Нылкышно улэ сюлмыныз, воргорон — визьмыныз?

Удмурт Дунне
By Удмурт Дунне Март 3, 2017 13:00

Нылкышно улэ сюлмыныз, воргорон — визьмыныз?

Ин но музъем

Луэ меда висъяны воргоронлэсь но нылкышнолэсь творчествозэс?  Со сярысь юаськимы тодосчиослэсь, суредасьёслэсь но литератураез гажасьёслэсь.

Кучыран Юри, суредась, этнофутурист:

— Ми, пиосъёс, лобаськомы. Ми пыр Инмар вань малпанъёссэ адямиос пӧлы вӧлмытэ (кылсярысь, вань пророкъёс дунне вылын — пиосмуртъёс). Кышномуртъёс Музъемен зол герӟаськемын. Соосыз му, магнит кадь, ас бордаз кыскыса возе. Пиосъёс ӧтё кышноосыз эрикын лобаны, нош кышномурт пиосмуртэз серметаса музъемлы матэгес возе. Нылкышно эрико лобаны дышемын ӧвӧл. Улон эсэпез солэн мукет: семья, пиосмуртэз сӥлы карон, солы юрттӥськон.

Та бордысь потэ пӧртэмлык. Соос ноку но одӥг кадь гожъяны но суреданы уз быгатэ. Но гендер амалъя литератураез но поэзиез люкон мыным ӧжытак паймымонгес потэ. Озьы ке но «нылкышно лирика» шуонлы мон пушласянь уг пумитъяськиськы. Нош «пиосмурт лирика но поэзия» шуон мыным маскара потэ. Суредан устолык уг висъяськы гендер амалъя. Нылкышно  живопись яке пиосмурт графика терминъёс луысалзы ке, соос мыным чик но валантэм потысалзы.

Наукаын, кылбуретын яке суредаськонын выльзэ ӵемысь кылдыто воргоронъёс. Пӧлазы нылкышноос шедё ке, тод: соослэн пушказы пуке пиосмурт. Озьы пи но ныл дуннеослэн куспысьтызы соос аспӧртэмлыко но ненег образъёсты шедьтыны быгато. Туала вакытэ но вашкала вуосын пызйыса потӥсь матриархатмы удмурт нылкышно кылбуретэз фин-угор но дунне литератураослэсь висъя. Мордовиысь эрзя суредась, режиссёр, сценографист но культуролог А. Алёшкин трос пол вералляз, кыӵе зол шӧдонзы удмурт нылкышно кылбурчиослэн, инкуазез яратон, гажан пыӵамын кылбуръёсазы.

Виктор Шибанов, тодосчи:

— Нылкышноослэн но воргоронъёслэн гожтэмъёссы висъясько. Туж тросэз тае сюлмынызы шӧдо. Зэмзэ но, Кузебай Гердлэсь но Ашальчи Окилэсь, яке Флор Васильевлэсь но Алла Кузнецовалэсь, яке али вакытысь Сергей Матвеевлэсь («Шузи» романзэ) но Лидия Нянькиналэсь («Ау-ау! яке Инбамысь гожъёс» повестьсэ) гожъямъёссэс артэ пуктӥськод ке, капчиен висъяны луоно: тазэ кышномурт гожтӥз, нош тазэ — воргорон.

Но пыр-поч ӵошатыны кутскиськод ке, паймымон маке пӧрме. Куддыръя пусъё: пиос метафора пыр малпасько, нош нылъёс — метонимия пыр. Но текстъёсъя учконо ке, та малпан быдэсак шонер уг луы. Нылкышноослэн 90 процентэз кылбуръёссы яратонлы сӥземын, шуо. Шонер кадь. Но Елена Виноградовалэсь творчествозэ эскерид ке, та малпан нош ик сӧриське. Пиос синмынызы ярато, пе, нош нылъёс — пельынызы. Талы мон данак примеръёс шедьто. Но мукет сямен малпаськись адями нош ик аслэсьтыз малпанзэ мыным пумит вераны быгатоз. Уд вала: кудмы шонер.

Огъя верано ке, дунне вылын одно ик сыӵе юанъёс луыны кулэ, кудъёсызлы ваньмыз шонер валэктон тодо, но малпанзэс валэктыны уг быгато.

Ольга Бородина, «Кенеш» журналлэн валтӥсь редакторез:

— Котькуд адями пушкын пиосмурт но, нылкышно но шӧдонъёс уло. Соин ик озьы но луыны быгатэ: нылкышнолэн ужъёсыз дунне шоры учконъя, улонэз валамъя, лул кужымъя пиосмуртлэн гожъямъёсызлы матын луо, нош воргоронлэн — нылкышнолэн гожъямъёсызлы.

Пӧртэмлык тужгес юн шӧдӥське поэзиын, малы ке шуоно кылбур пыр автор ӵемысь пуш шӧдонъёссэ, сюлэм сэрегъёсаз ватэм малпанъёссэ усьтэ. Нылкышно быдэсак мылкыдъёсыз пушкын улэ ке, пиосмуртэз улонэтӥ сайкыт визьыз валтэ.

Уг синмаськиськы пиосмурт кылбурчиосмылэн нылкышнолэн нимыныз гожъямъёссылы. Тросэз та амалэз творчествоязы куто. Котьку сямен сыӵе кылбуръёс лябесьгес пӧрмо, ӵемысь, огдышем, тодмо кылсуредъёс вылэ пыкиськыса, лэсьтэмын луо. Нылкышно кылбурчиос сыӵе «висёнэн» уг курадӟо, соослэн пушказы сокем трос веранзы — сюлмаськонъёссы, паймонъёссы, бӧрдон-ӝожтӥськонъёссы, пиосмуртлэн нимыныз гожъян йыразы ик ӧвӧл.

Азьвыл нылкышно авторъёс «яратон», «дор», «анай» темаос котыртӥгес бергало ке вал (Татьяна Чернова, Людмила Кутянова, Алла Кузнецова, Галина Романова, Любовь Тихонова), туала вакытэ куд-ог нылкышно гожъясьёслэн ужъёсазы яратон пумысь бӧрдонъёс палэнэгес кылё, соослэн Инмарзы — пиосмурт, шуыны уг луы ни, та кылбурчиослэн улонзы трослы паськытгес. Мон верасько Елена Виноградовалэн, Анастасия Шумиловалэн, Зинаида Рябининалэн, Елена Миннигараевалэн кылбуръёссы пумысен. Елена Виноградовалэн гожъямъёсыз, кылсярысь, дуннеез шӧдонъя, дунне шоры учконъя пиосмуртлэнэзлы матын, малпасько. Солэн кылбуръёсыз тодэ вайыто литератураын «пиосмурт» темаез йӧн-йӧн нуись Михаил Федотовез но Рафит Миннекузинэз. Еленалэн героиняез туж эрико, сое дунне ужпумъёс сюлэмшугъяськыто: Кыӵе дӥсьсэ кузьма мыным даур?!/ Вылыз-тырыз, пушкыз но чибори. Чибор дӥсез дӥсяй ке но, уг лу/ Россей кунысь лекос узыр вузчи….

 

Людмила Шумилова, Пичи Пурга ёрос библиотекалэн кивалтӥсез:

— Йырам радэн султӥз литературалэн историез, но малы ке но со пиосмурт нимъёслэсь кылдӥз. Д. Боккаччо, Ф. Рабле, М. Сервантес, со сяна, В. Гюго, М. Твен, яратоно Ж. Верне, ӟуч литератураысь — А. Пушкин, Н. Гоголь, Л. Толстой, Ф. Достоевский. Туала литератураез ке басьтоно (мон понна со кутске 20-тӥ дауре), сюлмам кылизы С. Есенинлэн, А. Блоклэн чуръёссы, ноку вунонтэм пытьы кельтӥз М. Булгаков. Туннэ быгатӥсько шуыны: «Мастер и Маргарита» — со мынам аспӧртэмлыко «Библие», мон со книгаысь улонам вань юанъёсылы валэктон шедьтӥсько. Нош али яратыса лыдӟисько Б. Акунинэз, солэн фантазиезлы но кылызлы паймемысь уг дугдӥськы. Нылкышноослэн нимъёссы та радэ ӧз ик султэ кадь. Но верасал ке, воргоронъёслэн литературазы мургес, золгес шуыса, вузасал, дыр, яратоно Ф. Саганме — кытчы мон сотэк, солэн сюлэмез шымыртӥсь «Любите ли вы Брамса?» романэзтэк, кызьы мон улысал М. Цветаевалэн «Мой милый, что тебе я сделала» кылбурезтэк, А. Окилэн «Лулы мынам» кырӟанэзтэк. Уг луы, дыр, литератураез люкыны воргорон но нылкышно литератураослы.  Литература — со кыл гинэ ӧвӧл, со — аспӧртэмлыко лул, нош лулэз мумы но айы луэмъя люкыны луэ меда?

Мария Векшина

 

Удмурт Дунне
By Удмурт Дунне Март 3, 2017 13:00