Усьтӥськиз «П. Чайковскийлэн дор палъёсаз» 60-тӥ фестиваль

Удмурт Дунне
By Удмурт Дунне Март 13, 2017 11:30

Ижысь тужгес усто 3 егит пианистъёсты — Анастасия Ивановаез, Кирилл Храмовез но Андрей Шашкинэз — стипендиен пусйиз.

11-тӥ южтолэзе П. Чайковскийлэн Воткинскын вордскем юртаз нылпиос крезьгуро инструментъёсын шудӥзы, нош тодмо пианист Денис Мацуев «Юбилейный» культурая юртын концерт сётӥз.

«60 ар, 60 концертъёс, 60 интыос» — таӵе веранэн пумитало куноосты. Зэм но, туэ фестиваль паськыт ортче, пӧртэм интыосын концертъёс южтолэзьысен 7-тӥ куартолэзёзь кыстӥськозы.

Туэ фестивальлы сюрес усьтӥз Денис Мацуев. Дорамы со пианист сямен гинэ ӧз, стипендия сётъясь «Выль нимъёс» фондлэн президентэз сямен но вуиз. Ижысь тужгес усто 3 егит пианистъёсты — Анастасия Ивановаез, Кирилл Храмовез но Андрей Шашкинэз — стипендиен пусйиз. Кызьы верало егит музыкантъёс, та соос понна бадӟым данъет.

Ӝытсэ калык люкаськиз Воткинскысь «Юбилейный» культурая юртэ, отын Денис Мацуев концерт возьматӥз.

Фестиваль улсын вуоно концерт ортчоз 24-тӥ южтолэзе Ижысь филармониын. «Чайковский. Астэ утчан» программаен вуозы Москваысь фортепианоен шудӥсь Басиния Шульман но Израильысь сцена вылысен вольыт лыдӟиськись Йосси Тавор. 0+

УД

Удмурт Дунне
By Удмурт Дунне Март 13, 2017 11:30