Удмурт военнопленнойёслэн верамъёсынызы тодматскомы вотэс пыр

Удмурт Дунне
By Удмурт Дунне Март 29, 2017 13:34

Бернат Мункачи, венгер тодосчи, пленэ сюрем удмуртъёсын ӵош.

Туннэ, 29-тӥ южтолэзе 20.00 часын, фин-угор егитъёслэн огазеяськонзы (МАФУН) ортчытэ вебинар. Вотэс пыр меӵак эфирын тодосчи Виктор Денисов вералоз удмурт но коми военнопленнойёслэсь гожтыса кылем материалъёс сярысь.

Нырысетӥ дунневыл ож дыръя пленэ сюрем удмуртъёс но комиос доры ветлӥзы Венгриысь, Австриысь но Германиысь тодосчиос, фонографе гожтӥзы соослэсь кырӟан-веранъёссэс, улэм-вылэмзэс. Кырӟан-веранъёсты удмурт тодосчиос Будапешт, Вена но Берлин архивъёсысь но музейёсысь люказы ни. Ӵапак соосты кылыны луоз та вебинар дыръя.

— Венгриысь тодосчи Бернат Мункачи тодэ ваёнъёсаз гожтӥз вал, макем шумпотӥзы  пленэ сюремъёс удмурт кылын ваземезлы, — вера Москваысь венгер культурая центрысь ужась Ольга Урасинова. —  Со вакытысь тодосчиослэн ужзылы паймиськод: трос записьёс дасямын. Со нырысетӥ гожтэм удмурт куараос, макем воргоронъёс чын чебер удмурт кылын верасько! Огез 170 пала крезьгурез йыраз возе вылэм. Со пленэ сюремъёс пӧлысь аслэсьтыз ӵыжы-выжызэ Ипатий Коровинэз шедьтӥз Брангуртысь Ольга Туктарева. Оскеме потэ, мукет пленэ сюремъёслэн но ӵыжы выжыоосы шедёзы ай. Со зэмос узырлык, асьме зарни шыкысмы.

Лекциез учкыны луоз mafun.clickmeeting.com/denisov/register чӧлсконъя. Со азьын регистрация пыр ортчоно луоз.

Тодады вайытом, али Москваысь венгер культурая центрын ужа  «Пленысь берыктэм кырӟанъёс» адӟытон.

УД

Удмурт Дунне
By Удмурт Дунне Март 29, 2017 13:34
  • Valery Lozhkin

    ))) диктофон вылымтэ на соку — фонограф

  • Серебрянников Борис

    Жынызэнэ учкыса вуи. Землякмэ учкеме потэ вал, вань а со отын. Быдэс улонзе армиын вал.Юн чеч кырчалляз, вералляз пленын гужтылизы кыче со кырча.