К. Герд нимо премилэн лауреатъёсыныз тодматскон

Удмурт Дунне
By Удмурт Дунне Март 10, 2017 13:36

Кузебай Гердлы сӥзем конференциын пусйизы К. Герд нимо премилэсь лауреатъёссэ. Котькудӥз лауреат удмуртлыкез ӝутон понна лул-сюлэмзэ сётэ.

Татьяна Никитична но Василий Ермолаевич тодмо луо уно аръёс ӵоже удмуртлыкез, удмурт культураез ӝутон бордын тыршеменызы.

 

Татьяна Москвина — удмурт калык дӥсьлы сӥзем «Дэрем» студилэн кивалтӥсез, шаерысьтымы тодмо реставратор но Василий Москвин — «Удмурт Кенеш» огазеяськонлэн Пичи Пурга ёросысь ёзэзлэн кивалтӥсез, Пичи Пурга ёросысь Депутатъёслэн Кенешсылэн тӧроез.

Татьяна Никитична но Василий Ермолаевич тодмо луо уно аръёс ӵоже удмуртлыкез, удмурт культураез ӝутон бордын тыршеменызы. Одӥгез тужгес синмаськымон, йӧно удмурт семья.

Татьяна Никитична вордӥськемын Пичи Пурга ёросысь Гожня гуртын. Дышетскемын Удмурт кун университетысь художественно-графической факультетын. 35 ар ӵоже ужа Удмурт Элькунысь суредан искусствоосъя музейын, фондъёссэ узырмытон, утён сярысь сюлмаське. Ӵемысь экспедициосын поталля удмуртъёслэн улон-вылон интыосазы, пӧртэм пумо удмурт басмаосты (бӧзъёсты) бичан, соосты утён сярысь сюлмаське, куиське, пужыятске, ас киосыныз пӧртэм арбериос лэсьтэ. Вань та быгатонъёсыз вылэ пыкиськыса ик, реставраторе дышетсконо кариськиз на. Стажировказэ ортчиз Москваын, наукая но реставрацияя И. Грабарь академик нимо центрын. Озьы туннэ нуналлы республикаямы черк, граждан но крестьян дӥсез, изьыосты, пужыосты, выж лёгетъёсты выльдонъя, Татьяна Москвина кадь мукетыз специалист ӧвӧл ни. Реставратор луыса со 25 арлэсь кема тырше ни.

Удмурт калыкмылэн вашкала дӥсезлы синмаськыса, Татьяна Никитична ачиз но басьтӥське дэрем коллекциос вурон борды. Аслэсьтыз тодон-валанзэ усьтэ егитъёслы но, пӧртэм мастер-классъёс радъялля, семинаръёс ортчытъя. Коллекциоссэ адӟыны луэ республикаямы ортчылӥсь пӧртэм возьматонъёсын, конференциосын, семинаръёсын. Дэремъёссэ басьтӥзы ни Венгриысь, Финляндиысь, Германиысь, Швейцариысь, Франциысь, США-ысь коллекционеръёс.

Татьяна Никитичналэн кузпалыз Василий Ермолаевич — выжыезъя Пичи Пурга ёросысь Баграш-Бигра гуртысь. Дышетскиз Ижысь механикая институтын, радиоинженер луиз. Пургалан пӧртэм кивалтон ёзъёсын тыршемын. Депутатъёслэн ёрос Кенешенызы кивалтон вакытаз ёросысь ваньмаз 70 гуртъёсын кылдытэмын вал аскивалтонъя рос-прос ужась ёзъёс. Та ужез Удмуртиысь Вылӥ Кенеш умоен лыдъя, интыысь аскивалтонъя законэз дасяку, лыдэ басьтэ.

10 ар ӵоже Василий Ермолаевич кивалтэ ёросысь электросвязен. 1990-тӥ арын УАССР-ысь Вылӥ Кенешлэн депутатэз луэ, культурая но дышетонъя комиссилэн ужаз пыриське. Та вакытэ ик Ижысь «Удмурт клубен» кусып тупатэ, удмуртъёслэсь нырысетӥ ӧтчамзэс дасянэ итӥське. Мыло-кыдо пыриське съездлэсь документъёссэ, удмурт огазеяськонлэсь уставзэ дасянэ. Бӧрысь съездъёслэн делегатсы вал, 4 пол — мандатъя комиссилэн тӧроез.

Василий Ермолаевич 25 ар пала ни пыриське «Удмурт Кенеш» огазеяськонлэн ужаз, 5 ар ӵоже правленилэн тӧроез луэ, пӧртэм фестивальёсты радъян сярысь сюлмаське. Кылсярысь, туж тунсыко ортче нылпиослэн «Ми удмуртъёс — милям ваньмыз рос-прос!» фестивальзы.

2010-тӥ арын Татьяна но Василий Москвинъёс кылдыто калык дӥсья студия. 5 ар ӵоже гинэ та студия 5 сюрслэсь трос костюмъёс, пӧртэм дӥсьёс вуриз. Та синмаськымон семья 3 пинал будэтӥз. Нылпиоссы вылӥ тодон-валан басьтӥзы, асьсэ удысъёссыя вормонъёс басьтыса тыршо.

Вячеслав Кудрявцев — композитор, Можга ёросысь удмурт эстрадая «Марӟан» коллективез кылдытӥсь, солэн хормейстерез.

 

Вячеслав Кудрявцев — композитор, Можга ёросысь удмурт эстрадая «Марӟан» коллективез кылдытӥсь, солэн хормейстерез.

Вячеслав Николаевич пичиысен ик яратӥз вордӥськем шаерез сярысь кырӟанъёс кылзыны. Йылпумъяз ляб адӟисьёслэсь Сарапулысь нимысьтыз школазэс. 1970-тӥ арысен улыны выжиз Можга городэ, ужаз Россиысь синтэмъёслэн обществозылэн предприятияз. Огвакытэ ик городысь вокально-инструментальной ансамбльлэн солистэз вал, бӧрысь «Дубитель» культура юртын — аккомпаниатор, «Эктон гур» ансамбльын кырӟаз но гитараен шудӥз, эшшо кӧня ке ансамбльёсын баянэн шудӥз. Нош 1982-тӥ арын кылдытӥз аслэсьтыз «Нюанс» ансамбльзэ. Трос аръёс ӵоже Можга городын та ансамбль тужгес устоеныз лыдъяськиз.

Вячеслав Николаевич — самодеятельной композитор, солэн 100 пала кырӟанъёсыз, куинь дискез. Уноез кырӟанъёсыз сӥземын вордӥськем шаерезлы, анай кыллы, сям-йылолъёслы, культуралы. Троссэ кырӟанъёссэ быдэстэ удмурт эстрадая «Марӟан» ансамбль. Та ансамблез но композитор ачиз кылдытӥз.

Вячеслав Кудрявцев — Удмурт Элькунысь культура удысысь дано ужась. Та дуннеез вань адямиос сямен синмыныз адӟыны уг быгаты ке но, уг ӝожомы. «Мон дуннеез сюлмыным адӟисько», — шуэ крезьгурчи.

Арво Валтон вордӥськемын 1935-тӥ арын. Дышетскемезъя — гурезь инженер. Но егит дырысеныз веросъёс, кылбуръёс, романъёс, сценарийёс гожъяны кутске.

 

Арво Валтон — Эстониысь писатель, Фин-угор писательёслэн калыккуспо ассоциацизылэн азьвыл  кивалтӥсез.

Арво Валтон вордӥськемын 1935-тӥ арын. Дышетскемезъя — гурезь инженер. Но егит дырысеныз веросъёс, кылбуръёс, романъёс, сценарийёс гожъяны кутске. Трос лэсьтэ фин-угор литератураез эстон кылэ берыктон понна. Солэн сюлмаськемезъя фин-угор литературая антологиос но книгаос сузен-сузен потазы. Озьы «Фин-угор поэзилэн классикаез» сериын туннэ нуналлы потэмын 4 антология. Отын возьматэмын удмурт кылбурчиослэн творчествозы но: Г. Верещагин, М. Ильин, К. Герд, А. Оки, Н. Байтеряков, А. Белоногов, В. Романов, Ф. Васильев.

2-тӥ сузьет (серия) сӥземын фин-угор нылкышно поэзилы. Та сузьетысь одӥгез книга сӥземын А. Кузнецова, Л. Кутянова, Т. Чернова но Г. Романова кылбурчиосмылы. Нош 3-тӥ сузьет фин-угор литератураысь тужгес яркыт кылбурчиос сярысь. Татысь адӟыны луэ К. Гердлэсь, А. Окилэсь, Ф. Васильевлэсь, Омель Ладилэсь, П. Захаровлэсь, В. Шибановлэсь, С. Матвеевлэсь, В. Ар-Сергилэсь, Р. Минлэсь кылбуръёссэс. Тунсыко луэ 4-тӥ сузьет. Таяз — егит фин-угор поэтъёс: Муш Нади, Л. Орехова, А. Очей, Л. Марданова, З. Рябинина, Л. Бадретдинова но Е. Макарова. Нош удмурт прозая антологие пыртэмын 34 удмурт авторлэн 36 произведениез!

Малы Арво сокем сюлмаське удмурт литература сярысь?

«Удмурт литератураын вань сыӵеез, мар ӧвӧл дуннеысь нокыӵе литератураосын. Со туж аспӧртэмлыко, турлы-турлы… Европае удмурт литература вае чылкытлыкез, со улыны кужым сётэ…» — шуэ ачиз Арво Валтон.

Елена ВАСИЛЬЕВА

Туспуктӥз А. Горбунов

Удмурт Дунне
By Удмурт Дунне Март 10, 2017 13:36