Толалтэ

Удмурт Дунне
By Удмурт Дунне Март 13, 2017 16:10

2013-тӥ ар, толсур.

Толалтэлэн нырысетӥ толэзез пумаз вуэ ни, нош мон понна гужем ӧз быры на кадь. Сӥзьыл но ортчиз. Лымы но усиз. Нош мон, вӧтын кадь, весь гужемын улӥсько.

Соку тӧдьы бубылиос быдэс музъемез басьтӥзы. Сомында вал соос! Машинаен мыныку, нырысь-валысь, пиялае шуккиськыкузы, быдэс сюлэм дыректэ вал. Чебер бубылилэн дырыз ӝог ортче. Пиялае йӧтӥськем куараез но куренялэс-ӵуж кельтэм пытьыез. Нокыӵе пайда дуннелы вайыны уг вуо кадь… Ми озьы малпаськом гинэ.

Лымы кадь тӧдь бубылиос.

2014-тӥ ар, толшор.

Кытын мон вордӥськи, отын инбам уг адӟиськы кизили пӧлысь…

2017-тӥ ар, тулыспал.

Басьтӥ бадӟым торт. «Птичье молоко». Магазинысь тортъёсты кемалась ӧй сиылы ни вал. Ӧй чида. Сии ог 100 грамм пала. Табере ӧскеме потэ. Буээээ…

Сылӥсько вал дугдылонниын, трамвай витьыса. Тортэн. Жадемын.

Светофорез возьмась машинаысь нылаш киыныз «чырткем-чырткем-чырткем!» шонтӥз.

Нырысь ӧй вала: мыным яке кинлы ке мукетызлы шона. Марысь-мар ке шуыса, ачим но шонтӥ. Со сыӵе шумпотӥз! Уг малпа вал, лэся, солы кин ке вазёз шуыса. Папаезлы мар ке вераз. Соиз но пальпотыса мыным шонтӥз.

Ми вискын вал ог 10 метр.

Нош собере вож тыл ӝуатскиз. Соос вырӟизы. Ог-огмылы ми ӟеч карим, кемалась тодмо муртъёс сямен.

Шумпотон.

Али, торт сиеме бере, укно азьын чай юисько.

Пичияк усьтӥ укноез, сайкыт омыр пыриз.

Бадӟым полицейской машина ортче.

Отын быдэс кузов тыр полицейскойёс.

«…Пропади моя тоска-а-а-а-а-а, вот он я, привет, войска-а-а-а-а…»

Быдэс урам тыр…

Шулдыр.

ДУНДУК

Туспуктӥз Е. Ардашев

Удмурт Дунне
By Удмурт Дунне Март 13, 2017 16:10