Скал кыско кырӟаса

Удмурт Дунне
By Удмурт Дунне Март 23, 2017 12:14

Скал кыско кырӟаса

Т. Петрушина скал кыскыны юрттӥськиз.

Вазь ӵукна, адямиос кӧлыку ай, скал кыскисьёс ужын ини. Ӝыт калык шутэтске ни, нош соос ужын на. 

Ӵужае, Алнаш ёросысь Шудья гуртысь Татьяна Николаевна Орлова, озьы 40 ар тыршемын. Та удысэ кутскыкуз, вань уж киын вылэм на: 8-9 скал кыскиллям, турын бусыысь ворттӥллям, ву шурысь тубытъяллям, кыскем йӧлзэс ошмес дуре сӥятыны васькытъяллям. Озьы но ӵужае уг ӝожтӥськы.

— Ужын секытэз но, капчиез но вал, — шуэ со. — Ужез механизировать карыны кутскемзы бере ми но, скалъёс но кышкатскимы. Пумен ваньмызлы дышим. Нырысь аппаратэн котькудмы 20 скал кыским, молокопровод вуттэмзы бере группаын 50 скал луиз. 1990-тӥ аръёсы телевизор пыр сериалъёс возьматъяны кутскизы. Скалъёсме нимай со сериалъёсысь нылкышно нимъёсын: Мария, Изаура, Сантана, Изабелла… Зоотехникмы весь серектэ вал: Таяпай, тынад группаяд вуисько ке, вань сериалъёс тодам лыкто.

Мынам но фермаысь улонэн матысьгес тодматскеме потӥз. Одӥг шутэтскон нуналэ ӵужапае вӧзын скал кыскисьын ужаны малпай.

4 час ӵукна. Скал кыскисьёс таӵе дыре пыд йылазы луо ини, нош мон чус-чус изисько на. Амал ӧвӧл — султоно. Кырын кезьыт омыр синмез усьтэ, изён мылкыд быре. Тём-тём пеймыт на, пыд улын лымы ӟукыртэм куара гинэ шуккиське. Ферма котырысь пиштӥсь тылъёсъя скал гид адӟиське. Гидэ пыри но, ваньмыз сямен скалъёс йыръёссэс мон пала берыктӥзы. Шорам дол учко, выль адямиез мурт каро кадь. Нош макем паймизы татчы вуэмелы дояркаос. Пиналъёсты но адӟод вылэм на таӵе ужын, шуизы.

Скалъёсты сюдӥмы, кыедзэс мычимы. Аппарат поттыса, скал кыскыны кутскимы. Палэнысен гинэ аппаратэн ужан капчи адӟиське вылэм. Угось скалъёс пӧлын  кыӵеез но  вылымтэ! Одӥгез шорам лек синмын учке, мукетыз пыдзэ ӝутка, куинетӥез быжыныз синмам сачкетэ… Чидай ведь. 2 час куспын кысконмес йылпумъямы. Сюро-быжоосмес сайкыт омырен шоканы загонэ лэзим. Со куспын нуназе но вуиз.

Но уж соин гинэ уг быры. Сюроосты азбаре уд кельты. Соосты берен интыязы пыртоно, думылоно, пызь пызьнано.
16 час 30 минутэ выльысь гуретыны ӧдъяло моторъёс: скал кыскон кутске. Дояркаос быдэсак выё ужзы пӧлы. Сак кылзӥськид ке, аппарат куарая ужасьёслэсь кырӟан гур мытэмзэс но кылод. Озьы ортчо нуналъёс бӧрсьы нуналъёс, аръёс бӧрсьы аръёс.

Таӵе ужын тазалык но чидан кулэ. Асьмелы данъяськоно сыӵе ужасьёсын.

Татьяна Петрушина,

Ижысь К. Герд нимо гимназиын дышетскись

 

Удмурт Дунне
By Удмурт Дунне Март 23, 2017 12:14