Юртъерзы мыня

Удмурт Дунне
By Удмурт Дунне Март 9, 2017 12:35

Пичи Пурга черкогуртысь Соловьёв кузпалъёс.

Пичи Пурга черкогуртысь Коммунальной ульчаетӥ ортчыку, син азе йӧтэ шудон корка кадь чебер юртъер. Корка но капка чебермамын пулэсь вандылыса лэсьтэм сяськаосын, кисьтаськись буёлъёсын ворпо буямын. Укноосы векчи-векчи вандылыса лэсьтэм чильтэръёс тыремын. Кин меда татын улэ?

Мария Трофимовна но Анатолий Кузьмич Соловьёвъёс та корказэс 1974-тӥ арын пуктӥллям. Солэсь азьвыл трос квартираё коркан улӥллям.

— Егит дыръя олокытысь но шудэз утчано ук, — ачиз сярысь востэмак гинэ вера Анатолий Кузьмич. — Вордскем Чурашур гуртысьтым, 15 арес тырмиз но, тодон-валанме будэтыны кошки Огырчиысь чугун сюрес вылын ужасьёсты дасясь училищее. Электрик луи. Соку дышетскем бере одно ик 2 арзэ ужаны косо вал. Шеди Челябинске. Быдэс Совето Союзэз котыръяно луиз. Но мынам мурт калык пӧлын, кыдёкысь шаерын улэме ӧз поты — бертӥ. Соку тросэз егитъёс Ижысь механикая заводэ ужаны интыясько вал. Мон но отчы мынӥ. 1 ар ӟоскыт патерын улыса, Пичи Пурга черкогуртэ бертӥ. Соку валай: гуртын улонлэсь номыр умоез ӧвӧл. Машаен кышнояськемын ни вал, милемлы Пичи Пурга черкогуртэ квартира сётӥзы. Ми отын 13 ар улӥм. Пичи сэрегын улыны мылкыды ӧз сузьы — куашкан калэ вуэм вуж гинэ коркаез басьтӥ. Пичи дырысеным, нокин дышетытэк, пуртэн но тӥрен ма но со лэсьтыны вырисько ни вал. Соин, лэся, бадӟым уж борды дӥсьтыса кутски. Нимысьтыз мастерское ӧй вал бере, лапас улын но мунчоын ужалляй: сяськаос вандылӥ, укноям наличникъёс тыри, соосты буяй. Коркае мынясь, шулдыр луиз. Ульчаетӥмы кошкисьёс, адӟисько, синъёссэс вошъятэк, коркае шоры учко. Кытӥ-отӥ наличник лэсьтыны косыса но вазиськисьёс луо. Но табере тазалык лябӟе ини, котьмарлы мылкыд кулэ ук.

Тау шуисько Инмарлы, улонам туж умой кышномурт сюриз, Мария Трофимовнае киужен но выре, пудо котырын но берга. Ай татчыозь весь скалэн, џӧж-ӟазеген улӥм вал, парсь пиятылӥм. Табере чипы-курег сяна ум возиське ни. Туж чаляк ортчо вылэм аръёс, Машаен џош улэммылы туэ 50 ар тырмоз ини.

Любовь Тихонова

 

Удмурт Дунне
By Удмурт Дунне Март 9, 2017 12:35