Выжы калыкъёслэн «Евровидениязы» мыноз Павел Александров

Удмурт Дунне
By Удмурт Дунне Март 31, 2017 15:36

Павел Александров вордскемын Татарстанысь Бавлы ёросын, али дышетске 3-тӥ курсын Казаньысь Н. Жиганов нимо кун консерваториын.

Выжы калыкъёслэн «Евровиденизы» туэ ортчоз 13-тӥ оштолэзе Норвегиысь Каутокейно карын. Удмуртъёсты отын возьматоз Казаньын дышетскись Павел Александров (Shoner Paul).

Та «Евровидение» туэ пырисько 8 выжы калыкъёслэн кырӟасьёссы. Удмуртъёслэсь туала крезьгур дуннезэс возьматыны мылкыд каризы вал «Малыми» рок-группа, «Мурӝол Андеграунд» хип-хоп проект но огназ кырӟась Никита Ильин. Таос пӧлысь радъясьёс бырйизы Кезысь Никита Ильинэз.

— Но Никита шуиз: кырӟанэд тынад, тон ик мын, — вера Павел Александров. — Быдэсто «Ваньмыз ортче» кырӟанме, ачим ик роялен шудо, али малпаськисько на отчы вашкала шӧм пыртыны, кубыз куара, но со виолончель выллем медам кылӥськысал. Монэн ӵош сцена вылэ потоз на «4 cheber pios» группаысь крезьгурчи Дмитрий Якимов — со я гитараен, я клавишаосын шудоз.

Павел Александров вордскемын Татарстанысь Бавлы ёросын, али дышетске 3-тӥ курсын Казаньысь Н. Жиганов нимо кун консерваториын. Бавлы удмуртъёслэн кырӟанъёссы сярысь эскерон уж гожтэ. Павел люка вашкала удмурт гуръёсты, соосты ас манерезъя быдэстэ.

Удмуртъёс та «Евровидение»  мыло-кыдо пыриськыло. 2011-тӥ арын отчы ветлӥз Silent Woo Goore группа, басьтӥз 2-тӥ инты, нош вуоно араз мынӥзы Иван Белослудцев но «4 cheber pios» гурппа,  таосыз 9-тӥе кылизы.

Вераны кулэ, выжы калыкъёслэн «Евровиденизы» нырысьсэ ортчиз 2002-тӥ арын Леуварденын, Норвегиысь Фрисландилэн шоркараз. Али та конкурс быдэс дуннеысь выжы калыкъёслы крезьгурзэс азинтыны, дуннелы возьматыны луонлык сётэ.

УД

Туспуктэм: Павел Александров

Shoner Paul — шонер удмурт пияш

 

Удмурт Дунне
By Удмурт Дунне Март 31, 2017 15:36