К. Герд нимо гимназиын дышетскыны мылкыд карисьёс трос

Удмурт Дунне
By Удмурт Дунне Март 9, 2017 11:10

К. Герд нимо гимназиын дышетскыны мылкыд карисьёс трос

Вождэс эн вае, инты ӧвӧл ни

1-тӥ февральысен анай-атайёс 1-тӥ классэ дасяськись нылпиоссэс школае гожтыны кутскизы. Кызьы та нунал ортчиз элькунамы?

Бырйиськон

Дышетонъя но наукая министерстволэн лыдпусъёсызъя,  школа партаос сьӧры туэ нырысьсэ пуксёзы 17 но ӝыны сюрслэсь ятыр нылпиос. Умой-умой лыдпус тодмо луоз, пе, 1-тӥ сентябрь азьын. Нош туннэ анай-атайёс чаклало на: кыӵе школае пиналзэс сётыса умойгес луоз. Азьло аръёсы сямен ик, 1-тӥ классэ мынӥсьёслэсь документъёссэс кутон ортчоз 2 люкетэн. Школаос нырысь ик лыдэ басьтозы улон интыя регистрациез — таӵеослэсь заявлениоссэс возьмало июнь пумозь. Интыос кылизы на ке, 1-тӥ июльысен 5-тӥ сентябрёзь кутозы ни кылемъёсызлэсь документъёссэс — лыктыны быгатозы вань мылкыд карисьёс. Куриськон сётыны луэ, школае лыктыса но, кун услугаосъя портал пыр но.

Зэм, вань дышетон организациосъя югдур одӥг кадь ӧвӧл. Кылсярысь, Ижысь улӥсьёсты вазен ик алӥзы ни: 29-тӥ, 25-тӥ, 41-тӥ, 44-тӥ лицейёс но 30-тӥ школа быдэс город понна ужало. Отын уг чаклало улон интыез — кин нырысь  вазиськоз, солэсь ик документъёссэ кутозы. Озьы татын арысь аре одӥг кадь югдур: анай-атайёс нылпизэс гожтон понна уйбыт черодъёсын сыло.

Возьмаськон

Кузебай Герд нимо гимназие куто быдэс элькунысьтымы пиналъёсты. Куриськисьёс берло 3-4 арзэ  уката трос луизы. Югдур пӧртэм ӧвӧл туэ но. Озьы 1-тӥ феврале гимназия азе 6 часын ӵукна ик анай-атайёс кыстӥськыны кутскизы ни.  Нош заявлениосты кутыны кутско 10 часысен.

Вазь ӵукна ик кабинетаз вуиз директорлэн информатизацияя воштӥсез Владимир Васильевич Волков. Эскериз: Интернет вань-а, кун услугаосъя порталэ пырыны луэ-а…

— Туэ 2 класс усьтом, 50 пиналэз кутом, — уж висказ валэктӥз со. — Но милям нылпи садъёсмы вань на, нырысь ик кутӥськом отчы ветлэм нылъёсты но пиосты. Туэ пӧлысьтызы 36-ез гимназие кыльыны мылкыд каризы. Озьы буш интыосмы 14 гинэ кылемын. 7-зэ кутом кун услугаосъя портал пыр гожтӥськисьёс пӧлысь, эшшо 7-зэ — «улэп черодын» сылӥсьёс пӧлысь. Законъя пиналлэсь тодон-валанзэ ми эскерыны ум быгатӥське, лыдэ ум басьтӥське улон интызэ но. Соин ик кин нырысь вуттӥськоз, солэсь ик документъёссэ кутом.

…Нош ӧс сьӧрын кемалась 30-40 муртлэсь черод кылдэмын ни. Соос умой тодо: кутозы нырысетӥосызлэсь гинэ пиналъёссэс.

Ольга Анисимовалэн мылкыдыз каньыл: черодын со 4-тӥ, эшшо ке кузпалыз Интернет сьӧрын пуке, 10 час луиз ке, кун услугаосъя портал пыр куриськон ыстоз.

— Гимназия азе вуылӥм ни 28-тӥ, 29-тӥ январе ӝытлань но. Машинаын пуким, возьмам, черод кылдытӥсьёс луозы-а шуыса, — вера нылкышно. — 3 нунал талэсь азьло черодын 18 мурт вал ни. Картэ кӧня ке нуналлы ужысьтыз юромо куриськиз. Туж потэ, пимы татын мед дышетскоз шуыса. Нылпи садэ но татчы ветлыны чакласьком вал, 2 пол куриськон но гожъям — инты ӧвӧл, шуизы. Семьямы чылк-чылк удмурт. Пимы но удмурт кылэз вала, вераське.

Пичияк осконзы гыбда черод пуме кылемъёслэн но.

— Мон черодын 18-тӥез, — вера Александр Голубин. — Но возьмасько, оло, удалтоз ик. Туж потэ Полинамес татчы сётэммы. Анжелина нылмы но гимназиын ик дышетске, 5-тӥ классэ ветлэ ни.  Туж умой луысал, кыкназэс но одӥг азе сётыса, келяны-пумитаны каньыл. Корка пуктӥськом город сьӧры, отын школа ӧвӧл. Татчы сюрыны мылкыдмы соин но туж бадӟым: нылпиосмы анай кылзэс медаз вунэтэ. Семьяямы удмурт вераськиськом, но со гинэ ӧжыт…

Черодысь анай-атайёслэсь юасько: эшшо кин удмурт сямен вераське? Куинез-ньылез гинэ кизэ ӝутэ.

— Удмуртэз уд тодӥське, малы пиналдэс удмурт гимназие сокем сётэмды потэ? — юасько кылемъёсызлэсь.

Зэм, табере черодысь отысь но татысь кылӥськыны ӧдъяз: тросэз удмуртъёс, но кепыраськом, чылкыт вераськыны быгатымтэысьтымы. Выжыосмы чылкак удмуртъёс.

— Гимназие 1-тӥ классэ куриськисьёс трос бере, усьтыны уг луы меда ватсаса эшшо одӥг ке но класс? — вераськыны кутскиз черод. — Нош малы меда гимназиез паськытатонтэм? Ильфат Закиров урамын выль школа лэсьтӥське, сое но удмурт гимназия мед карозы вал, со котырын туж трос егит семьяос уло ук, пӧлазы удмуртъёс но ӧжыт ӧвӧл…

Ӝожомон

Куриськонъёсты кутон ӝог йылпумъяськиз. Но анай-атайёслэн мылкыдзы кема тулкымъяськоз на, вылды. Зэм, дышетӥсьёслы но капчи ӧй вал вераны: вождэс эн поттэ, инты ӧвӧл ни.

— Кун услугаосъя портал пыр 100-лэсь ятыр куриськон басьтӥм, — пусйиз Владимир Волков. — Куд-огезлэн вуон виссы ӝыны секундэн висъяське. Соосты эскером на. Собере ваньзылы валэктонъёс ысъялом.

Ватсаса класс усьтон сярысь татын уг верасько — гимназилэн сыӵе луонлыкез ӧвӧл, со сяна, гимназиын сотэк но арысь аре ӟоскытгес луэ. Ог 3 ар талэсь азьло татын 600 пала дышетскисез вал ке, али 700-лэсь ортчемын ни.

Элина Кумачёва

 

Удмурт Дунне
By Удмурт Дунне Март 9, 2017 11:10