӥсь Надежда Зорина верамъя, шаерысьтымы валтӥсь библиотека 4 интыын ужрадъёс ортчытоз, ваньмыз соос сӥземын луозы дуннеез котыръянлы.

 Металлургъёслэн городокысьтызы библиотекае ӧтё шуръёс кузя байдаркаен уяны, гурезьёсы тубаны яратӥсьёсы.

Удмурт ульчаысь архиве — квест шудонэ пыриськыны мылкыд карисьёсты. Соос сётэм мадиськонъёсъя (загадкаосъя) Ижысь памятникъёсты утчалозы. Архивын ик тодматозы пӧртэм калыкъёслэн эктонъёсынызы, сиён-юонэнызы.

Асьсэлэсь лыдӟисьёссэс озьы ик витё ляб адӟисьёслэн бибиотеказы но нылпиослэн элькун библиотеказы.

Озьы ик та акция улсын ӧсъёссэс бер ӝытозь пытсатэк возёзы вань ёрос библиотекаос, тросэз музейёс.

 Мария Иванова

Удмурт Дунне
By Удмурт Дунне Апрель 19, 2017 15:04