Шаркан ёросысь Пипиё гуртын выль скал гид усьтӥськиз

Удмурт Дунне
By Удмурт Дунне Март 21, 2017 12:54

Шаркан ёросысь «Исток» хозяйствоысь выль гидын скал кыско выль тӥрлыкен.

Шаркан ёросысь «Исток» огазеяськонысь Пипиё гуртын 400 йырлы чаклам скал гид усьтӥськиз. Огазеяськонын та вие 10 гидзы, со пӧлысь 4-ез берло аръёс ӵоже пуктэмын.

Ферма усьтон ужрадэ вуылӥзы гурт удысъя но сиён-юонъя министр Александр Прохоров, Шаркан ёрослэн йырыз Василий Муклин но ёрос администрациысь гурт хозяйствоя управлениен кивалтӥсь Андрей Николаев. Александр Прохоров пусйиз: кылем арын шаерысьтымы гурт хозяйствоосын 70 ферма усьтэмын вал, туэ эшшо 106-яз корка пыронъёс ортчыны кулэ.

Пипиё гурт Пушкин нимо колхозэ пыре вал. Выльдӥськон вакытэ куашкан калэ вуылӥз. Соку уж борды дӥсьтыса басьтӥськиз Фаина Ефремова. Кылдытӥз «Исток» огазеяськон. Та вакытэ со пыд вылаз султыны тырше. Кызьы вераз гурт хозяйствоен кивалтӥсь Фаина Ефремова, берлозэ выль гид татын усьтӥллям 2014-тӥ арын. Ужаны мылкыдзы вань дыръя эшшо огзэ пуктыны малпазы. Табере кысконо скалъёссылэсь лыдзэс но будэтыны чаклало.

— Лэсьтӥськон ужъёс 3 толэзь ӵоже кыстӥськизы. Кивалтӥсьёс но, гуртоос но нырысь ӧз оске вал, но гид дыраз вуиз, — шумпотэ эштос тӧро. — 14-тӥ  мартэ гидэз сӥё-дано усьтӥмы, отчы пыртэм кунян ваёно ветылъёсты кыскизы ни. Туннэ отчы скалъёсты но выжтомы. Скал кыскисьёсты но пудо сюдӥсьёсты лыдъяса, ваньмыз-ӧвӧлэз 6 ужасез луоз.

Та вакытэ хозяйствоын 1 сюрс 800 йыр сюро таза пудозы, со пӧлысь 603-ез — кысконо скалъёс. Нуналлы быдэ 8 сюрс 190 килограмм йӧл люкало, 2 дояркаос котькуд пудозылэсь 5 сюрс килограммлэсь ятыр йӧл кыско. Туала куронъёслы тупась гидын пудоос думет йылын уг сыло, эркын ветло, скал кыскыны юрттэ «Ёлочка» установка. Фермаын ужасьёс понна шутэтскон сэрег кылдытэмын, вань на компьютер кабинет, молокоприёмник. Фермаен одӥг липет улэ ик интыямын патока лэсьтыны чаклам тӥрлык. Пудо но яратэ витамино, сакырен узыр сиёнэз. Ӟеч сюдэмлэн пайдаез ӝоген шӧдскыны кулэ — йӧл тросгес кыскозы.

Валентина Емельянова

Туспуктӥз Т. Николаева

Удмурт Дунне
By Удмурт Дунне Март 21, 2017 12:54