Кыл сётӥське «Удмурт Кенеш» огазеяськонлэн ёзъёсызлы…

Удмурт Дунне
By Удмурт Дунне Март 15, 2017 12:07

Кыл сётӥське «Удмурт Кенеш» огазеяськонлэн ёзъёсызлы…

Пичи Пурга ёросысь культурая юртын ужасьёс но уж доразы удмурт дэрем дӥсяса потӥзы.

Пичи Пурга

Кыл борды дэрем

  Пичи Пурга ёросысь Пуро-Можга гуртын улӥсьёс Анай кыллэн нуналаз дышетскыны но ужаны потазы удмурт дэремен.

— Уд оске, ява, чильпам айшетъёссэс, дэра дэремъёссэс дӥсяса но туго кышетъёссэс керттыса, нылкышноосмы со нуналэ ветлӥзы, — ӝутскем мылкыдын вера вуз карись Екатерина Байсарова. — Пиналъёс но штаниоссэс дӥсяллямтэ — ӝик-ӝик туала удмурт дэремен пӧрмытскиллям. Шоразы учкыса, улыны но ужаны мылкыд ӝутӥське. Ми быдэс гуртэн клубе потаськом, ваньмы ӵош концерт пуктӥськом. Анай кыллэн нуналэзлы сӥзьыса но, концерт дасямы. Кырӟам-верам сяна, пичиесь сценкаос пуктӥмы. Библиотекарьмы Людмила Романова визь сынан ортчытӥз.

Эгра

Мынам анай кылы удмурт, нош тынад?

Анай кыллэн нуналэзлы сӥзьыса, 21-тӥ феврале Эгра каргуртын пӧртэм ужрадъёс ортчизы. Со сярысь ивортӥз «Удмурт Кенеш» огазеяськонлэн ёросысь ёзэныз кивалтӥсь Татьяна Мосова. 

Кылем арын сямен ик, туэ но Эгра каргуртэтӥ 2 номеро автобус удмурт артистъёсын ворттылӥз. Сэпысь арганчиос Алексей Лекомцев, Дмитрий Перевощиков, Кабачигуртысь Семён Чураков но Константин Агафонов, сьӧразы  Лӧпшо Педуньзэс кутыса, автобусын мынӥсь-бертӥсьёслы капчи мылкыд кузьмазы.

Кабачигуртын но ёрос библиотекаосын мылкыд карисьёс удмурт кылъя диктант гожтӥзы, Бадӟым Пурга школаысь дышетскисьёс, гуртысьтызы пӧртэм организациосы пыраса, анай кыллэн нуналэз сярысь адямиослы тодазы вайытӥзы. Зураысь культурая юртын «Жингырак» фестиваль ортчиз, Эгра каргуртысь Эшъяськон юртын пӧртэм выжы калыкъёслэн концертсы вал. Ӝытазеяз ёрос библиотекае люкаськылӥзы удмурт культураез гажасьёс, анай кылэз дышетонъя курсъёсы ветлӥсьёс. Шумпотоно, тросэз соос удмурт дӥськутэн вал.

Сюмси

Котькудӥз калык — Россилэн зарни шапыкез

21-тӥ тулыспалэ, Анай кыллэн нуналаз,  ёрос администрациын ӵукна вазь ик шулдыр но тунсыко вал.

«Удмурт Кенеш» огазеяськонлэн Сюмси ёросысь ёзчиосыз но «Удмурт нылкышно кенеше» пыриськисьёс, «Кенакъёс» но «Жингыриос» ансамбльёсын кырӟасьёс ӵукна вазь ик, удмурт дэремъёссэс дӥсяса, шулдыртӥзы ужаны лыктӥсь калыкез. Котькуд пырись шоры «Ӟечбуресь!» шуыса вазизы, ваньзэ куноятӥзы пӧсь табанен, перепечен, кокрокен но мильымен.

Со нуналэ ик «Ужан нуналэ — удмурт дӥсен» флешмоб ялӥмы на. Ужрадэ мыло-кыдо пыриськизы Сюмси ёрос администрацилэн йырызлэн воштӥсез Людмила Даровских, ёрос библиотекаын но культура юртын ужасьёс, Сюмсиысь «Берёзка», «Рябинушка», «Колобок» нылпи садъёсын ужасьёс, Сюмси, Орловской, Муки-Какси школаосын удмурт кылэз дышетӥсь нылпиос но Сюмсиысь нюлэс но гурт удысъя техникумысь егитъёс.

«Берёзка» нылпи садэ пырон доры «Ӟечбуресь!», «Гажаса витиськом!» кылъёс гожтэмын вал. Вань ужасьёс но нылпиос удмурт дӥськутъёсын лыктӥзы. Пиналъёсты удмурт сиёнъёсын сюдӥзы. Ёрос библиотекаын радъямын вал удмурт писательёслэн книгаосынызы «Ми улӥськом Удмуртиын» адӟытон.

Асьмеос странамылэн зарни шапыкез луиськом. Нылпиосмес пичи дырысен анай кыллы дышетоно!

Глазов

Быдэс арня кылбуразы

 Анай кыллы сӥзьыса, Глазов ёросысь Дондыкар шор ёзо школаысь нылпиос арня ӵоже пӧртэм ужрадъёс ортчытӥзы.

— Нуналлы быдэ урокъёсмы кылбуръёс бордысен кутскылӥзы, — вера удмурт кыллы но литературалы дышетӥсь Раиса Резенова. — Котькудӥз пинал яратоно кылбурчиезлэсь чуръёссэ лыдӟиз но солэн улон-вылонэныз но творчествоеныз тодматӥз. Анай кыллэн историезлы сӥзьыса, викторина ортчытӥмы на. Ваньмыз-ӧвӧлэз 10 юан дасямын вал. Котькинлэсь усто валэктонъёс сётӥзы 8-тӥ классысь Маргарита Баженова но 5-тӥ классысь Валерия Королёва.

Таӵе ужрадъёслэн пайдалыксы туж бадӟым: нылпиос вожвылъяськонъёсы шумпотыса пырисько, ог-огзы сьӧры уйисько, шаермы но кылмы сярысь трос выльзэ тодо.

Кез

Батыръёс  пӧраськизы

Ёросысь егит пиос пӧлын «Удмурт батыр» вожвылъяськон ортчиз.

Со сярысь вераз удмурт культурая ёрос центрысь ёзэн кивалтӥсь Светлана Назарова. Ужрадэ 3 поселениысь 18-ысен 35 аресозь 6 егит пиосъёс пыриськизы. Соос визьзэс возьматӥзы, перепеч кыӵ но пельнянь кутћзы, кырӟазы-веразы. «Удмурт батыр» ним сётэмын Гыя гуртысь Григорий Харитоновлы. 2-тӥ интые потӥз Олыпысь Артур Иванов. 3-тӥ луиз но «Удмурт Кенеш» огазеяськонлэсь нимысьтыз кузьымзэ утӥз Сьӧдбамгуртысь Иннокентий Волосков. Со, арганэн шудэм сяна, паймытӥз пӧраськыны быгатэменыз. Ваньмыз кышномуртъёс но солэн кадь чебер перепеч кыӵ, пе, лэсьтыны уз быгатэ.

Б. Семёнов И. Иванов сярысь тодэ ваёнъёссэ вера.

Алнаш

Нимыз уз вуны

Кылем арняе «Алнаш колхозник» ёрос газетлэн юртэз бордын Иосиф Ивановлы буре ваён пул усьтэмын вал.

Иосиф Иванов — Удмуртиысь культура удысысь дано ужась, Алнаш ёрослэн дано муртэз. Со 35 ар тыршиз ёрос редакциын, со пӧлысь 25 арзэ — редактор луыса.

Буре ваён ужрадэ вуылӥзы ёрос администрациысь ужасьёс, Иосиф Зотовичлэн эшъёсыз, тодмоосыз, ӵыжы-выжыосыз, творчествозэ гажасьёс. Соос пӧлын вал Печатья но ивор вӧлмытонъя агентстволэн кивалтӥсезлэн воштӥсез С. Васильев, Россиысь Кунсьӧр ужъёсъя министерствоын ужам дипломат Б. Семёнов, элькунысьтымы Журналистъёслэн огазеяськонэнызы кивалтӥсь Л. Прокошева, Удмурт кун университетысь тодосчи А. Шкляев.

— Та ужрад — ёросмылэн историяз гинэ ӧвӧл, быдэс Удмуртилэн историяз синйылтымон, — пусйиз Борис Семёнов. — Со юрттоз Иосиф Зотовичлэсь нимзэ пыраклы кельтыны.

Буре ваён пулэз усьтон йылпумъяськем бере ортчизы И. Ивановлы сӥзем лыдӟонъёс.

«Герд» 

 

 

 

Удмурт Дунне
By Удмурт Дунне Март 15, 2017 12:07