Казаньын ужа удмурт егитъёслэн радиопередачазы

Удмурт Дунне
By Удмурт Дунне Март 22, 2017 16:09

Туннэ Казаньысь федеральной университетысь студентъёслэн радиозылэн тулкымъёссы вылын — ufmradio.ru — ужаны кутскиз удмурт передача. Сое нуизы Казаньын вылӥ тодон-валан басьтӥсь егитъёс Алина Крестьянинова но Анна Самсонова.

Удмурт передача мыноз арнялы быдэ. Вуоноез потоз вуоно вирнуналэ, Москваысь дыръя — 14.00 часын.

Ӝыны час ӵоже меӵак эфирын нылъёс веразы, кызьы соос Казане дышетскыны вуизы, кыӵе потӥз соослы та кар. Вераськон пумын чузъяськиз Мария Бочкарёвалэн, Казаньысь консерваториын дышетскись удмурт ныллэн, кырӟанэз.

Анна Самсонова дышетске Казаньысь культурая кун инстиутын, шуэ егитъёслы туж трос луонлыкъёс сётӥсько Казаньысь университетъёсын. Алина Крестьянинова тодон-валан басьтэ спортъя академиын.

— Нырысетӥ араз мон Казане электричкаен ветлӥ, удмурт вераськемъёсты кылыса, пайми, Казаньын сомында удмуртъёс уло-дышетско шуыса. Но, жаляса верано, соос огазьын ӧвӧл. Каллен-каллен мон соосын тодматскыны но эшъяськыны кутски, — вера Алина Крестьянинова.

Берло дыре Татарстанысь удмуртъёслэн автономизы трос пумо удмурт ужрадъёс ортчытъяны кутскиз. Удмурт передачаос но вордӥськизы солэн кичӧлтэмезъя. Егитъёс люкаськыло Казаньысь Эшъяськон юртын,  элькуназы пӧртэм ёросъёсын улӥсь удмуртъёс доры пумиськонъёсын, концертъёсын потало. Озьы Казаньын улӥсь егитъёс ог-огенызы кусып возё.

Удмурт передача мыноз арнялы быдэ. Вуоноез потоз вирнуналэ, Москваысь дыръя 14.00 часын.

УД

Туспуктӥз Марина Иванова

Удмурт Дунне
By Удмурт Дунне Март 22, 2017 16:09