Кун Кенешын ортчиз кунлыклы сӥзем урок

Удмурт Дунне
By Удмурт Дунне Март 30, 2017 10:20

Пумиськонын егитъёс тодӥзы, Удмуртилэн историяз 3 Конституция вал шуыса — 1937-тӥ, 1978-тӥ, 1994-тӥ арын юнматэмъёсыз.

Арня вискын Кун Кенеше люкаськылӥзы Удмурт кун университетысь студентъёс. Егитъёс понна ортчиз шаермылэн кунлык басьтэмезлы сӥзем урок.

Пумиськонын егитъёс тодӥзы, Удмуртилэн историяз 3 Конституция вал шуыса — 1937-тӥ, 1978-тӥ, 1994-тӥ арын юнматэмъёсыз. Нырысетӥ Конституцимылы 80 ар тырмонлы сӥзем пул усьтэмын вал 14-тӥ мартэ. Сое кылдытонлэн кулэлыкез сярысь вераз Кун Думаысь депутат, история наукаосъя доктор Алексей Загребин. Со пусйиз, кыӵе бадӟым уж лэсьтӥзы  валтӥсь законмес кылдытон понна удмурт югдытӥсьёс Трофим Борисов но Иосиф Наговицын.

Озьы ик студентъёс 1994-тӥ арын кутэм Конституция сярысь видеофильм учкизы. Сое кылдытон бордын тыршизы УдГУ-ысь  дышетӥсьёс но. Тунсыко, соку куд-огез дэмла вылэм Удмуртилы Президентэ одно ик удмурт выжыысь адямиез бырйыны, озьы ик ӵектэмын вылэм школаосын одно ик удмурт кылэз дышетыны. Но со Конституцие ӧз пыры.

Туала Конституцие пыртэм воштӥськонъёсын тодматӥз Кун Кенешысь депутат Алексей Вахрушев. Со пусйиз, берло 5 ар куспын 2 воштӥськон юнматэмын вал. Кылсярысь, берлоез герӟаськемын Куш Кенешысь депутатъёслэсь лыдзэс кулэстонэн. Туэ сентябрь толэзе 90 интые 60 депутат бырйиськоз ни.

Ангелина Снигирёва

Удмурт Дунне
By Удмурт Дунне Март 30, 2017 10:20