Нырысьсэ пыриськи «Разделяйка» акцие

Удмурт Дунне
By Удмурт Дунне Март 10, 2017 16:27

«Разделяйкаысь» адямиос нырысьсэ лыктэмъёслы валэкто, кыӵе жуг-жагез кытчы интыяно. Татчы ик вайыны луэ сӧриськем телевизоръёсты, магнитофонъёсты, электросчётчикъёсты. Озьы ик приютъёсын улӥсь коӵыш-пуныослы шуныт дӥсь.

Алигес нырысьсэ пыриськи Ижын толэзьлы быдэ радъяськылӥсь «Разделяйка» акцие. Отчы вайи пластик арбериосты, батарейкаосты, пияла ӟенеликъёсты, бумага.

Кемалась кылӥ вал ини, Ижысь «Зелёный паровоз» огазеяськон жуг-жагез нимаз октэ шуыса. Ӟеч уж лэсьтэме мынам но потӥз. Зэм, азбарамы нимысьтыз контейнер пуктэм бере пластикез отчы куясько вал ини. макулатураез но батарейкаосты люкаса вози. Ваньзэ таосты «Разделяйкае» вайыны луэ вылэм.

Куштоно арбериосын 4 бадӟым пакет люкаськиз. Та «узырлыкез» УдГУ дорын радъям «Разделяйкае» вуттӥ. Паймымон, татчы данак адямиос лыктэмын — 2-3 бадӟым мешокъёсын. Быдэс семьяосын вуэмъёс но вань. Шумпотымон, анай-атайёс нылпиоссэс пичиысен чылкыт улыны дышето.

«Разделяйкаысь» адямиос нырысьсэ лыктэмъёслы валэкто, кыӵе жуг-жагез кытчы интыяно. Татчы ик вайыны луэ сӧриськем телевизоръёсты, магнитофонъёсты, электросчётчикъёсты. Озьы ик приютъёсын улӥсь коӵыш-пуныослы шуныт дӥсь. Вуж книгаос кузьым луо арлыдоослэн юртъёсазы улӥсьёслы. Тодӥсько, татчы ваем жуг-жаг тус-тас каремын уз луы, нюлэсъёсын лушкем гурезьёслы уз пӧрмы. Солэсь выль вузъёс потто асьме Удмуртиысь ик огазеяськонъёс. Кылсярысь, полиэтилен пакетъёслэсь лэсьто бинялтон плёнка, полимерно-песчаной плитка, черепица но мукетсэ.

Нуналлы быдэ люкаськись полиэтилен пакетъёсты, бумагаез, пиялаез нимаз бичаны секыт ӧвӧл ук. Ваньзэ тае толэзьлы одӥг пол «Разделяйкае» но вуттыны сокем трос дыр но, кужым но уг быры. Ваньмы та уж борды итћськысалмы ке,  кыӵе зол юрттӥськысалмы инкуазьлы. Малпалэ гинэ ай: Удмуртиысь Инкуазез утёнъя но инкуазь узырлыкъёсъя министерство ивортэмъя, котькудмы арлы быдэ 319 килограмм жуг-жаг люкаськом. Данакез со пӧлысь музъеме согиське, сю аръёсын отын сисьмытэк кылле. Ӟеч уж лэсьтыны ноку бер ӧвӧл. Кылсярысь, Ижын вуоно ужрад ортчоз 12-тӥ мартэ. Нимаз жуг-жагез октон сярысь пыр-почгес тодыны луоз «Зелёный паровозлэн» сайтысьтыз но «Разделяйка» акцилэн вотэс бамысьтыз.

Кылем арын ӟеч кичӧлтонэн потӥзы «Калык фронт» огазеяськонысь азьветлӥсьёс. Соос дэмлазы жаг куям интыосты нимысьтыз интернет-картае пыртылыны. Отчы кырсь  интыосты пусйыны быгатэ котькуд адями, со понна пыроно ecomap-onf.ru сайтэ. «Калык фронт» со интыосты утялтон пумысен нимысьтыз уж нуоз.

Ангелина Снигирёва

Удмурт Дунне
By Удмурт Дунне Март 10, 2017 16:27