Висёнэз алыны капчигес

Удмурт Дунне
By Удмурт Дунне Март 14, 2017 12:28

Висёнэз алыны капчигес

Кылем арын 40 процентлы выльдэмын ӝог юрттэт сётон машинаос.

Йылпумъянъёс лэсьтэмын элькунысьтымы тазалыкез утён удыслэн кылем арын ужамезлы. Министерстволэн паськытатэм коллегияз пыриськиз Удмуртилэн Тӧроез Александр Соловьев.

Калыкез кыл вылын гинэ медаз йӧнатэ, уж вылын но со мед адӟиськоз — тазалыкез утёнъя министрлэн Алексей Чуршинлэн коллегия дыръя тазьы верам кылъёсыз аспӧртэм ӧтёнлы пӧрмизы кадь. Та понна, пе, уката юнматоно нырысетӥ юрттэт сётонэз, нимысьтыз саклык висъяно кадръёсты дасянлы, вылӥ технологиосты пыӵатонлы но калыкез таза улонэн эшъяськытонлы.

Ваньмыз та улонэ пыӵатӥське ни — докладысь со умой адӟиськиз. Озьы калык пӧлын пӧртэм ужрадъёс, кылсярысь, «Врачен поръян», таза улонэн эшъяськонлы сӥзем форум, «Кардиодесант», «Онкодесант» но мукетъёсыз ӟеч сямлы пӧрмизы. Адямиос отчы мылысь-кыдысь пырисько.

— Арлы быдэ уно калык пыриське диспансеризацие, — пусйиз министр. — Солы луыса но, малпасько, кылем арын ӧжытгес луизы сюлэм но сэр висёнъёсын, туберкулёзэн сэрен шуге-леке вуисьёс. Угось  троссэ висёнъёсты муре пыӵамзылэсь азьло шараяськом. Озьы ик  525 муртлэсь соку гинэ кырмиськись лек пыктоссэ адӟемын, эшшо ог 1 сюрсэзлы тыро-пыдогес эскериськыны косэмын.

Туэ ар сӥземын лек пыктосэн нюръяськонлы. Министр вазиськиз: висёнэз шараяно, соку-соку гинэ кырмиськыкуз! Та курон онкологъёслы гинэ ӧвӧл — вань специалистъёслы.

Вылӥ технологиосын эмъянлы берло дыре  нимысьтыз саклык висъяське. Туннэ элькунысьтымы 8 эмъян учрежденилэн талы лицензиез вань. 5 ар талэсь азьло 2-езлэн гинэ вал ай. Озьы кылем арын 3 сюрс 700 муртлы туала тӥрлыкен операциос лэсьтэмын, со валля арынлэсь 1 но ӝыны поллы тросгес. Нош 2017-тӥ арын таӵе юрттэтэз 4 сюрс 700 пала адями басьтыны быгатоз ни.

— Кылем арын элькунысьтымы тазалыкез утён удыслы пӧртэм бюджетъёсысь 21,9 миллиард манет висъямын вал, — пусйиз Алексей Чуршин. — Туэ талэсь ӧжытгес чакламын ӧвӧл. Эмъясьёслы уждун тырон радъяське Россилэн Президентэзлэн куронъёсызъя: ар пумозь со 2 поллы тросгес луыны кулэ элькунын шоро-куспо уждунлэсь. Та быдэсъяське.

Министр верамъя, эмъян удыслэн азинскемез шӧдӥське демография вылын но. 2009-тӥ арысен кутскыса, элькунамы тросгес но тросгес пиналъёс вордско. Кылем арын 21 сюрс 24 нуны нырысьсэ югыт дуннеез адӟиз. Табере утьыны быгатӥськом дырызлэсь вазь, туж пичи вордскись нуныосты но. Нылпиос пӧлын кулон учыръёс кулэсмо.

Тазалыкез утён удыслэн ужамезлы дунъет сётӥз Удмуртилэн Тӧроез Александр Соловьев. Пыкылонтэк ӧз луы:

— Россиысь вань улосъёс ужало ни эмъян удысэ инвестициосты кыскон бордын. Асьме министерство ӝега. Кылсярысь, 3 ар талэсь азьло ни вераськон вал гемодиализ лэсьтонъя центръёс усьтонэ ужбергатӥсьёсты кыскон сярысь — сюризы талы коньдонзэс сётыны дась луись инвесторъёс но. Но воз интыяз кылиз — али гинэ ужъёс азинскыны кутско кадь.

Удмуртилэн Тӧроез лыдъямъя, мукет но ужпумъёс вань. Кылсярысь, туберкулёзэн висисьёсты йӧнатонъя госпиталь пуктоно, Ижысь Ленин ёросэ поликлиника ӝутоно, инвалид пиналъёслы реабилитацияя центр усьтоно…

— 2016-тӥ арын Тӧролэн но Правительстволэн администрациязы тазалыкез утёнэн герӟаськем вазиськонъёс вуизы 1 сюрс но ӝыны пала адямиослэсь — валля арынлэсь со 15 процентлы тросгес. Пӧлазы вань оптимизациен герӟаськемъёсыз но.

Зэм, Тӧролэн лыдъямезъя, тазалыкез утён удысын озьы ик ӧжыт ӧвӧл пусйымонэз. Кылсярысь, вож нуныос, нылпиос пӧлын кулон учыръёс кулэсмизы — анайлэсь но нунылэсь тазалыксэс утёнлы азьланьын но нимысьтыз саклык висъяно, пе. Кылем арын 25 выль фельдшер-акушер пунктъёс пуктэмын — та уж азинтӥськоз туэ но. Озьы ик 40 процентлы выльдэмын ӝог юрттэт сётон машинаос, та ужез азинтыны туэ но луонлыкъёс утчалозы.

Элина Васильева

Туспуктӥз А. Горбунов

 

 

Удмурт Дунне
By Удмурт Дунне Март 14, 2017 12:28