Калыкез югдытӥз «Войнаысь ивор»

Удмурт Дунне
By Удмурт Дунне Март 23, 2017 16:04

«Войнаысь ивор» газетлэн нырысетӥ номерез.

Нырысетӥ дунневыл ож дыръя потӥз удмурт кылын нырысетӥез газет — «Войнаысь ивор». Ӵапак со бордысен кутскиз шаерысьтымы туала печатьлэн историез,  шуэ история наукаосъя доктор Алексей Загребин.

«Удмурт дунне» газетлы — 100 ар: Аръёс. Вакытъёс. Адямиос» энциклопедиысь тодӥськом: калыклы вормон мылкыд пыӵатон понна Вяткаысь губернатор Андрей Чернявский Россиысь Правительстволэн нимыныз пӧртэм газетъёс кылдытон сярысь распоряжение гожтӥз. Удмурт кылын газетэз нимазы «Войнаысь ивор».

Солэн нырысетӥ номерез потӥз 1915-тӥ арын 4-тӥ феврале. Печатласькиз Вятка (али Киров) городысь губернской земстволэн типографияз.

Редакторе юнматӥзы Пётр Павлович Глезденёвез. Чакламын вал газетэз кык арнялы одӥг пол поттыны. Но 1915-тӥ ар ӵоже 9 номер гинэ потӥз. «Войнаысь иворлы» гожтӥськизы 300 удмуртъёс, вуттӥзы сое 36 библиотекаосысь лыдӟон залъёсы, 60 миссионер школаосы. 1916-тӥ арын газетэз басьтӥз 360 мурт.

«Войнаысь ивор» калыкез югдытыны, вормон мылкыд пыӵатыны выриз. Со ӧтьылӥз: «Одӥг коркан лыдӟем бере бускельёслы но коркась корка сётъяны косӥськом».

Ожмаськонэз возьматэм сяна, отын калыклэн  улэменыз тодматӥзы, дышетон но тазалыкез утён ужпумъёсын герӟаськем материалъёс печатласькизы. Черкын ужасьёс, югдурез валэктыса, газет бамысь вазиськылӥзы удмуртъёслы. Агрономъёс но визь-кенеш сётылӥзы.

 

 

 

Удмурт Дунне
By Удмурт Дунне Март 23, 2017 16:04