Кызьы азинтоно кылэз глобализация вакытэ

Удмурт Дунне
By Удмурт Дунне Март 15, 2017 13:07

А. Егоров вераськиз К. Герд лыдӟонъёсын.

Александр Егоров,  

филология наукаосъя кандидат

Котькинлы тодмо: улон азинскемъя кыл но азинске. Шонергес вераса, сое азинтӥськомы асьмеос — анай кылын вераськисьёс. Но туала вакытэ юн шӧдӥське, дуннеысь тросэз кылъёс ог-огзылы матын луо, одӥгез кыл мукетсэ пыӵатэ шуыса.

Кутскон

Европаез учконо ке, литературной кылзэс кылдытон, утён сярысь отын туж сюлмасько. Кылсярысь, 17-тӥ дауре Германиын нюръяськизы немец кылэ пырем латин но француз кылъёслы пумит, 18-тӥ дауре чехъёс вераськонысьтызы немец кылъёсты палэнтыны выризы, финъёс — швед но немец кылъёсты, эстонъёс — немец но ӟуч кылъёсты. Выль кылъёс но нимкылъёс кылдытон бордын 3 даур ӵоже ужазы венгеръёс. Соос 10 сюрслэсь уно выль кылъёс малпазы.

Удмурт письменность кылдӥз 18-тӥ дауре, кириллица вылэ пыкиськыса. 18-тӥ даурлэн шораз черклэн мылкыдызъя кутске удмурт кылэз дышетон. 1775-тӥ арын печатлаське нырысетӥез удмурт грамматика. 2 даур ӵоже миссионеръёс но Россиысь тодосчиос лингвистикая материалъёсты люкало но радъяло. 19-тӥ даурлэн пумаз но 20-тӥ даурлэн кутсконаз та уж кужмоя, улонын огъя литературной кыл кулэ луэмен.

1917-тӥ арын Казане люкаське Поволжьеысь но Уралысь пичи калыкъёслэн ӧтчамзы. Отчы пырисько удмурт калыклэн дышетскем адямиосыз — публицист, филолог, этнограф Трофим Борисов, писатель, драматург но педагог Иван Михеев, прозаик, драматург но кылбурчи Константин Яковлев, кылбурчи, педагог, югдытӥсь, «Интернационалэз» удмурт кылэ берыктӥсь Максим Прокопьев но мукетъёс. Кенеше лыктэмъёс нырысь ик эскеризы удмурт калыклэсь дышетон удысын кылдэм ужпумъёссэ, котькудӥз ас вылаз басьтӥз учебникъёс кылдытон сярысь сюлмаськонэз. Трофим Борисов, кылсярысь, басьтӥськиз удмурт кылын гожъяськонъя учебник но удмурт-ӟуч кыллюкам кылдытон борды.

Но огъя удмурт литературной кыл кылдӥз 1920-тӥ аръёсы гинэ. Та ужез быдэстон понна трос лэсьтӥз удмурт кылэз улонэ пыӵатонъя ӧри (комиссия), кудзэ собере «Рудья» нимазы. Со быгатӥз удмурт литературной кыллы огъя правилоос кылдытыны но соосты юнматыны, выль нимкылъёс пыртылыса, удмурт кылэз узырмытыны.

Та ӧрилэн ик ӧтемезъя 1928-тӥ арын удмурт шаере вуылӥз тодмо ӟуч академик, филолог, историк, этнограф но археолог Николай Марр. Николай Яковлевичлэн дэмланъёсыз пӧлысь одӥгез таӵе вал: «Удмурт кылэ пыртылыны кулэлыкез ӧвӧл ни сыӵе калыкъёслэн кылъёсысьтызы нимкылъёсты (терминъёсты), кудъёсыз дунне вылын но ӧвӧл ни. Чаклалэ пичиослэсь, школаын дышетскисьёслэсь вераськемзэс. Дӥсьтыса пыртылоно книгаосы, гожъяно газетъёсы улэп кылэз. Озьы гинэ узырмоз но юнмалоз тӥляд кылды, валамон луоз вань удмуртъёслы».

«Шонер» но «янгыш» кылъёс

1920-тӥ — 1950-тӥ аръёсы литературной кыллы инъет быръемын вал, шонер гожъяськонъя но знакъёс пуктылонъя правилоос радъямын, поттэмын орфографияя  словарьёс, кылдытэмын школаослы удмурт кылъя но литературая выль учебникъёс. Соку та удысын сюлмо ужазы югдытӥсьёс Иван Яковлев, Михаил Ильин, Семён Жуйков, Кузебай Герд.

Удмурт кыллэн катъёсызлэсь луонлыкъёссэс кутыса но фин, ӟуч кылъёсты калька амалэн берыктыса, Кузебай Герд 300 пала выль кылъёс кылдытӥз. Соосты  печатлаз «Кенеш» журналлэн 1926-тӥ, 1928-тӥ аръёсы потэм куд-ог номеръёсаз. Кузебай Гердлэн тросэз выль кылъёсыз удмурт литературной кылэ пыризы, кылсярысь, таӵеосыз: верос, кылбур, кылбурчи, азьветлӥсь, ужазинлык, уждун, кунгож, йыръян, азькыл, инкуазь, инвис, дано ним, калыккылос (фольклор), быдӟала, мындала (тираж), йыруж, чильпыраны, азьланьлык но мукет. Кузебай Гердлэсь адӟем карыса, выль кылъёсты кылдытъязы газет поттонын ужасьёс, гожъяськисьёс но. Жаляса верано, Гердлэн ваньмыз ик малпам кылъёсыз литературной кылэ ӧз пыре.

1940-тӥ аръёсы Удмуртиысь коммунистъёслэн пленумзы ӵектэ ӧжыт вӧлмем «надуманной» терминъёслэсь мозмытскыны, кун, кенеш, пукран, курбон, быдӟым, эксэй выллем кылъёслэсь куштӥськыны, соос вашкала улонэз, буржуазной идеологиез возьмато шуыса. Пӧрмемзыя бигер луись кылъёсты но косэмын вал ӟуч кылъёсын воштыны. Озьы кутскиз удмурт литературной кыллэн азинсконаз 3-тӥез вакыт. 1940-тӥ — 1990-тӥ аръёсы туж трос ӟуч кылъёсты пыртыны ӧдъязы, удмурт кылын верано луонозэ но ӟуч кылын вераны но гожъяны кутскизы, кылсярысь: вазиськон интые — обращение,  ӟечкылан интые — приветствие, Вылӥ Кенеш интые — Верховной Совет, нимкыл интые — существительной, юан пус интые — вопросительной знак, уноян интые — умножение, кулэстон интые — вычитание. Договоричкыны, обижачкыны, соревновачкыны выллем кылъёсты но вераськонэ пумтэм трос кутыны ӧдъязы. Кылмылэн грамматической радызлэн удмурт вылтусыз но шӧмыз чылкак ышизы-быризы.

Оскон — егитъёслы

Та вакытэ литературной кыл, 1920-тӥ — 1950-тӥ аръёсын ӵошатыса, шӧдскымон азинскиз ке но, выль кылъёсты кылдытон ласянь уж ӧз нуиськы. 1980-тӥ аръёслэн пумазы но 1990-тӥ аръёслэн кутсконазы творчество удысын ужасьёс, тужгес ик книга-газет поттонын, радиоын, телевидениын тыршисьёс, гожъяськисьёс но тодосчиос нош ик басьтӥськизы удмурт кылэз узырмытон борды. Вераны кулэ: вакчи дыр куспын та удысын шӧдскымон азинсконъёс басьтэмын: выльысь улӟытэмын вунэтэм нунал но толэзь нимъёс, удмурт кыллэсь кыл пӧрмытон законъёссэ лыдэ басьтыса, трос гинэ выль нимкылъёс кылдытэмын. Соос пӧлысь уноез вераськонэ пыӵазы ни, кылсярысь: тӧро — председатель, тӧролэн воштӥсез — заместитель председателя, зарезьчи — моряк, крезьгурчи — композитор, кыкчи — двоечник, вераськет — диалект, вакытъян — периодиза­ция, Вылӥ Кенеш — Верховный Совет, камкоӵо — чайка, лулсэр — нерв но мукет.

Таин валче Удмурт Элькунысь Кун Кенеш 1995-тӥ арын «Удмурт нимкылъёсъя но шонер гожъяськонъя элькун ӧри сярысь» постановление кутӥз. Ӧрилэн ужамезъя 1995-тӥ арын удмурт сямен печатламын элькунмылэн выль Конституциез.

Ӧри радъяны кулэ выль нимкылъёс но валатонъёс кылдытонъя ужез, пумен соосты калыке вӧлмытыны. Та ужпумез быдэстыны нырысь ик юртто дышетӥсьёс,  дышетон пособиос, учебникъёс кылдытӥсьёс но тодосчиос. Угось пиналъёс ӝог валало но вераськоназы куто выль кылъёсты. Термино-орфографической ӧри-лы бадӟым юрттэт сётыны кулэ ивор вӧлмытон ёзъёс: газетъёс, журналъёс, радио но телевидение.

Бадӟым уж сылэ вал ӧри бордын ужась инты нимъёсъя ёзэт азьын но: вань ёросъёсы экспедициосы потано, карта вылэ пыртоно  инты нимъёсты. Ӧри азе озьы ик ужпум пуктэмын: пӧртэм пумо кыллюкамъёс, удмурт кыллэн грамматикаезъя учебникъёс кылдытоно. Куд-огез соос пӧлысь быдэстэмын ни, но троссэ эшшо лэсьтоно на.

Вератэк уг лу соизэ но: та ӧрилэн кылъёсыныз куд-огез соглаш ӧз кариське, «Удмурт дунне» газетын но трос гинэ ченгешонъёс вал. Талэн мугез, одӥг ласянь, со бордын но, дыр: выль кылъёслэсь пуштроссэс, кызьы пӧрмемзэс валэктытэк, соосты нуналмысь потӥсь газетъёсы печатлатэк, соку ик радиое но телевидение поттыны уг яра вал, дыр. Кыкетӥез муг: Конституциын трос гинэ пумисько юриспруденциен, политикаен, экономикаен герӟаськем кылъёс, кудъёсыз, удмурт кылын гинэ ӧвӧл, ӟуч кылын но тросэзлы валантэмесь луо.

Выль кылъёсты калыке вӧлмытон понна огез бадӟым вамыш лэсьтэмын ни мадьяр тодосчилэн Янош Пустаилэн юрттэменыз: удмурт школаослы дасямын 10 предметъёсъя кыллюкамъёс (математика, физика, химия, литература, информатика но мукет).

Оскисько, мынам гинэ ӧвӧл со малпанэ: тросгес нуоно выль кылъёс пумысен валэктон уж, ӵемгес печатлано выль кылъёсын нимысьтыз списокъёс, соослэсь пуштроссэс усьтыса но пӧрмемзэс валэктыса. Озьы гинэ быгатомы удмурт кылмес  чылкыт, чебер но узыр карыны.

Доклад чузъяськиз

20-тӥ Герд лыдӟонъёс дыръя. Сётэмын вакчиятыса.

Удмурт Дунне
By Удмурт Дунне Март 15, 2017 13:07