Питыри но Пуштыри ортчо шаеретӥ

Удмурт Дунне
By Удмурт Дунне Март 7, 2017 16:07

Али туж паськыт вӧлмемын посткроссинг — открыткаосын но гожтэтъёсын ваче вошъяськон. Пӧртэм пумо открыткаос быдэс дуннеетӥ ветло, адямиосты, каръёсты но кунъёсты огазеяса.

 

Тросэз егитъёс уг ни тодо, мар со бумага вылэ гожтэт гожъян яке ог-огедлы открытка лэзьян. Нош мон пичи дыръям туж яратӥсько вал гожтэт гожъяны но открытка бичаны. Соин ик, дыр, ар талэсь азьло тунсыкъяськыны кутски посткроссинген. Нырысь фин-угор посткроссинген вырисько вал, сое радъяны туж мыло-кыдо кутскиз вал Луша Шихова. Но адямиос валамтэен-а, мукет муген-а та проект кема ӧз улы. Мон выжи дунне посткроссинге — postcrossing.com. Со сайтэз ог 11 ар талэсь азьло кылдытӥз Португалиысь студент. Туннэ нуналлы, та сӧзнэт пыр герњаськыса, адямиос ог-огзылы 40 миллионлэсь ятыр открытка ыстӥзы ини. Выль тодмоосылы мон яратӥсько удмурт шӧмъем открыткаосты лэзьяны, малы ке шуоно соос возьмато мынэсьтым лулпушме но калыкеным данъяськемме.

Кылем арлэн пумаз Комиын малпаллям «Дуннеез котыръясь открытка. Коми» акциез. Со сярысь мыным ивортӥз Андрей Соловьёв — «Монами» дизайн-мастерскойысь усточи. Милемлы та малпан туж тунсыко потӥз, соин ик та акциез Удмуртиын но радъян борды басьтӥським. Дизайнеръёс лэсьтӥзы туж чебер открытка. Валтӥсь геройёс — кык ӟичыос-сузэръёс: Питыри возьматэ уйпал удмуртъёсты, нош Пуштыри — лымшор удмуртъёсты. Открыткамылэн бераз — Удмурт Элькунмылэн мутусэз (картаез).

Эшшо одӥг куронмы вань на — открыткамес кыӵе ке но синпелет азьын, яке вордӥськем палъёсысьтыды чебер интыын, яке тодмо адямиен ӵош туспуктыны.

Открытка басьтӥсь адями кулэ буяны аслэсьтыз ёроссэ но пусйыны, кыӵе нуналэ открытка дӥняз вуиз. Эшшо одӥг куронмы вань на — открыткамес кыӵе ке но синпелет азьын, яке вордӥськем палъёсысьтыды чебер интыын, яке тодмо адямиен ӵош туспуктыны.

Али открыткамы сюрес вылын ни. Нырысь со кошкиз Алнаш черкогуртэ. Ӝоген вуоз ини Грак ёросысь Вуж Эгра гуртэ. Собере Кизнер ёросэ. Кин татын открыткамес басьтоз, тодмо ӧвӧл на, сое быръёмы vk.com/udmotkrytka вотэс бамын.

Акцимы быдэс ар кыстӥськоз. Адямиос ас вылазы басьто туж бадӟым уж — открыткамы котькуд ёросэ пыраны но берен Ижкаре вуыны кулэ. Та акция возьматоз, кызьы шаерысьтымы адямиос ог-огенызы кусып возьыны быгато, оло, кин ке та акция пыр эшъяськоз но.

Чаклалэ открыткамылэсь сюрессэ, пыриське акциямы!

Наталья Дмитриева

 

Удмурт Дунне
By Удмурт Дунне Март 7, 2017 16:07