Альберт Разин: Куректӥсько, «Дарт» газет удмуртлыклы пумит ужа шуыса

Удмурт Дунне
By Удмурт Дунне Апрель 11, 2017 09:55

Огез «Дарт» номермы потэм бере, ми доры философлэсь Альберт Алексеевич Разинлэсь гожтэт вуиз. Тодосчи аслэсьтыз сюлэм висёнъёссэ вера, дэмласьком тӥледлы но тодматскыны соосын но эчешонэ пыриськыны. Котькуд лыдӟисьлэн малпанэз милемлы дуно. Ӧтиськом кенешонэ.

Мария Векшина

 Гажано Мария Векшина!

Тон сюлмаськиськод «Дарт» газетэз умоятон понна. Оскы, Мария, мон но сюлмаськисько. Тынад будӥсь егитъёсмес адӟемед потэ быгатӥсен, визьмоен. Оскы, Мария: мынам но соосыз песятайёсмы кадесь ик жадёнэз валатэк тыршисесь, асьыкесь (открытоесь), чидасесь, намыслыесь (сообразительноесь) адӟеме потэ. Будӥсь удмуртъёс удмуртлыкоесь (йӧноесь, адямилыкоесь) мед луозы, шуыса, уен-нуналэн куректӥсько. Озьы ик куректӥсько, «Дарт» газет удмуртлыклы пумит ужа шуыса. Зинаида Рябинина, валтӥсь редактор, «котырес ӝӧк» сьӧрын, куать ар ӵоже гожъямдэс эскерыса кенешыкуды, шонер пыкылэм: «Осконъёс бадӟымесь вал, но ваньзы соос ӧз быдэсме».

Оскисько, «Дартэз» редколлегиды «Удмурт дунне» но Москваын потӥсь туж золэсь газетъёс кадь карыны быгатоз. Кытысь потэ осконэ? Ма, авторъёсты вольыт гожъясько, ачид но туж валамон гожъяськод, югдурез син азе пуктымон суреданы быгатӥськод.

Мар кароно «Дартэз» син шоры йӧтымон карон понна? Мар бордын ужпум? Валэктонэ таӵе: ужпум газетлэн мыдланес концепциез бордын.

Вай, улон шоры философлэн синмыныз учком но утчалом ответ таӵе юанъёслы: «Марлы, мар понна дунне вылэ вордӥське адями?», «Дунне вылысь кыӵе калыкез тужгес но данъяны луэ?», «Кыӵеесь вал песятайёсмы уно сюрс аръёс талэсь азьло?», «Малы Элькунмылэн уйпал ёросъёсысь ӧжытгес потэ творческой интеллигенция, малы бенпалъёслэн куштэм гуртъёссы но буш кылем бусыоссы уногес?», «Удмурт калык адямилыкезъя кулэс-а мукет калыкъёслэсь?», «Егитъёсмы кинлэсь адӟем карыса будыны кулэ?», «Кыӵе янгышъёс лэсьто «азинскем» кунъёсын?»

Тани, постмодернистъёс (тужгес но М. Фуко, Ж. Деррида, Ж. Делёз французъёс) асьсэлэсь улонзэс каргало, меӵак шуо: «Человек умер». Шунды пуксён палась кунъёсын, пе, адямилык быремын. Котькин ассэ гинэ тодэ, шуо. Сексуальной революциен валче но эмансипациез мыдлань валамен валче семья воксё лябӟиз, пе. Освальд Шпенглер немецлэн валамезъя, зэмос культура со – вашкала сям-йылолъёс, мифология. Шумпотӥсько: асьмелэн мифологимы но эпосмы вань, та туж бадӟым узырлыкмы. нош ӟучъёс мифология кылдытымтэенызы муртлэсь басьтӥзы, соин валче духовной улонзы сураськемын-пожаськемын (эклектика луэмын).

Европалэсь культуразэ быдтыса куштэ голландец Йохан Хёйзинга. Со тазьы гожтэм: «Культура может называться высокой, если даже она не создала техники или скульптуры, но её так не назовут, если ей не хватает милосердия (сьӧдмай мон – А.Р.)». Нош асьме духовной культурамылэсь дунзэ валасьтэм удмуртъёс кунгож сьӧрысь скульптуралы, архитектуралы, техникалы мальдо но вашкала культурамылэсь палэнтӥсько. Эшшо ке соос уг тодо: вашкалаос кутэн ветлӥллямтэ – пыдкутчанзы кулэсь вуремын вылэм. Удмуртъёс кут кутаны дышемын ӟучъёс вуэм бере – кытчы пырозы, эксэй вытъёсын шымыртӥз ук, пыдкутчан вурон куоссэс но талаз!

Удмурт цивилизация – туж но туж зол. Удмуртъёс адямилыксыя (ужез яратэмзыя, чеберез валамзыя, лякыт, сабырлы но тэрытӥськись сямзыя) одӥг калыклэсь но кулэс ӧвӧл. Кам дурын улӥсь песятайёсмы 3 сюрс ар талэсь азьло ни пӧртэм удысъёсы пыриськиллям, оломае но быгатӥллям, пӧртэм кунъёсын вузкариллям, тӧлпоё (парусо) пыжъёсын уяса, олокытчы но вуиллям. Ижкар чыпетлэн ярдураз улӥсь, песятайёсмы 1 700 ар талэсь азьло (Мазунинская культура) корт ӵыжатӥллям, чеберманъёс, ужан тӥрлык но ож тӥрлык дуриллям, музъем ужен вырыса но пудо вордыса, кӧтсэс тыриллям. Вышкыен-вышкыен вылэм чечызы, пыжем сӥльзы, кабанэн-кабанэн няньзы, кеносъёссы туллямын пӧйшур куосын. Песятайёсмы ноку мурт кужымен улӥллямтэ, лушкаськисьёссы вылӥллямтэ, гуртоос куспазы тупаса, тату, ог-огзылы юрттыса, кырӟаса-вераса, Инмарлы вӧсяськыса улӥллям. Песятайёсмылэн улэмзы сярысь Мускоысь летописьёсын гожтэмын: «Райская земля».

Та сярысь нылпиосмы мед тодозы, удмурт вордӥськемзылы мед шумпотозы, мед данъяськозы. Адямилэн асваланэз лапег, улӥ ке, Инмар сётэм быгатонэз уг усьтӥськы, уг пушйы. Со висе «этнонигилизм» шуонэн, соин валче личность уг луы, сопал дуннее кошке усьтӥськытэк, шуям бутонлы укшаса. Ас калыксэ, ас культуразэ гажасьтэм адямиез муртъёс но уг гажало.

Пётр Столыпин ас кылзэ, ас калыкезлэсь культуразэ, сямъёссэ дунъяны валасьтэмъёсты воксё быдтыса куштэ: «Народ с низким самосознанием превращается в навоз, и на нём произрастают культуры других народов».

Нош удмуртлыкез, адямилыкез но удмурт менталитетэз валасьтэмъёс егитъёсмес мурт цивилизацилэн сюресаз кожытыны выро: шулдыръяськон амалъёссы, эктонъёссы, дӥськутъёссы Шунды пуксён палъёслэн кадь мед луозы, пе.  Егитъёс возьдаськонлэсь мед, пе, куштӥськозы. Соос кожало удмуртъёс «азинскем» калыкъёслэсь бере кылемын, озьыен, пе, юрттоно азинскыны. Сыӵе «дышетӥсьёс» сярысь ӟучъёс шуо: «Дорога в ад вымощена благими намерениями» яке «Хотели как лучше, получилось как всегда».

Тани, «Гербер» праздникез мон кылдытӥ калык шудонъёсыз улӟытон понна, егитъёслы удмуртлыкез пыӵатон понна. Со йылолъёсмес, удмуртлыкмес утьыны мед юрттоз. Нош П. Поздеев продюсерлэн валамезъя, егитъёс нимаз шулдыръяськыны кулэ, соослы «выль» культура пыӵатоно, кылсярысь, дискотека. Кыӵе «выль» культура? Со выль культура ӧвӧл, со муртъёслэсь басьтэм культура ук! Дискотека со – псевдокультура. Отын вина ке ӧд юы, ӧд ке шузияськы, мӧзмыса кулод. Дискотекаын, вина юэм сяна, наркотикъёсты но вӧлдо. Дискотека меӵак удмуртлыкез быдтэ (выросъёсыныз но ритмикаеныз но), мылкыдэз гыльдым-гальдым каре. Африкаысь ваем ритмика адямиез лекомытэ. Там-тамъёс африканецъёслы юртто ожмаськон яке пӧйшуран азьын. Огпол уйбыт удмурт дискотекаын юмшамзы бере алнашъёс но пургаос, ураме потыса, ваче жугисько.Нош фольклор ӝытын шулдыръяськемъёслэн мылкыдзы гань-гань луэ, адямилыксы будэ.

Малы мурт калыкъёслэсь адӟем карод, асьмелэнэз чебер ке? П. Поздеев калык шудонъёслэсь шулдырзэс уг вала, Кавказын улысал ке, «Лезгинка» эктонэз быдтысал ни, дыр. Таӵе мыдлань вырисьёс сярысь индус Свами Вивекананда тазьы гожтэм: «Нами овладела, как чума, ужасающая мания европеизации. Когда человек начинает стыдиться своих предков – это конец <…> Народ смотрит на своё золото, как на медь, а чужеземная медь стала для него золотом». Зэм но, уноез уг тодо Константин Ушинскийлэсь визьнодамъёссэ, кылсярысь, со шуэ: «Самобытность – принцип жизни».

Вашкалазэ утисьтэм но тодӥсьтэм калык выжытэм писпулы укша. Валамон, со куасьме но быре. Тае мед валалозы вылэм Лели Дарали но солы дурбасьтӥсьёс. Солэсь «Дартлы» пӧрам концепцизэ али валэкто нимысьтыз образ пыр. Мария, син азяд пукты, ай: шуом, Ижкарлэн шор площадяз пуӵ бышкалто но, со борды вайёс думыло, вайёсаз яркытэсь шудонъёс ошыло. Со ворекъя, пиштэ, Выль арлы дасям кыз выллем адске. Нимало сое «улэп культура». Ижкарын улӥсьёс шумпото: кыӵе чебер писпу, кыӵе чебер культура! Тӥни мар выллем со кунгож сьӧрысь ваем культура.

Лели Дарали туж яратэ статьяосаз «эмодзи», «перформанс» выллем кылъёсыз пыртаны. Трос тодмэзэ возьматэмез потэ меда, оло англи кылэз вӧлмытон понна сюлмаське. Юнме. Со интые, диалект кылъёсмес мед вӧлмытысал. Туж уно тунсыко кылъёс вань, кылсярысь: «пижныр» – прямой угол; «кӧлеб» – объём, габарит. Но асьмеос соосты ыштӥськом.

Лели Дарали «западниклэн» тыршеменыз валче егитъёс ансамбльёссэс но кушем нимъёссэс англи кыллы укшась карыны шӧтазы. Ӟучъёслэн но таӵе висёнзы вань. Нош выльдӥськон (перестройка) кутскыку, удмуртъёс но ӟучъёс но фирмаоссылы удмурт нимъёс сётъяны шӧтазы вал. Таӵе сямез нош ик улонэ пыӵатоно вылэм.

Ижкар удмуртлыкез но адямилыкез кулэсмытэ. Зэмос культура возиське гуртын. Гуртоос удмуртлыкез утё но адямилыко луо: улонысь олокыӵе но шумпотон шедьто, орекъясько – тае М.Г. Худяков «романтизм» шуэ, мон «восторженно-поэтическое восприятие мира» шуисько. Гуртоослэн каръёсын улӥсьёслэн сярысь лулкужымзы золгес, но соос Гиннеслэн книгаяз пырыны уг тыршо, нокинэ мальдытыны яке азьпалтыны уг туртто. Вожвылъяськонъёс но пӧртэм конкурсъёс удмурт сямлы уг тупало. Соос – кунгож сьӧрысь ваем культура – адямилыкез уг будэто. Зэмос адями – адямилыко, со шумпотэ муртлэн шумпотэмезлы, нош вормись мурт ассэ муртъёслэсь вылӥе пуктэ, ассэ олокин кожаны шӧта. Та сярысь малпаськыны кулэ. Татын ватскемын удмуртъёслэн туж мур философизы.

Кыӵе мусо кылӥсько «агай», «эке», «ӵужатай», «ӵужапай», «ӵужкенак», «варматай», «кырси», шуыса вазиськонъёс. Эшшо та кылъёс адямиос куспын кылдыто на адскисьтэм но туж юнэсь герӟетъёс – тазьы вазиськисьёслэн кусыпсы матэктэ, лулсюлэмзы небыта, узырме.

Асьмелы синйылтоно поръёслэсь, еврейёслэсь, немецъёслэсь нылпиосын ужамзэс. Праздниказы мӧйыоссы но, покчиоссы но асьсэ кылынызы гинэ верасько, дӥськутсы но ас дӥньзылэн. Малпаськы, ай, Мария, малы Каракулино ёросын куинь чылкыт пор гуртъёс вань, нош удмурт гуртъёс ваньмыз ӟучомыны кутскемын? Поръёс кылзэс но вашкала культуразэс утё. Марий Элын 1 200 чылкыт, ӟучомымтэ пор гуртъёс, сюлэсь уно вӧсясьёссы. Йошкар-Олаын вань Ижкарын выллем ик покчи усточиослэн лицей-интернатсы. Отын ваньзы верасько пор кылын, бордоръёсысьтызы стендъёссы но пор кылын гожъямын. Озьы ик, унозэ адӟем кароно бигеръёслэсь. Кылсярысь, эскерелэ «Янарыш» газетсэс. Бигеръёс егитъёссэс шонер сюресэ кыско: ало кафеын шутэтсконлэсь, уй клубъёсы ветлонлэсь, вина юонлэсь, тамак кысконлэсь, мини-юбка нулдонлэсь, гольтыръяськонлэсь, данъяло кышетэн ветлӥсьёссэс. Эшшо таӵе тунсыко учыр сярысь верало. Бигер школаын нылпиос дышетӥсьсылы атай нимыныз верам интые, «Нафиса апа», шуыса, вазисько. Озьы кусыпсы матэгес луэ. Лели Дарали мед валалоз вал: бигеръёс, бигерлыксэс утьыса, мукет калыкъёслэсь берегес уг кылё.

Мария, паймиськоды проектъёс гожтон темаослы. Соос трос, кылсярысь: а) калык шудонъёсыз улӟытон, б) гуртэдлэсь историзэ тодон, в) аслэсьтыд выжыдэ утчан (тани, мынам анае выжыысьтыз 7 ёззэ йыраз возе вал), г) вӧсяськон интыосты но вӧсяськон писпуосты сантэманлэсь утён, д) экологиен вырон: вордскем гурттэ чылкыт возён, инкуазез кыжмемлэсь чаклан, е) вашкала историмес тодон, ж) мифологимес тодон но вӧлмытон, з) асьмеды бигеръёс «аръёс» шуо, Москва летописьёсын но Геродотлэн историяз но озьы ик нимамын, озьыен Европаысь но, Элькунысьтымы но, Азиысь но аръёслэсь (праудмуртъёслэсь) пытьызэс утчано, и) вӧлмытоно нылпиез ужась будэтон амалъёсты, к) Элькунысьтымы, Германиысь, Ирландиысь, Исландиысь, Иранысь но мукет интыосысь гордайёслэсь ДНК-зэс эскерон – огвыллемесь ӧвӧл меда? Огвыллемесь ке, удмурт историе тунсыкоесь ватсанъёс пыртоно!

Озьыен, газетлэн концепциез герӟаськемын луыны кулэ егитъёсмес песятайёсмы но песянайёсмы выллемесь будэтонэн, шуом, Трокай Борисов, Кузёбай Герд, Ашальчи Оки, Константин Яковлев, Николай Байтеряков но солэн нырысетӥ яратонэз Вера Колесникова. Вера Ивановна дышетӥсьын ужаз, синмаськымонэсь укмыс нылпи будэтӥз, соос пӧлысь куатез сюр нылпиос. Со сяна, учебникъёс гожъяз, уно пол депутат но луылӥз. Асьмелэн таӵе данъяськымон адямиосмы трос. Соос пиштӥсь личность луизы удмуртлыко луэменызы. Вордскем музъеммес, инкуазьмес, эктон-кырӟанъёсмес, сям-йылолъёсмес яратэменызы соослы тылошмеслэн мында лулкужым пыремын. Быронтэм лулкужымзы соослы юрттӥз гурезез берыктымон ужез быдэстыны. Егитъёсмы мед валалозы: асьмелэн адӟем карымон геройёсмы, кунгож сьӧрысь утчатэк но тырмымон!

***

Малпасько, йӧноесь удмуртъёслэн «Дартэз» лыдӟыкузы, ӵем дыръя (мынам сямен ик) вирзы сӧриське, дыр. Но ярам, ай, «Дартын» умоесь статьяос трос. Туж шумпотыса лыдӟи вашкала лыдпусъёс сярысь гожъямез но Пекшурысь Василий Траткановлэсь удмурт календарьзэ. Та кутсконэз одно ик азинтоно. Вашкала культурамес, вить сюрс аръем узыр историмес егитъёс одно ик мед тодозы. Газетэ мӧйыос но мед гожъялозы. Егитъёслы песятайёсынымы данъяськон мылкыд мед пыӵалоз. Юнме шат шуэмын: «Культура кутске мӧйыосыз гажан бордысен».

 Философия наукаосъя кандидат Альберт Разин

Гожтэтлэн пунктуациез но орфографиез авторлэн утемын

Туспуктӥз А. Горбунов

 

Удмурт Дунне
By Удмурт Дунне Апрель 11, 2017 09:55