Шаерысьтымы пудо вордӥсьёс йылпумъянъёс лэсьтӥзы

Удмурт Дунне
By Удмурт Дунне Март 10, 2017 14:48

Пичи Пурга ёросысь «Молния» эштосысь Л. Иванова но З. Севастьянова — шаерысьтымы устоосыз пудо утисьёс.

Пичи Пурга ёросысь культурая юртэ кылем арня пумын трос калык люкаськылӥз. Шаерысьтымы пудо вордон удысын ужасьёслэн кылем арын ужамзылы йылпумъянъёс лэсьтӥзы. Усто ужасьёс элькун Тӧролэн  А. Соловьевлэн киысьтыз грамотаос но таукаронъёс басьтӥзы.

Вормисьёс пӧлы шедизы Пичи Пурга ёросысь «Молния» эштосысь пудо утисьёс Людмила Иванова но Зоя Севастьянова. Отын 2 гидын 400 йыр ыж вордо. Эдэйгуртысь пудо быдэс Россилы тодмо луэмын. Сӥль но ыж гон сётӥсь выжыысь ыжъёс но такаос Удмуртиын поттэмын, соос чаляк но бадӟым будэменызы висъясько. Пудо вордон удысын 18-тӥ арзэ тырше Людмила Иванова. Асьсэ пудооссэс возьматыны Ставрополе, Калмыкие, Перме но мукет городъёсы вуылэмын. Котькуд адӟытонысь соос зарни медальёсын берто. Ваньмыз паймо бадӟым такаоссылы: 2-3 аръемъёсызлэн секталазы 140 килограммозь вуэ. 3-4 толэзьем ыжпиос 18-20 килограмм луо ини.

Та эштосын скал но вордо. Та вие нуналаз котькуд скаллэсь 23,7 килограмм йӧл кыско. Ог 15 ар пала та удысын тырше ни Зоя Севастьянова. Фермаысь секыт ужлы чидатэк, огдырлы мукет удысэ пегӟылӥз вал, выльысь берытскиз скал гидэ. Группаысьтыз 52 скалэзлы нимын-тулын вазиське, котькудзэ веша, кузяз ветлэ. Кыскем йӧлзы гумыос кузя кошке ке но, киын быдэстоно ужъёссы лачак на. Арняяз одӥг пол секыт нуналзы, пе, луэ. Соку скал кыскисьёс арнялы тырмымон 8-9 тонна пызь но 70 мешок гранулаос басьто. Озьы соос 45 килограммъем мешокъёсты асьсэос ик ӝуткано луо.

Шутэтскон нуналъёсты шер адӟыло ке но гуртоос, яратоно ужысьтызы кошкыны уг ӵыдо. Сыӵеесь со гурт нылкышноос: котькыӵе шуг-секытъёсты вормо.

Валентина Емельянова

Туспуктӥз Э. Карипов

 

Удмурт Дунне
By Удмурт Дунне Март 10, 2017 14:48