Мон уг валаськы Д. Шостаковичлэсь крезьгурзэ…

Удмурт Дунне
By Удмурт Дунне Март 10, 2017 16:58

Отысь куараослэн ог-огзэс согыны турттэмзы пушкам кышкан вордэ. Малы Д. Шостакович лулэз ӵабъясь крезьгур кылдытъям, шӧдыны юрттӥз Джулиан Барнслэн «Шум времени» романэз. 16+

Д. Барнс — Англиысь туала писатель. Озьы ке но со туж умой тодэ СССР вакытысь улонэз, сямъёсты, адямиосты —  асьме вӧзын лапак улэмын кожалод. Нырысь учкыса, книгаын ӧвӧл кадь огъя сюжетэз, учыръёс ӝук кадь сурасько, соос полэстӥсько творчество но власть сярысь малпанъёсын.

Романлэн нырысетӥ люкетэз «Тубат дорын» нимаське. Сталин сьӧсьяськон вакытэ Д. Шостакович уйлы быдэ лифт дорын сылэ  — вите, ку сое допросэ нуозы. Сталин-а, Жданов-а «Леди Макбет Мценского уезда» операзэ «какофония», «сумбур вместо музыки»  шуиллям но, векчи кивалтӥсьёс соку ик валаллям: Шостаковичлэсь валантэм крезьгурзэ калыклэсь ватоно, ассэ пролетариат понна крезьгурась кароно. Но ГУЛАГ-лэн  кӧаз шедёнлэсь со кызьы ке утиське. Озьы ке но ӵапак тубат вылын ортчытэм уйёс солэн сюлмаз кышкан улӟыто — та дырысен Д. Шостакович советской властез «яратыны» кутске, кинэ косо, соосты курла собраниосын, калыклы валамон крезьгур кылдытъя. Таӵе кылзӥськись луэмез понна сое быдэс делегациен ӵош ысто Америкае.

Произведенилэн кыкетӥ люкетаз — «Самолётын» нимаське — мадемын тодмо советской композиторлэн Д. Шостаковичлэн США-ысь калыкен пумиськылэмъёсыз сярысь. Со вера гожтыса дасям текстъёсты, Америкае пегӟем И. Стравинский крезьгурчиез курла, ачиз сое вань сюлмыныз гажа ке но. Пышкылӥсь юанъёсыныз сое пӧсе вуттэ озьы ик Америкае кӧчем кылбурчи В. Набоков. Малпанъёсме, гажано адямиосме вузаме сярысь табере быдэс дунне тодӥз, куректэ крезьгурчи. Зэм ик-а Шостакович пумиськылӥз Набоковен, зэм-а Набоков ЦРУ-лэн адямиез вал? Кӧняез та произведениын малпамын авторен, нош кыӵе учыръёс Д. Шостаковичлэн улоназ зэмзэ но вал?

Романлэн «Машинаын» люкетаз асьмеос адӟиськом пурысьтам, пересьмем, но чылкыт тусо воргоронэз. Чебер «иномаркаен» со ширтэ Москва кузя кыӵе ке собрание, бордаз — личной шофёр. Табере Д. Шостакович — коммунист, со трос гожъяське «Правдае» (зэмзэ вераса, гожтӥське кинэн ке дасям текст улэ), егитъёслы валэктэ, кыӵе луыны кулэ советской музыка, мукет крезьгурчиослэн тузӥ машинаоссылы вожъяське… Улэп кылемед, калык радъя улэмед, произведениостэ радиоысь кылэмед потэ ке, системалы нялтас луытэк ӧвӧл…

Ольга Вахитова

Удмурт Дунне
By Удмурт Дунне Март 10, 2017 16:58