Малы удмурт нылкышнолы мерлыко уж?

Удмурт Дунне
By Удмурт Дунне Март 15, 2017 12:10

Кышномурт со — дор…

Удмурт кышномурт котькытчы вутске. Семьяын, уж дурын, политикаын, общественной улонын ассэ яркыт возьматэ.  Шуо: удмурт калык движение но  возиське нылкышноос вылын. Малы озьы пӧрме? Мар та сярысь малпало удмурт пиосмуртъёс?

Валентин Тубылов

Ог 5 ар талэсь азьло ай та ужпумъя мылкыдзэ вераз «Удмурт Кенеш» огазеяськонлэн дано президентэз Валентин Тубылов.

— 1990-тӥ аръёсы удмурт движенилэн кутсконаз сылӥсьёс ваньзы сямен ик воргоронъёс вал, — пусйиз Валентин Кузьмич. — Аръёс ортчемъя интызэс басьтӥзы нылкышноос. Угось кышномуртлэн общественной ужын, кивалтонын ответственностез бадӟымгес. Соос пӧртэм ужпумез лул-сюлэмзы пыр потто. Соин ик валало: общественной уж туж кулэ. «Удмурт Кенеш» котырын трос визьмо удмурт нылкышноос, кудъёсыз али ик быгатысалзы ассоциациен кивалтыны. Кин тодэ, оло, озьы ик луоз ай…

Озьы ик луиз. «Удмурт Кенешлэсь» 25 аръем историзэ чаклано ке, Татьяна Ишматова — ассоциациез валтӥсь кыкетӥ кышномурт. Нырысетӥез Роза Яшина вал.

5 ар талэсь азьло «Удмурт Кенеш» огазеяськонлэн 72 процентэныз ёзъёсыныз кивалтӥзы нылкышноос. Нош али — 56 процентэныз. Озьыен, ёросъёсын удмуртлык понна кыл кутыны дась луись пиосмуртъёс тросгес луиллям. Со гинэ ӧвӧл, ассоциацилэн исполкомаз но али 71 процентэз — воргоронъёс. Соин ик удмурт движение нылкышноос вылын возиське шуыны меӵак уг луы, вылды. Визьмо, йыг-йыг пиосмуртъёсмы ӧжыт ӧвӧл. Нош асьсэос пиос та сярысь мар малпало?

 

Юрий Перевозчиков — «Удмурт Кенеш» огазеяськонлэн экспертно-консультативной кенешезлэн ёзчиез, Культурая синпелетъёсты утёнъя агентстволэн кивалтӥсез, история наукаосъя кандидат:

— Удмурт калык движениын удмурт нылкышнолэн интыез туж бадӟым. Мон туж вылӥ дунъясько удмурт нылкышно движениез но. «Удмурт нылкышно кенеш» огазеяськонэн кема аръёс ӵоже кивалтӥз туж яркыт, визьмо удмурт кышномурт Галина Никитина. Со нылкышно тодосчиосты, интеллигенциез ӝутыны, огазеяны быгатӥз. Бӧрысь биньгозыез кутӥз Надежда Степанова. Со но трос лэсьтэ. Яркыт удмурт кышномуртъёс сярысь вераку, нокызьы тодэ вайытэк уг луы Ангелина Крыловаез. 1990-тӥ аръёсы со лэчыт визьмыныз висъяськиз. Со сяна, вераны луысал на Светлана Смирноваез, Надежда Уткинаез но трос мукетъёссэ. Али азьветлӥсьёсмы пӧлысь тужгес яркытэз но кужмоез Татьяна Ишматова.

Малпасько, общественной движениын удмурт нылкышнолэн бадӟым интыез герӟаськемын оглом удмурт калыклэн удмурт кышномурт шоры учконэныз. Асьмелэн кышномурт вылын возиське юрт, дорлэн шунытэз, чеберлыкез. Студент дыръям ай улӥ лымшор-шундыӝужан палась кунъёсысь пиосын артэ. Ми ӵемысь споръяськылӥм нылкышноослэн та улонын интызы пумысен. Соос туж паймо вал удмурт кышномуртлэн общественной уже, кылэз но культураез утёнэ пыриськемезлы, вылӥ тубатъёсын ассэ возьыны быгатэмезлы.

Огвакытэ кивалтӥ удмурт егитъёслэн «Шунды» огазеяськонэнызы. Тыршиськом вал, правлениямы пиос но нылъёс огмындагес мед луозы шуыса. Котькытын кулэ луыны эсэпсэ шӧдон.

Удмурт нылкышно тырше, дуннеын тупаса улон, гармония мед луоз шуыса. Нылкышнолы луыса котькыӵе радлык юнгес возиське. Угось удмурт кышномуртъёс, азьзэс-берзэс учкытэк, мар ке выльзэ лэсьтыны уг кутско, соос малпаськыса, чакласькыса  азьлань вамышъяло. Воргорон кивалтӥсьлэн ӵемысь луэ нылкышно воштӥсез. Озьы ик «Удмурт Кенешын» но. Президентъёс ӵемысь воргоронъёс вал ке но, вӧзазы котьку вамышъязы оскымон, рос-прос удмурт кышномуртъёс.

 

Геннадий Бекманов — «Удмурт Кенеш» огазеяськонлэн экспертно-консультативной кенешезлэн ёзчиез, Удмурт Элькунысь калык артист:    

— Удмурт движение возиське удмурт нылкышноос вылын. Мон 100 процентлы таин соглаш. Вашкала дырысен учконо ке, удмуртъёслэн воршуд нимъёссы но — нылкышно нимъёс. Мон ӵем вуылӥсько ёросъёсы. Адӟисько: колхоз председательёс пӧлын ялан тросгес луо кышномуртъёс. Малы? Огласянь, пиосмуртъёс пӧлын юон вылэ чӧлскисьёс ӧжыт ӧвӧл. Мукет ласянь, кышномуртлэн лул-сюлэмыз пиосмуртлэнлэсь трослы кужмогес. Быдӟым ож вакытъёсты но тодады вае ай. Пиосмуртъёс, автомат кутыса, атакае бызё, жугисько. Кышкыт, секыт. Но, малпасько, нылкышноослы фронт мышкын эшшо секытгес вал. Соослэн лул-сюлэмзылы секытгес вал. Оло, отысь ик потэ туала нылкышноослэн юнлыксы?

Со дыре ик кышномурт — дор. Со шунытлык но чылкытлык. Удмурт движенилэн удмурт нылкышно вылын возиськемезлэн номыр уродэз ӧвӧл. Калыкмы понна со озьы ик луыны кулэ, дыр. Сыӵе ини удмуртъёслэн аспӧртэмлыксы.

 

Сергей Касаткин — «Удмурт Кенеш» огазеяськонлэн исполкомезлэн ёзчиез, «Мынам Удмуртие» телерадиокомпаниысь анай кылын передачаос понна кыл кутӥсь:                        

— Нылкышноосмы котьку висъясько мыло-кыдо луэменызы. Соослэн трос выль малпанъёссы. Гур котыразы гинэ берганы уг чидало, мылкыдъёссэс кырӟаса-вераса, калык пӧлы потаса, кисьто. Пуксисьтэм мылкыдзылы луыса ик соос общественной движение но мыло-кыдо пырисько. Удмурт кылэз, культураез, сям-йылолъёсты утён ужпумъёс соослы туж матын луо. Со дыре ик чаклано ке, кышномурт туж ӵем мылкыдъёссэ серметаса возьыны уг быгаты, сюлмысьтыз вера-кисьтэ. Сыӵе дыръя вӧзаз сылӥсь воргоронъёс нылкышнолэсь малпанъёссэ кулэ ӧръя лэзьыны кулэ.

Ужея мон ӵемысь вуылӥсько Россиысь фин-угор калыкъёс доры. Соосын ӵошатоно ке, асьсэ мыло-кыдо луэмзыя асьме кышномуртъёс поръёслы матынгес кадь пото. Поръёс но сыӵе ик ӟырдыт мылкыдоесь, интыязы пукыны чидасьтэмесь.

 

Михаил Крылов — «Удмурт Кенеш» огазеяськонлэн исполкомезлэн ёзчиез, Алнаш ёросысь «Молодая гвардия» хозяйстволэн кивалтӥсез:

— Асьмелэн озьы пӧрме ни: дышетонэн, пиналъ-ёсты, егитъёсты визьманэн ӵемысь выро нылкышноос. Нош дышетӥсьёс пӧлын пиосмуртъёс тросгес луысалзы ке, оло, нылпиосмы но, пиосмы но мукетгес луысалзы. Пиосмурт дышетӥсьлэн авторитетэз  бадӟымгес ук. Но улонын пиосмурт тросгес сюлмаське коньдон поттыны. Соин ик ӵемысь тырше вуз поттон удысын, хозяйствоын. Алнашын огвакытэ атайёслэсь конференциоссэс радъялляло вал. Туж ӟеч малпан. Со пиосмуртъёсты но общественной ужъёсы кыскыны юрттэ.

 

 

Эдуард Петров — «Удмурт Кенеш» огазеяськонлэн Можга ёросысь ёзэзлэн кивалтӥсез, Кун Кенешысь депутат:

— «Удмурт Кенешлэсь» ёросысьтымы правленизэ чаклано ке, ог 85 процентэз — нылкышноос. Валамон, пиосмуртъёс но тросгес мед луозы кадь потэ. Но соос али золгес сюлмасько семьязэс сюдон, ваньбур поттон сярысь. Зэм, нылкышноос но ужало. Но пиосмурт дораз бертыса шутэтскыны тырше ке, кышномурт таин гинэ уг буйга.   Кышномуртъёс туж чидасесь. Общественной ужен вырон — туж секыт уж. Со трос дырез, сюлмаськемез кулэ каре. Ваньмыз уг чидало. Со гинэ ӧвӧл, кышномурт капчиенгес огкыл шедьтыны, кулэ дыръяз нялтас мыныны быгатэ. Нош общественной ужын со туж кулэ.

Тау кареме потэ общественной движение пыриськись вань нылкышноослы. Юнлыко, тазалыко мед луозы. Яркыт малпанъёссы котьку мед быдэсмозы. Бордазы мед басьтозы юн пиосмуртъёсты. Дуннеын удмурт нылкышноос кадь чебер сюлэмо адямиос ӧвӧл, дыр. Сотэк калыкмылэн азинлыкез ӧй луысал.

Елена МИННИГАРАЕВА

 

Удмурт Дунне
By Удмурт Дунне Март 15, 2017 12:10