Кин вылын возиське гурт?

Удмурт Дунне
By Удмурт Дунне Март 15, 2017 14:23

Чистостемысь Л. Рудакова но З. Злобина уже мыно.

Туннэ гуртысь улон возиське секыт ужлэсь кышкасьтэм адямиос вылын. Сыӵе муртъёс пӧлы пыртысал Ува ёросысь Чистостем гуртысь мыло-кыдо нылкышноез Людмила Рудаковаез. 

Людмила Евгеньевна 30 ар «Ударник» эштосын тырше ини. Чупырес кышномурт огдыре пудоосты эмъяны, фермаен кивалтыны но зоотехникын ужаны вуттӥське. Шунды ӝужаку ик, Л. Рудакова пыд йылаз ни, вазь ӵукна фермае вамыштэ. Дораз пыре бер ӝыт гинэ. Людмила Евгеньевна ужзэ вань сюлмыныз яратэ, котькуд скал, кунян понна сюлмаське. Лякыт сямо кышномурт вӧзысьтыз адямиосын но,  пудоен но огкыл шедьтэ.

Калыкмы сое Чистостем муниципал кылдытэтэ депутатэ бырйиз. Озьы со 20 арлэсь ятыр калыкеныз оскем ужзэ ӟеч быдэсъя. Со сюлмаськемен, толалтэ лымыен согиськем сюресъёсмы мычисько, тулыссэ урамъёсмы чылкытатӥсько, со быгатэ калыкез огазеяны.

Людмила Евгеньевналэн Роман пиез но анаезлэсь уг кыльы. Пияш улонзэ пудо-животэз утёнэн герӟаны малпа. Можга городысь пудоосты эмъянъя колледжез горд дипломен йылпумъяса, али дышетске Ижысь гурт удысъя академиын. Практиказэ Чистостемысь фермаын анаез бордын ортчылэ. Городысь дораз бертылыкуз, фермае пыратэк уг ӵыды. Со каникулъёсаз анаезлы ялан юрттӥське.

Мон шуысал, Людмила Рудакова кадь адямиос вылын гурт удыс но гурт улон возиське. Соос асьмелэн сюдӥсьёсмы луо, сыӵе адямиослы луыса Удмуртия гинэ ӧвӧл, быдэс Россимы но азинске.

Евгений Эжбаев,

                 Ува ёросысь Чистостем гурт

Удмурт Дунне
By Удмурт Дунне Март 15, 2017 14:23