Йылпумъяськиз «Будӥсь писательлэн ӝӧк сьӧраз» литературной конкурс

Удмурт Дунне
By Удмурт Дунне Март 17, 2017 15:09

«Будӥсь писательлэн ӝӧк сьӧраз» конкурсын огез вормись О. Бисар.

Ижысь Г. Красильников нимо музейын «Будӥсь писательлэн ӝӧк сьӧраз» литературной конкурслы йылпумъянъёс лэсьтӥзы. Вормисе потӥзы: фэнтези веросэныз Шаркан ёросысь Быгы гуртысь Людмила Шамаева но кылбуръёсыныз Ижысь Оксана Бисар.

«Будӥсь писательлэн ӝӧк сьӧраз» конкурс сям-йылоллы пӧрмемын ни. Со сярысь тодо ёросъёсын но, городъёсын но. Кылсярысь, 2014-тӥ арын конкурсэ вуиз 188 (!) уж. Туэ ужъёс трос ӧй вал, но со понна музей нырысьсэ вамыштӥз профессиональной училищеын дышетскисьёс доры. Конкурслэн та люкетаз туэ пыриськиз 13 мурт, уноез соос пӧлысь — вуоно радиотехникъёс, эмчиос, лэсьтӥськисьёс, дышетӥсьёс. Кылсярысь, 3-тӥ интыен пусъемын Тюменьын эмчилы дышетскись Марина Парвазетдинова. Со тодмо луэ ни вотэсын но — «Удмурт кылбурчи» группаысь уно чуръёс пӧлысь солэнъёсыз висъясько. Шӧдӥське, нылаш трос лыдӟиське, пӧртэм калыкъёслэсь мифологизэс тодэ. Палэнын дышетскыса но, со удмурт литературалэн улоназ пыриськытэк уг кыльы.

— Мон вордӥськемын Башкириысь Янаул ёросысь Шыр черкогуртын, — вера М. Парвазетдинова. — Филологие, журналистикае вамыштыны луонлыкъёсы вал, но отчы мынысал ке, гожъяськысал меда али но? Медицинаез мон яратӥсько, кылбураны но. огез мукетызлы юрттэ.

Конкурслэн темаез туэ вал гурттэ, шаердэ яратон. Тужгес усто произведениос гожтӥллям быдэ вуэм адямиос — Людмила Шамаева но Оксана Бисар.

Л. Шамаева гожтэм фэнтези. Шуэ, улытозям нырысьсэ проза гожтыны оскалтӥ.

— Кылбурез гожтыны ӝог, верос бордын кема малпаськоно вылэм, но мынам азьланяз но проза гожъяны мылкыды кылиз, — вера Л. Шамаева. — Удмурт литератураын фэнтези жанрен произведениос ӧжыт, соин но та борды кутски. «Инву ныл» веросам пыртэмын удмуртъёслэн сям-йылолъёссы, инты нимъёс — со ваньмыз Быгы котырысь. Ми туж шулдыр интыын улӥськомы — сикъёс, бусыос. Озьы удмуртлыкез данъяме потӥз.

Вашкалаезлэсь, гуртэзлэсь мӧзмыса, гожъяськыны кутскем О. Бисар. Со аслэсьтыз кылбуръёссэ «Одноклассники», «ВКонтакте» вотэс бамъёсы потта. Шуэ: мынам лыдӟисе арлыдогес ни, «Одноклассникиын», кылсярысь, 130-лэсь уно лыдӟисьёс кылбурме дунъяло.

— Мон туж тулкымъяськисько, ӧй малпа вал, вормись луо шуыса, — мылкыдыз пазяське О. Бисарлэн. — Мон гожъяськыны кутски валля арын гинэ. Нянез пуктӥськод ке, со юмалӟе, ӝутске, улонэз но улӥськод ке, йырад трос малпанъёс люкасько. Кызьы соосты поттод? Суредаськыны кутски — ӧй быгаты, кырӟан гожъялляй — ӧй пӧрмыты. Асме шедьтӥ кылбуранын. Каллен дышетскисько нылкышно кылбурчиосмылэсь. Кылбуран али мыным ваньмызлэсь тунсыко потэ.

Туэ ар понна конкурс йылпумъяськиз. Но эн дыртэ ручкаостэс, малпанъёстэс палэнтыны: сӥзьыл со нош ик ялэмын луоз ни.

Мария Иванова

Удмурт Дунне
By Удмурт Дунне Март 17, 2017 15:09