23-тӥ оштолэзе калык эктонъя «Чебеляй» студия концерт пуктоз

Кылем арын студия 15 арессэ пусйиз.

Ваньзэ, малы пиналъёс дышизы ини, возьматозы 23-тӥ оштолэзе 15 часын Ижысь культурая «Редуктор» юртын «Эшъёс ке вань» программаязы.

«Чебеляйёс» ялан кыӵе ке концертъёсы, вожвылъяськонъёсы пырисько, мукет улосъёсы вуыло.

— Ар куспын ми ӧжыт выль номеръёс ум пуктӥське, но эшшо тросгес лэсьтыны быгатысалмы на, — вера К. Герд нимо гимназиысь «Чебеляй» студиен кивалтӥсь Наталья Чиркова. — Жаляса верано, уксёмы уг тырмы: ӟеч фонограммаос но костюмъёс дунтэмесь ӧвӧл. Ярам, анай-атайёс валало но юрттыны тыршо.

Кылем арын студия 15 арессэ пусйиз. Солы сӥзьыса, туж бадӟым концерт пуктӥзы, пӧртэм азьысь эшъёссэс люказы. Но сыӵе ужрадъёс туж жадьыто, трос дырез но кужымез быдто. Соин таяз концертэ кытысь ке палэнысь кунооссэс уг возьмало. Туэ программаязы, асьсэос сяна, отчы пыриськозы егит артистъёс: Константин Никитин, Наталья Буранова, Александр Ашихмин но фехтования «Удмурт данлык» студия.

 Елена Рябина