Кызьы утиськоно лек пыктослэсь?

Удмурт Дунне
By Удмурт Дунне Март 3, 2017 11:40

2017-тӥ ар сӥземын лек пыктосъёсын нюръяськонлы. Кызьы утиськоно та кышкыт черлэсь, кыӵе ужрадъёс таин валче элькунамы ортчозы? 

Ижысь зоопаркын ортчиз тазалыкез утёнъя министрен А. Чуршинэн (паллянысез) но эмъясьёсын пумиськон.

 

Мар утёз лек адӟонлэсь?

Пыктосэз алонлы сӥзем арез усьтон ортчиз Ижысь зоопаркын. Тазалыкез утёнъя министр Алексей Чуршин татчы вуиз быдэс командаен — министерствоысь валтӥсь специалистъёсын. Соос веразы лек пыктосъёслэсь утиськон амалъёс сярысь. Шуизы: адямилэн тазалыкез ачиз бордысь но потэ.

Алексей Чуршин таза улонэн эшъяськисьёс понна котыр ласянь адӟем карымон луэ. ГТО куронъёсты «зарнилы» быдэстӥз. Тамак кысконэз адӟемпотостэм каре — мукетъёссэ но та урод сямен эшъяськонлэсь алэ. Вераз ни: республикаысьтымы больницаослэн валтӥсь врачъёссы пӧлын уз луэ пурккетӥсьёс! Яке урод сямзылэсь куштӥськозы, яке выль уж утчано луозы!

Тамаклэсь куштӥсь-коно — та одӥгез валтӥсез дэмлан.

— Адями 5 ар ӵоже нуналлы быдэ 1 пачка тамак кыске ке, тазалыкезлы туж бадӟым кышкытлык кылдэ, — шуиз  А. Чуршин. — Лыдпусъёс возьмато: лек пыктосъёс ӵемгес кылдо ку вылын — яратӥськом шунды шорын пыжыны, егитъёс солярийёсы ветло. Озьы ик лек пыктосъёс аляло ты пушкы. Таиз меӵак герӟаськемын тамак кысконэн.

А. Чуршин верамъя, та урод сямлэсь куштӥськыны ноку бер ӧвӧл. Эшшо тамак кыскисьёслэсь нимысьтыз база кылдытоно, пе. Сое лыдэ басьтоно, медицина страхованиея полис люкылыку. Кыскись мурт полисэз, кӧня ке дун тырыса, мед басьтоз —  тазалыксэ ачиз быдтэ ук.

Валаса сиськоно, мугорез кыдатоно.

Уката пайдаё луо клетчаткаен узыр сиёнъёс, со — бакча емышъёс: кубиста, сугон, чеснок, помидор, кӧжы, бобы. Озьы ик эмезь, кудымульы, грецкой мульы, вож чай, банан, куркума. Ӝӧк вылын шергес мед луозы пӧраськемъёс — отысь углеводъёс уката бадӟым изъян ваё сакыр диабетэн курадӟисьёслы. Озьы ик лек пыктосъёслы будыны муг луо.

Та сяна, адями нуналаз ӝыны час ке но чылкыт омырын поръяны кулэ. Алексей Чуршин пусъе: берло дыре йылӥзы скандинав амалэн ветлӥсьёс, со туж умой.

Диспансеризациез ортчоно

Котькуд адями, 21 аресысен кутскыса, со пыр 3 арлы одӥг пол потыны кулэ. Чакламын пӧртэм анализъёс, флюорография, УЗИ…

— Онкомаркерен воргоронъёслэсь предстательной железазэс но эскериськом, — пусйиз Алексей Чуршин. — Приволжск федерал округе пырись улосъёс пӧлын сое лэсьто Удмуртиын гинэ. Жаляса верано, тросэз воргоронъёс тазалыксэс чик уг чаклало, эмъясьёслы уг возьматъясько. Соин ик нылкышноослы вазиськеме потэ: чаклалэ кузпалъёстэс, пиостэс, атайёстэс — мед ортчозы диспансеризациез.

Диспансеризация дыръя шараясько соку-соку гинэ кырмиськись висёнъёс но. Пӧлазы ик — лек пыктосъёс. Озьы кылем арын 525 таӵе учыр пусъемын, эшшо ог 1 сюрс муртлы мургес эскеронъёс пыр ортчыны дэмламын.

Кытын эскериськоно?

Адямиосты нырысь ик погырто сюлэм но сэр висёнъёс. Кыкетӥ интыын — лек пыктосъёс. Тросэз тодытэк уло, бордазы лек чер кырмиськемын шуыса. Угось эмъясьёслы 4-5 арен уг возьматъясько. Пыктосэн висисьёс уката трос Яр, Кизнер, Шаркан, Ува, Кияса ёросъёсын, Ижын.

— Лек пыктосэз дыраз шараяськод ке, сое вормыны луэ! — шуиз министр. — Уката сак кариськоно, выжыяды лек пыктослэсь шуге-леке вуэмъёс вань ке.

Алексей Чуршин верамъя, диспансеризация дыръя сяна, лек пыктосъёслэсь эскериськыны луэ мукет сямен но. Кызьы?

Нырысь ик, участокъя терапевт доры вазиськыса.   Эмъясьлэн маке шӧдонэз кылдӥз ке, со тӥледыз ачиз ик онкодиспансере келяны, онколог доры гожтыны быгатоз. Зэм, али та амал кӧня ке больницаосын гинэ кутӥське, но 2017-тӥ ар пумозь ужаны кутскоз вань эмъян учреждениосын. Со сяна, котькуд ёрос больницаын усьтэмын онкологъёслэн нимысьтыз кабинетъёссы, отчы но вазиськыны луэ.

Кыкетӥез, онкодиспансер ортчытъя «Усьтэм ӧсъёс» ужрад, котькуд мылкыд карись отчы лыктыны но тазалыксэ эскерыны быгатэ.

Куинетӥез, «Онкодесант» ужрадъёс дыръя. Эмчиос  асьсэос калык пӧлы потало. Тазалыкез утёнъя министерстволэн питран вылын комплексэз вань. Озьы специалистъёс, висёнъёсты шараяны юрттӥсь тӥрлыксэс кутыса, вуыло элькунысьтымы пӧртэм интыосы. Алексей Чуршин верамъя, берло дыре гинэ эскеремын ог 300 адями. Жаляса верано, со пӧлысь 26-езлэн лек пыктосэз шараямын. Та адямиос черламзы сярысь уг тодо на вал.

— 28-тӥ феврале специалистъёс ужалозы Ижысь Сенной базарын, — пусйиз министр. — Сьӧразы басьтозы туала куронлы тупась флюорограф, тазалыксэ эскерыны быгатоз котькуд мылкыд карись.

Элина Кумачёва

Удмурт Дунне
By Удмурт Дунне Март 3, 2017 11:40