Ижын усьтӥськиз волонтёръёсты дасясь центр

Удмурт Дунне
By Удмурт Дунне Март 27, 2017 12:25

Дуннеысь егитъёслэн но студентъёслэн 19-тӥ фестивальзы ортчоз 14-тӥ-21-тӥ коньывуонэ Сочиын.

Ижысь М. Калашников нимо техникая кун университет бордын усьтӥськиз волонтёръёсты дасясь центр. Отын дышетскозы Дуннеысь егитъёслэсь но студентъёслэсь фестивальзэс ортчытыны юрттӥськисьёс.

Дуннеысь егитъёслэн но студентъёслэн 19-тӥ фестивальзы ортчоз 14-тӥ-21-тӥ коньывуонэ Сочиын. Солэн пусэз —  пӧртэм буёло бурдъёсын тӧдьысяська, со возьматэ эшъяськонэз. Та бадӟым фестиваль сюрессэ мытӥз 1947-тӥ арын Прагаын. Пӧртэм аръёсы со ортчылӥз Берлинын, Гаванаын, Бухарестын но дуннеысь мукет каръёсын. Россие фестиваль 3-тӥзэ вуэ ни. Нырысетӥез ортчиз 1959-тӥ арын. 1985-тӥ арын ортчемаз удмурт культураен тодматыны Москвае ветлӥз шаерысьтымы культурая но туризмъя министрлэн воштӥсез Пётр Данилов но.

— Со туж дано вал. Ми шаерысьтымы 30 кузя гинэ — адӟем карымон комсомолецъёс, азьветлӥсь егитъёс — быръемын вал.  Мынӥм мукет калыкъёсты удмуртъёсын, Удмуртиен тодматыны, — вера Пётр Павлович. — Со вакытэ мон вал Удмурт кун университетысь студент, ветлӥсько вал «Чипчирган» ансамбле, фестиваль дыръя, удмурт костюм дӥсяса, «Лымы тӧдьы», «Ой тӥ, чебер нылъёс» кырӟанъёсты быдэстылӥм.

Туэ Сочие люкаськозы 150 кунъёсысь 20 сюрслэсь уно егитъёс. Со быдӟа фестивалез кызьы радъялод? Дасяно, пе, луоз 5 сюрс волонтёръёсты, 50-эз соос пӧлысь луозы шаерысьтымы. Юрттӥськисьёс нимысьтыз дышетскозы но. Со понна быдэс Россиын кылдытэмын 20 центръёс, огез — Ижын, милемлы матысьёсыз интыяськемын на Казаньын но Челябинскын.  Соин ик Ижысь центре вуыны быгатозы мукет улосъёсысь но егитъёс — Киров, Пермь палъёсысь но Башкортостанысь.

— Ижысь техникая кун университетысь волонтёръёс 10 ар ӵоже ни пӧртэм фестивальёсты радъяны юртто, татысь волонтёръёслэн центрзы Россиысь Волонтёръёслэн ассоциациязы пыре, — вера Россиысь Волонтёръёслэн ассоциацизылэн огез кивалтӥсез А. Метелев. — Та центрды фестиваль ортчем бере но мед улоз, азьланяз шаердэс азинтыны мед юрттоз.

Кин ужрадъёсы мыло-кыдо пыриське, фестивальёсын юрттӥськылэ, со ик, бадӟым улонэ потыса, кивалтӥсь но луэ, оско Ижысь техникая кун университетысь кивалтћсьёс.

Фестивале пыриськемды потэ ке, 31-тӥ южтолэзёзь дыртэ мылкыддэс вераны, Russia.2017.com вотэс баме пырыса.

Мария Векшина

 

 

 

 

Удмурт Дунне
By Удмурт Дунне Март 27, 2017 12:25