Арлы быдэ 800 сюрс адями ас мылкыд каремезъя улонысь кошке

Удмурт Дунне
By Удмурт Дунне Апрель 18, 2017 10:22

Ма каре пинал анай-атай адӟымтэ дыръя?

Со сярысь верало Дуннеысь тазалыкез утёнъя огазеяськонлэн эскеронъёсыз.  Озьы котькуд 40 секундэ 1 мурт быре. Таин валче Кун Кенеш чакла Кун Думае законопроектэн вазиськыны.

Роспотребнадзорлэн лыдпусъёсызъя, 2013-тӥ арын Россия Европаын нылпиослэн асьсэды быдтэмзыя нырысетӥ интые потӥз. Лулсэр висёнъёсъя элькун больницалэн валтӥсь врачез Юрий Каменщиков верамъя, миым шаерамы 600 мурт ассэ быдтӥз, та пӧлысь 18-эз — нылпиос. Улонэнызы ӵемгес люкисько гуртысь юись семьяосысь  15 арессэс ортчем пиналъёс. Бадӟымъёс пӧлын сопал дуннее ӵемысь кошко курытэныз эшъяськись шоро-куспо арлыдо кышнояськем воргоронъёс.

Кун Кенешысь Тазалыкез утёнъя, демография но семья политикая ялан ужась комиссиен кивалтӥсь Светлана Кривилёва верамъя, туала вакытэ котькуд гуртын сямен Интернет вань. Адямиос воксё малпаськытэк гожто-возьмато шимес учыръёсты, верало, кин кызьы ассэ быдтэм. Валамон ни, нылпиос сое ваньзэ лыдӟо, адӟо, со косон кадь луэ.

— 1980-тӥ аръёсы Австриысь метроын асьсэды быдтӥсьёслэн лыдзы йылӥз. Таин валче 1987-тӥ арын эскерон ортчытоно кариськизы: чугун сюрес вылын шудтэм учыръёс сярысь вератэк-возьматытэк улом, шуизы. Толэзь ортчыса, метроын бырисьёслэн лыдзы 3 поллы кулэсмиз. Со дырысен Австриын алэмын асьсэды быдтӥсьёс сярысь возьматыны, — шуэ Светлана Кривилёва.

Таин валче ялан ужась комиссия законопроект дасяз федерал законъёсы воштонъёс пыртон ласянь. Кылсярысь, дэмламын пресса азе алон пуктыны:  улонэн люкиськон учыръёсты возьматъямысь дугдоно. Сыӵе ужрад кутыны чакламын Интернетъя но. Юрий Каменщиков но шуэ: макем ичигес верамы юзырес учыръёс сярысь, сокем шергес соосын пумиськомы, тазагес луомы. Проектэз Кун Кенешысь депутатъёс эскерозы апрель толэзе сессиын.

Елена Сараматова

Туспуктӥз А. Горбунов

 

Удмурт Дунне
By Удмурт Дунне Апрель 18, 2017 10:22