Инмар Анай уз кушты. Кӧсутён чылкытатӥськыны юрттэ

Удмурт Дунне
By Удмурт Дунне Март 2, 2017 14:54

Оскись калык 40 нунал ӵоже кӧсуте, Иисус Христослэсь улӟемзэ пумитаны дасяське.

 Котькуд адямиез гажано 

Евангелиын верамын, Иисус Христосэз котькуд адями пушкысь шӧдыны быгатоно шуыса. Соин ик вӧзысьтымы котькуд адями шоры гажаса, яратыса учконо.

Жаляса верано, табере матысь адямиос, кузпалъёс гинэ но ог-огзы шоры кесясько, керӟегъясько.  Дун-чылкытлык сярысь  валамысь дугдӥськом. Асьмемын кивалтыны кутскемын кӧтэз тырон, кема изён, шулдыръяськон. Соин ик, Инмар сярысь тодамы мед возём шуыса, юнматэмын кӧсутён нуналъёс. Кузь кыстӥськисьёсыз ар ӵоже 4 пол луо, со вискын вакчи визянъёс вань на, кылсярысь, котькуд среда но пятница нуналъёсы.

Быдӟым кӧсутёнлэн нырысетӥ арняяз дун-чылкыт Андрей Критскийлэсь канонзэ лыдӟиськом, нош Быдӟымнунал азьын берло арняез Страстной луэ — таос уката юртто Инмарлы матэ кариськыны, солы ӧпкельыса вазиськыны.

Кӧсутёнэз чаклало тросэз оскисьёс, тодазы вайытысал: 11-тӥ, 18-тӥ но 25-тӥ мартэ ортчозы кулэмъёсты буре ваён службаос. Сопал дуннее кошкемъёслэн нимтулъёсынызы запискаосты храмъёсы вайыны луоз азьлогес — бӧрысь кузь черодъёсын сылонтэм вылысь.

100 ар талэсь азьло…

Февраль но Октябрь революциос Россиысь православиез куашкатӥзы. 100 ар ортчыса но, та пумысен трос споръясько, янгыш муртъёсты утчало.

Революция одӥг уй куспын ӧз кисьма. Бугыръяськонъёслэн матэктэмзы сярысь  трослы вазенгес веразы вал черкын ужасьёс. Кылсярысь, дун-чылкыт Иоанн Кронштадский 1905-тӥ арын ай шуиз: Инмарлэсь асьмеос палэнтӥським, Инмар но асьмелэсь палэнтӥськиз. Улӥськом ас тодэммыя-мылкыдмыя — ӝоген адӟом, кытчы со вуттоз… Инмар, ӟеч эмчи сямен ик, асьмемыз куректонъёс-сюлмаськонъёс пыр поттэ, собере мед чылкытатӥськом шуыса.

Ижысь Дун-чылкыт Михаиллэн соборез 1938-тӥ арын куашкатыса быдтэмын вал. 2007-тӥ арын со интыын ик усьтӥськиз вылез черк.

Тодмо гожъяськись, философ Сергей Фудель тодаз вайылӥз атаезлэсь, священниклэсь, верам кылъёссэ: адямиос ог-огзэс адӟемпотостэм карыны кутскемын. Быдэс омыр пачыламын урод мылкыдын. Синазькыль карон мылкыд часлы быдэ юнгес луэ, яратон татын уг улы…

Со вакытъёс  ӧрысьтызы поттӥзы ӟеч адямиосты но. Дышетскем муртъёс но, М. Горький писатель сямен, огзы бӧрсьы мукетсы кесяськизы: золгес мед луозы тулкымъяськонъёс, бугыръяськонъёс!

Антон Деникин ӟуч генерал аслаз тодэ ваёнъёсаз бӧрысьгес паймыса гожтӥз, кызьы 1917-тӥ арын феврале одӥгез егит офицер черке аслыз штаб лэсьтӥз, нош алтарьын сьӧрос кариз. Одӥг солдат но, ачиз священник но талы пумит ӧз султэ.

Адямиослэн ог-огзэс гажамысь дугдэмзы шӧдӥськыны ӧдъяз Ижысь заводъёсын но. Ужасьёс сьӧразы пурт басьто вал — кивалтӥсьёслэн талы пумит приказъёссы ӧз юрттэ ни. 1911-тӥ арын Вӧйдырез келян дыръя 3 мурт быдтэмын, 53-ез сӧсыртэмын вал. Адямиос жугиськизы саникъёсын, пуртъёсын, ог-огзэс ыбылӥзы. 1917-тӥ арын Быдӟымнуналэз  пусйыку гинэ, ваньзы улэп кылизы, угось пегӟем-ватскем полицейскойёс интые, югдурез чакласа возизы асьсэос заводын ужасьёс.

Валамон, Россиын вал сыӵеос, кинъёс адӟизы но валазы, мар луэ странаен. Но соос туж ӧжыт вал. Странаез куашканлэсь утьыны нокин ӧз быгаты ни.

Ӧпкелён уте

Туннэ черкын ужасьёс пӧлысь но куд-огезлэн со вакытъёсты вунэтэмез потэ. Но со Атыкай музъемедлэн историезлэсь палэнтӥськем кадь луэ ук. Иисус Христос но фарисейёсыныз ӵош алылӥз: ноку, пе, вераны уг яра, атайёсмылэн вакытъёсазы улысалмы ке, пророкъёслэсь вирзэс кисьтонэ ӧй пыриськысалмы шуыса. Паисий Святогорец туж куриз, Инмарлы вазиськыкумы, мед ӧпкелём шуыса. Библиысь 3 отрокъёс — Анания, Азария но Мисаил — язычникъёслэн идолзылы вӧсяськыны пумит луизы. Соин ик Навуходоносор эксэй косэмъя соос ӝуась гуре понэмын вал.  Тылын ӝуакузы, отрокъёс, атайёссылэсь сьӧлыкъёссэс простить карыны курыса, вӧсяськизы, атайёссы Инмарлэсь палэнтӥськем понна асьсэдыз но янгыш каризы. Озьы ӧпкелемзылы луыса ик ӝуась гур сӥяз — Архангел Михаил утиз соосты. Ӧпкельыса ик  ӝуанлэсь утиськизы Серафим Вырицкий, Феодосий Кавказкий, Матрона блаженная.

Калыклэн йыраз, сюлэмаз котьку луыны кулэ оскон. Тушмон али но черкез, кунэз вашкала амалъёсын ик  — йӧнъяськонэн, кивалтыны турттонэн — вормыны выре. Жаляса верано, туала вакытэ но, 100 ар талэсь азьло кадь ик, дун-чылкытлыкез гажасьтэм, Атыкай музъеммылэн историеныз, культураеныз тунсыкъяськисьтэм адямиос вань. Соос, даур талэсь азьло сямен ик, кышкыт луо.

100 ар талэсь азьло православиез куашкатӥм ке но, сьӧлыктэм Инмар Анай Россиез ӧз кушты — «Державная» обросэн  вуиз дорамы Николай II эксэез престолысь куштон нуналэ. Солэсь вазьгес  Евдокия Адрианова крестьянка кык уйвӧт адӟиз. Нырысетӥяз кытысь ке пыдлось куара солы вераз: Коломенской черкогуртын вань бадӟым сьӧд оброс, сое басьтоно, утялтоно — вӧсяськоно. Кыкетӥяз уйвӧтаз адӟиз тӧдьы черкез, со пушкын  — нылкышно. Адрианова сюлмыныз шӧдӥз: со — Инмар Анай. Евдокия мынӥз Коломенское, соку ик тодмаз уйвӧтаз адӟем черкез, шедьтӥз обросэз. Озьы та оброс туала Россиез утись святыняос пӧлын валтӥсез луиз.

 Матысь нуналъёсы черк пусъе:

5-тӥ мартэ — Быдӟым кӧсутёнлэн нырысетӥ арняез, православиез сӥлы карон.

9-тӥ мартэ — Иоанн Предтечалэсь йырзэ нырысетӥ но кыкетӥ ползэ шедьтон.

12-тӥ мартэ — Быдӟым кӧсутёнлэн кыкетӥ арняез. Григорий Палама святителез сӥлы карон нунал.

15-тӥ мартэ — Россия пала дурбасьтӥсь Инмар Анайлэсь «Державная» оброссэ шедьтон нунал.

19-тӥ март — Быдӟым кӧсутёнлэн куинетӥ арняез, киросэз сӥлы карон.

26-тӥ март — Быдӟым кӧсутёнлэн ньылетӥ арняез, преподобной  Иоанн Лествичникез сӥлы карон.

Удмурт Дунне
By Удмурт Дунне Март 2, 2017 14:54