Туэ кизёно 481 сюрс гектарез

Удмурт Дунне
By Удмурт Дунне Март 30, 2017 11:30

 Дасесь-а ни шаерысьтымы хозяйствоос тулыслы?

Гуртоос апрельлэн пумаз бусые потыны дасясько ини.

Гуртоос туэ лымылэсь вазь шунамзэ возьмало, апрель толэзьлэн 20-тӥ нуналъёсаз бусые потыны дасясько. Синоптикъёс верамъя, мукет аръёсын ӵошатыса, туэ лымы 1 но ӝыны поллы уногес усемын. Но агрономъёс талы шумпото. Гурт удысъя но сиён-юонъя министерствоысь музъем кусыпъёсъя но будосъёсъя управлениен кивалтӥсь Николай Широбоков верамъя, туэ музъем 5-30 сантиметр кынмемын, со трос ӧвӧл, озьыен, шуныт кариськиз ке, лымы музъеме каньылак пыӵалоз, люкаськоз, та туж юрттоз киземъёслы ӝужаны.

— Трос лымылэсь туэ кышкано ӧвӧл — сюй зол кынтэм дыръя гинэ ву ӧръяськыса бусыостӥ кошке, колеяос кылдытэ, — шуэ Николай Широбоков. — Тол улэ кизем чабей тани ассэ уродгес шӧдэ. Куазь шунтыса-кынтыса улӥз ке, музъем но лымы вискын йӧкураны быгатоз, сыӵе дыръя озимойёс дорозь омыр уз пыры — пурысьтаны  быгатозы. Нош тол улэ киземын 80 сюрс гектар.

Хозяйствоос ю кидыслы уг шугъясько. Кизьыны дасям кидыс пӧлысь 79 процентэз ӟеч. Кылем арысь та вакытэн ӵошатыса, со 12 процентлы уногес. Ӟечлыксэ умоятыны луонлыкъёс вань на. Николай Широбоков верамъя, элитной кидыс будэтонэн вырись хозяйствоосын 12 сюрс тонна ю тысь дасямын. Апрель толэзе хозяйствоос мыло-кыдо басьтӥськозы кидыс воштон-басьтон борды.

— Али хозяйствоос выро удобрение басьтонэн,  — шуэ Николай Алексеевич. —  Туэ со котькуд гектаре 11,3 килограмм понымон ни. Кылем арын сярысь,  4,2 килограммлы уногес. Тросэз валазы уго: котькызьы гыр но кизь, но музъем начар ке, урожай тырмыт уд басьты. Кылсярысь, Вавож ёросын 4-тӥ арзэ котькуд гектарысь ог 40 центнер ю тысь кутсало. Со дыре ик тысьсылэн асдуныз татын тужгес улӥын — 1 килоез 4 манет сылэ, нош мукет ёросъёсын фуражзы гинэ но 10 манет тыр усе. Та бордысь ик хозяйстволэн экономикаез но потэ. Удобрениен воксё эшъяськисьтэмъёс но вань. Камбарка олокӧня арзэ бусыосаз удобрение чик уг потты. Муоссэс сюдонлы ичи саклык висъяло красногорскъёс — сотэк но быгатомы, шуо.

Нялтас вераса, туэ удобрение, кылем арын сярысь, 6-7 манетлы дунтэмгес, нош йӧллы дун бадӟымгес. Та но юрттэ уногес удобрение басьтыны. Но куд-ог ёросъёслы соин йырин ӧвӧл ай.

— Удобрение 1 гектараз 6,2 килограмм шедьымон сяна ӧвӧл на, 3-яз хозяйствоосын со воксё басьтымтэ, — вера Балезино ёрос администрациысь гурт удысъя управлениысь валтӥсь агроном Татьяна Столбова. — Коньдонзы ӧвӧл. Али хозяйствоослэн вань поттэм коньдонзы кошке нуналлы быдэ пудо сиён ворттонлы. Пермь, Киров, Кизнер — кытчы но уг келяло машинаоссэс турынлы но силослы. Ӝыны толзэ скалъёсты сюрес вылысь сиёнэн сюдо ни. Сюресъёс но выжъёс пытсаськемлэсь азьвыл али тросгес сиён ворттыны тыршо. 1 килограмм силос понна 2,5 манет тыро. Нош 1 скаллы нуналаз со 15-16 килограмм кулэ. Лыдъялэ ай, толэзь ӵоже кӧня коньдон кошке! Эшшо ке бензин кулэ. Хозяйствоос кызьы ке чидало, пудо лыдзэс быдтытэк. Выльысь ӝутӥськыны туж секыт луоз.

Удобрение кредитэн басьто. Субсидиос вуизы ке, соин пунэмзэс берыктыны вырозы. Ми сямен ик, пудозэс басьтэм сиёнэн сюдо эграос, уваос, дэриос.

Со дыре ик Вавож ёросысь «Жуё-Можга» хозяйствоын тулыс ужъёслы ваньмыз дась ни. Котькуд аре со нырысь ик гырыны-кизьыны потэ бере, ваньмызлэсь вазь дась но луэ.

— Навес улысь техникамы 100 процентлы дась, усыосты лымы улысь 1-тӥ апреле поттом, но таосызлы сюлэм шуг ӧвӧл. Туэ нырысьсэ кизьыны ӧдъяськомы кукуруза — Америкаысь кидыс басьтӥмы. Зэм, палэнысь вайыны, асьме дорысь басьтэм сярысь, 3 поллы дуногес усе, но со понна туж оскымон. Ми чабей, йыды гинэ но Австриысь вайиськомы. Эсьма, урожай бадӟым сётэ, кӧс куазен уг быры, — шуэ хозяйствоысь валтӥсь агроном Александр Березин.

Нялтас вераса, туэ гыроно-кизёно бусыос миым сярысь 1 сюрс гектарлы паськытгес луыны кулэ. Сыӵе ужпум пуктӥз Гурт удысъя но сиён-юонъя министерство. 2020-тӥ арозь 24 сюрс гектар аналтэм бусыосты выльысь улӟытыны чакламын.

 Елена Сараматова

Туспуктӥз Александр Горбунов

Удмурт Дунне
By Удмурт Дунне Март 30, 2017 11:30