Шаерамы 34 сюрслэсь уно адями лек пыктосэн черламын

Удмурт Дунне
By Удмурт Дунне Март 22, 2017 15:00

Шаерамы 34  сюрслэсь уно адями лек пыктосэн черламын

 

Тазалыкез утёнъя министерство ивортэмъя, 34  сюрс 100 адями лек пыктосэн нюръяськонъя диспансерын учётэ басьтэмын. Миым гинэ 6 сюрс 187 муртлы рак диагноз пуктэмын.

Югдур арысь аре секытгес луэ бере, Удмуртилэн Тӧроезлэн А. Соловьевлэн указэныз туэ ар шаерамы ялэмын лек пыктосэн нюръяськонъя арен. Озьы бере, котькуд ёрос больницаын адямиосты сакгес эскерозы. Со сяна, фельдшеръёслы золгес чакласькыны косэмын. Ӵапак гуртысь фельдшер-акушер пунктъёсы уго гуртоос соиз я таиз висёнзы пумысен нырысь ик вазисько. Нырысетӥ юрттӥсьсы луэ фельдшер. Солэн чакламез-адӟемез бордысь туж тросэз потэ. Таин сэрен шаерамы али ортчо лек пыктослэсь нырысетӥ тодметъёссэ тодманъя дышетонъёс. Макем вазьгес висён шараяськиз, сокем умойгес пӧрмоз адямиез бурмытыны. Но висёнэз шараян — со ӝыны уж. Фельдшеръёсты дышетозы на адямиен огкыл шедьтыны, сое больницае ыстыны.

Ёросъёсын ужалозы шаерысьтымы онкодиспансерысь врачъёс но, соос нимысьтыз бригадаосын пыдлось гуртъёсы поталозы. Кылем арын сыӵе онкодесант 4 пол ёросъёсы потаз. Озьы эскеремын Эгра, Сарапул, Юкаменск ёросъёсын улӥсьёс. Врачъёс пыртӥ потӥз 2 сюрс адями. Туэ эскерон ужрадъёсты йылтыны чакламын. Нырысь ик санэ басьтозы аръёсын больницаосы возьматъяськисьтэм муртъёсты.

Елена Сараматова

Туспуктӥз Александр Горбунов

Удмурт Дунне
By Удмурт Дунне Март 22, 2017 15:00