Москваын «Пленысь берыктэм кырӟанъёс» адӟытон ужа

Удмурт Дунне
By Удмурт Дунне Март 16, 2017 17:12

Тужгес трос записьёс — 50 пала — возиськиллям Берлинын, ог 40-эз — Будапештын.

Матысь 2 арня ӵоже Москваысь Венгер культурая центрын «Пленысь берыктэм кырӟанъёс» адӟытон ужалоз.

Отын кылыны луоз Нырысетӥ дунневыл ож вакытэ пленэ шедем удмуртъёслэсь но комиослэсь гожтэм кырӟан-веранъёсыз, улэм-вылэмзэс, учкыны туспуктэмъёссэс, архив документъёсты.

Та проект борды Историяя, кылъя но литературая Удмурт институтысь тодосчиос 3 ар талэсь азьло басьтӥськизы. Азязы пуктӥзы ужпум — фин-угор калыкъёслэн улонысьтызы тодмотэм бамъёссэ усьтоно.

1915-тӥ-1917-тӥ аръёсы венгер этнограф Бернат Мункачи но мукет тодосчиос асьме военнопленнойёсын пумиськылӥллям, верамъёссэс гожъяллям, но тросэз материалъёссы татчыозь «шыкысын» кыллизы. Историяя, кылъя но литературая Удмурт институтысь тодосчиос быгатӥзы соосты калык доры вуттыны.

— Архивысь ми тодӥмы, кинъёс со вал — пленэ сюрем адямиос, кызьы фронтэ, нош собере пленэ шедизы. Тунсыкъяськимы, кызьы соос улӥзы ож бере, — вера проектлэн кивалтӥсез, история тодосъя доктор, Кун Думаысь депутат Алексей Загребин.

Кырӟан-веранъёсты удмурт тодосчиос Будапешт, Вена но Берлин архивъёсысь но музейёсысь люказы. Тужгес трос записьёс — 50 пала — возиськиллям Берлинын, ог 40-эз — Будапештын. Вань со материалъёс оцифровать каремын. Азьланяз соосты дискен поттыны малпамын, котькудӥзлы рос-прос валэктон сётыса.

Елена Рябина

 

Удмурт Дунне
By Удмурт Дунне Март 16, 2017 17:12