Кызьы ужалод, озьы шутэтскод

Удмурт Дунне
By Удмурт Дунне Март 22, 2017 13:30

Реклама

Берло дыре музъем ужанын но сӥль-йӧл поттонын выль вормонъёс басьтэ «Балезиноысь сортоиспытательной станция» ООО. Люкысь хозяйствоез 9-тӥ арзэ будон сюрестӥ нуэ ни Россиысь аграрной университетэз быдтэм инженер Николай Волков.

«Балезиноысь сортоиспытательной станция» хозяйствоысь специалистъёс.

Будэто сое, ма пушъе

Гурт удысын вашкала дырысен валтӥсь инты басьтэ музъем уж. Огазеяськонын  сое ӟеч валало но арысь аре басьто гырон-кизён но ю аран машинаос. Татын ушъяло Пензаысь басьтэм пневматикаен ужась  сеялкаосты. Гырон-кизён дыръя соос юртто коньдонэз шӧдскымон шыръяны. Берло дыре гинэ хозяйство басьтӥз  2 берыкъяськись геры, турын рулонъёсты октӥсь подборщик, 2 пресс-подборщик но мукетсэ. Ваньмыз со юрттэ выль амалъёсты кутыса музъем ужанэз умоятыны, тросгес ю тысь люканы но ваньбурез шыръяны.

Люк фермаен кивалтӥсь М. Иванов.

Хозяйствоын музъем ужанэз туж валаса нуэ валтӥсь агроном Наталья Наговицына. удмурт кышномурт оскем ужзэ юн яратэ, туэ 22-тӥ тулысэз лудын пумитаны дасяське. Мылкыдыз умой, угось гырыны потон азьын трос лэсьтэмын ни. Кылем арын мында ик, 115 тонна, аммиак селитра дасямын — котькуд гектаре 10 килограмм шедёз. Валамон, со юрттоз умой урожай басьтыны. Соин ӵош ик хозяйствоын арысь аре нимысьтыз саклык висъяло таза, сортовой ю тысь уськытонлы. Вань кидыссы выльдэмын но нырысетӥ кондициозь вуттэмын. Кылсярысь, Грак ёросысь «Маргарита» чабей кидыс басьтӥзы, Глазов ёросысь — «Фалёнская-4» ӟег но «Конкур» сезьы. Наталья Наговицына шуэ:

— Хозяйство кукуруза уг будэты. Ми палан со ляб пушъе, муосмы начаресь. Сое лыдэ басьтыса, туэ уногес кизём викаен суро сезьы, чабей, рапс но судан турын. Оглом вераса, пудоослы арлы быдэ тырмыт сиён дасяськом. Сотэк хозяйство трос йӧл-сӥль ӧй поттысал.

Татын трос усто механизаторъёссы. Кылсярысь, Алексей Максимов та удысын 40 ар ужа ни, тыршемез пусъемын Удмурт Республикалэн Правительствоезлэн Данъян грамотаеныз. Механизаторъёслэн эшсы но юрттӥсьсы луэ сварщик Юрий Емельянов. Сотэк угось одӥг машина-трактор но уг тупатъяськы.

Та вакытэ механизаторъёс ӝутскем мылкыдын тулыслы техниказэс дасяло. Мастерскоязы вуим но паймим: отын гань-гань шуныт, ма, пе, алигес гинэ, толшоре, газ пыртӥзы. Табере котькыӵе кезьыт мед луоз, милемлы со кышкыт ӧвӧл, шумпотэмзэ вера диспетчер Андрей Наговицын.

Кылем сӥзьыл куазь зорыса улӥз ке но, огазеяськон 1 сюрс 494 тонна ю тысь кутсаз, яке гектарлы быдэ — 10 центнер пала, но тырмыт пудо сиён дасяз. Али со пуж-пуж йӧлын берытске.

Скал кыскись М. Касаткин.

Пудо утисьёс — адӟем карымонэсь

Люкъёс бадӟым саклык  висъяло пудо вордонэз азинтонлы но. Пудозылэсь лыдзэ йылэтыса, фермаоссэс выльдыса но ужан условиоссэс умоятыса, арысь аре уногес йӧл но сӥль потто. Миым тани котькуд скаллэсь 6 сюрс 150 килограмм йӧл кыскизы, нош ваньзэ — 3 сюрс 875 тонна. Кунян басьтӥзы 821 йыр, сӥль поттӥзы 241 тонна. Али гидъёсазы сылэ 2 сюрслэсь уно сюро таза пудозы, со пӧлысь 630-эз — скалъёс.

Вань пудозы 3 фермае интыямын. Соосты туж оскымон адямиос утялто. Тани Люк фермаын 200 пала скалъёсты кыско Людмила Наговицына, Михаил Касаткин, Сергей Касматуллин но Ольга Урсегова. Фермаен кивалтыны алигес оскизы котыр ласянь быгатӥсь воргоронлы Михаил Ивановлы.

Быгатыса ужа скал кыскись Михаил Касаткин. Со, анаезлэсь адӟем карыса, татчы ужаны лыктӥз, огвакытэ фермаен но кивалтӥз, 33 ар тырше ни. Алигес зарни юбилейзэ пусйиз. Ёросысь скал кыскисьёслэн конкурсъёсазы котьку вормисе потылэ, шаерысьтымы гурт удысъя но сиён-юонъя министерстволэн Данъян грамотаеныз пусъемын.

Люк, Сазан, Коршуново фермаосын но быдэс хозяйствоын ӟеч ужасьёссы трос. Соос вылын возиське но азинске гурт удыс.

Сварщик Ю. Емельянов.

Калык сярысь сюлмаськыса

Гурт хозяйствоын вис карытэк сюлмасько ужан условиосты умоятон сярысь. Миым КЗС-э газ вуттӥзы. Коньдон трос ке но быдтӥзы, со одӥг арскын берытскиз, ю тысь куасьтонзы умояз. Мастерское чагыр эстӥськон вуэм бере механизаторъёс огмылкыдын верало, таӵе шуныт азьын ужалом шуыса, йырамы ик, пе, ӧй вал.

Кивалтӥсьёс озьы ик уг вунэто пудо утисьёслэсь ужан условиоссэс умоятон сярысь. Скалъёссэс машинаен кыско, йӧл бадӟымесь танкъёсы вуэ. Кыедэз транспортёръёс потто. Адямиослы шутэтскыны горд сэрегъёс лэсьтэмын.

Люкъёс, лулысь-сюлмысь ужам сяна, мыло-кыдо пырисько ёросысь культура но спорт удысъёсын герӟаськем ужрадъёсы. Кылсярысь, туэ Балезино ёросын «ФевроМарт» спорт праздникын Люкысь команда нырысетӥ инты басьтӥз. Мукет ӵошатсконъёсын но бере уг кылё.

Геннадий Романов

Туспуктӥз В. Беломорских

Удмурт Дунне
By Удмурт Дунне Март 22, 2017 13:30