«Пичи» ожъёсы пыриськем солдатъёслэн улонзы

Удмурт Дунне
By Удмурт Дунне Март 8, 2017 16:42

Удмурт Элькунысь дано журналист Георгий Грязев.

Удмурт Элькунысь дано журналист Георгий Грязев гожъя туала батыръёс сярысь: «пичи» ожъёсы пыриськем солдатъёслэн улонзы, адӟонзы сярысь.

1996-тӥ арын Г. Грязев повестьёсын но очеркъёсын «Кирень куректон» книгазэ печатлаз. Со сӥземын Афганистанэ но Чечняе ожмаськыны ветлэм пиослы, соослэн семьяоссылы. Огез соос пӧлысь луэ В. Вахрушев — лётчик, майор, 2 пол Горд Кизили орденэн пусъемын. Пӧсь ожъёс мыныку, бырыны шеде, огназы кылё егит кышноез но пичи нылъёсыз… Ӧжыт ӧй вал ожын быремъёс, вордӥськем шаеразы берыктӥськемъёсызлэн но улонзы капчи ӧз радъяськы.

2014-тӥ арын Г. Грязев поттӥз «Вамыш» книгазэ. Таиз 2 люкетлэсь луэ: нырысетӥез Быдӟым оже ветлэмъёс сярысь, нош кыкетӥез вера Афганистанын но Уйпал Кавказын югдурез утемъёс но соослэн ӵыжы-выжыоссы сярысь.

Книгаысь огез очерк «Мултэс адямиос» нимаське. Со сӥземын Глазов карысь Антон Ушаковлэн анаезлы. Клавдия Николаевна валаны тырше Чечня войналэсь мугъёссэ. Одӥгез гажано генерал валэктэ: политика — со  мафия. Кема аръёс  ӵоже политикъёс чакласа улӥзы Чечняысь Дудаев генераллэсь кужмоямзэ, законъёсты тӥямзэ, но нокин но ӧз малпаськы, ваньмыз со вир кисьтонэн берыктӥськоз шуыса.

«Кирень куректон», «Вамыш» книгаос асьме ӵыжы-выжыосмы, улонмы сярысь. Сое лыдӟоз котькудӥз, кин дунъя котырысьтыз адямиоссэ: бускельзэ, ӵош дышетскем эшсэ, анай-атайзэ. Ожгарчиос сярысь гожъямъёс дышето, азьланяз ожъёс, янгышъёс медаз луэ ни шуыса.

Патриотической уж нуэмез понна Георгий Грязев 2014-тӥ арын пусъемын Россиысь Журналистъёслэн союззылэн «За заслуги перед профессиональным сообществом» знакеныз.          Г. Грязевлэн туала военной конфликтъёс сярысь публицистикаез удмурт литератураын бадӟым инты басьтэ.

Любовь Михайлова

Удмурт Дунне
By Удмурт Дунне Март 8, 2017 16:42