Пичи Пурга ёросысь Пичи Бӧдья: Гуртъёсты азинто городъёс

Удмурт Дунне
By Удмурт Дунне Март 15, 2017 16:39

В. Петров вордскем гуртэныз но калыкеныз данъяське.

Пичи Пурга урдсын

Пичи Бӧдья гурт Пичи Пурга черкогуртлэсь 2 иськеме интыяськемын. Татын асьсэлэн гинэ вераськон манерзы вань:  «адӟи», «лыдӟи» интые, «адзи», «лыдзи» шуо.

Кышкыт инты

— Гуртын 4 ульчазы. Староста луэ Сергей Ворончихин. Дачникъёс улыны лыктэмен, гурт арлы быдэ бадӟыма, выль коркаос ялан ӝутско. Туннэ нуналлы отын 147 хозяйство ини, нош кыӵе пичи гурт вал, — вера Постол муниципал кылдытэтысь специалист Екатерина Титова.

Гурт шортӥ ик Можга — Сарапул бадӟым сюрес кошке, мыд-мыд палтӥз — чугун сюрес. Нырысь ик туж бадӟым но ӵыж-выль чебер корка йыгаськи.

— Кышкыт интыын улӥськоды ук. Гуртты пыр сомында сюресъёс кошко, городысь татчы потӥз шат лыктэмды? — юасько Шепелёв кузпалъёслэсь.

— Али ми выжыкылын кадь чебер интыын улӥськом. Нырысь ик бадӟым Трактовой ульчае юрт басьтӥмы вал. Коркамы пырак кожонын сылӥз. Уйёсы машина куараен но югдытӥсь фараосын кӧламмы ик ӧз луылы. Гужем чипы-курегез ульчае поттаны кышкаллямы, поглянъёс улэ шедёзы шуыса. Таяз ульчаын милемлы туж кельше, машинаос сокем трос уг ветло. Олег но Андрей пиосмы семьяосынызы Ижын уло. Но соос ми доры арнялы быдэ бертыло, атайзылы лэсьтӥськыны юрттӥсько.

— Пичи Бӧдья гурт маин бордаз кыскиз?

— Та гурт Ижлы но, Пичи Пургалы но матын, соин, дыр. Иже капчи мыныны, электричкаен сяна, Яган каргуртысь рейсовой автобус гуртмы пыртӥ ветлэ на. Азьло Пургае пыдын гинэ ветлӥськом вал, сюрес дуре мерттэм пужымъёс пӧлтӥ. табере капчи улонлы дышимы, капка азямы такси ӧтиськом но, 100 манет тырыса, райцентре вуиськом. Сельсоветмы Миндэр гуртэ интыяськемын, соин ик отчы Пичи Пурга пыр ветлоно луэ.

Гуртысь арлыдоосын кивалтэ А. Бочкарёва.

Гуртысь арлыдоосын, пе, кивалтэ Александра Бочкарёва. Шепелёвъёс сое телефон пыр доразы ӧтизы. Александра Леонидовна утыр ик вуиз, сьӧраз кутэм на 29-тӥ толшоре 91 арес тырмем  бускель кышноез Ульяна Зотоваез. Соиз, эсьмаса, тур-тур ик, сцена вылэ потоно кадь, удмурт дӥськутэн дӥсяськыса лыктэм.

Ферма быриз

— Улон монэ пичиысен жугиз — сюрмумы вӧзын будӥ, — шуэ Ульяна апай. — Одӥг нунал но школае пыраме ӧвӧл, нош кыӵе потэ вал дышетскеме. Ужась киос кулэ шуыса, сюрмумые монэ пичиысен уж борды думиз. Пересьмытозям везде ужай: Ижевск — Балезино сюресэз но лэсьтӥ, нюлэс но корай, путь (чугун сюрес) вылын но, колхозын но тырши. Инмарлы тау, ужамме синйылтӥзы, ужысь ветеран каризы.

Укно чильтэръёс коркаез чебермало.

— Нырысь ик колхозмы «Шормуӵ» шуыса нимаськиз. Кивалтэм соин ӟуч воргорон Иван Нагорных. Война вакытэ — Захар Аитов. Захар Трофимович асьме гуртысь ик вал. Вазен кӧня пудо вордо вал! Гурт пумын скал но, вал но, курег гидъёс но сылӥзы. Ай  курка гинэ но вордӥзы. Собере милемыз «Малопургинский» совхоз борды каризы. Гурезь йылэ фермаос ӝутӥзы. Оломалы бӧрысь соосты кир-пазь каризы, сэрттӥзы, быдтӥзы, адямиос ужтэк кылизы. Вазен гуртын маке быдӟа яблок садмы вал. Собере сое жаг куян интылы пӧрмытӥзы, гуртлэсь чеберзэ быдтӥзы. Бакча берамы ик маке быдӟа кызьпу арама сылӥз. Сое но, чугун сюрес лэсьтыкузы, кораса быдтӥзы, кыр инты кельтӥзы. Таре турнан инты но тачак, но пудо воземысь  дугдӥзы. Ай мон но синмы вань дыръя весь пудоен улӥ, таре моӵ быриз, арлыд бадӟым луиз, чипы-курег но уг возиськы ни, — вера Зоя Иванова.

— Быдэс гуртэз басьтоно ке, скал но ветыл 24 хозяйствоын сяна уг ни вордо, — валэктэ Александра Леонидовна. — Кин но со ыж возиськом на. Нош татчы бызён аръёсам ваньмыз скалэн уло вал али.

— Гуртмы азьло трослы пичи вал, — веранзэ азинтэ Ульяна апай. — Ай коркаос но кык укноен гинэ, лапегесь лэсьтылӥзы. Огвакытэ дото калык алама улӥз, лэсьтӥськись ик ӧй вал. Таре ог-огзылэсь адӟем карыса, лэся, кыӵе гинэ уг пуктӥсько ни.

Пичи бќдьяослэн уг луы на карнанлэсь люкиськемзы.

Дано адямиос

Александра Бочкарёва гуртысь нылкышноос сярысь нимысьтыз альбом лэсьтэм. Ульяна Николаевна сяна, эшшо кык 90 аресъем нылкышноос отчы шедемын — Клавдия Пономарёва но Ирина Попова.

Вазен Пичи Бӧдьяын клубзы но покчи классъем школазы вылэм. Клубзэс быдтӥллям, нош школазэс ворсаны сётӥллямтэ, нылпи сад кариллям. Гуртоос котькыӵе ужрадъёссэс отын ортчытъяло. Солэн азбараз Быдӟым оже быремъёслы синпелет пуктэмын. Табере нылпиос тодон-валан люканы Пичи Пурга черкогуртэ ветло. Туннэ нуналлы нылпи садэ 14 тэшкыли  ветлэ.

— Медпунктмы пулэсь лэсьтэмын вал, — верало гуртоос. — Со ӝуаны сюриз, ярано, воксё ӧз быдтэ, выльзэ лэсьтӥзы.

Гурт шортӥ ик Можга — Сарапул бадӟым сюрес кошке, мыд-мыд палтӥз — чугун сюрес.

Калыкез эмъя Светлана Викулова. Гуртоос эмчизэс гажало но ярато, «Удмурт дунне» газетэ «Гурт адями» вожвылъяськонэ нимзэ сётъязы.

Пичи Бӧдья гуртын 1919-тӥ арын вордскемын Удмуртиысь калык артистка Анна Рыбакова. Со «Италмас» ансамбльын кырӟамын. Та ансамбле нырысь вуэм но балетмейстер луыса ужам Пичи Бӧдьяысь ик Андрей Шочев (малы ке но со котькытын Щечев шуыса гожъямын). Ӵапак со Нюралэсь чебер кырӟамзэ шӧдэм но «Италмасэ» интыям.

Пичи Бӧдья гуртын озьы ик вордскемын Удмуртиысь дано врач Зоя Широбокова. Ижысь гурт удысъя академиын дышетэ Наталья Итешина.

Любовь Тихонова

Удмурт Дунне
By Удмурт Дунне Март 15, 2017 16:39